អ្នកដណ្ដើមប្ដីប្រពន្ធគេប្រយ័ត្ន! កម្មពៀរទាំងនេះនឹងកើតមាននៅជាតិហ្នឹងមិនចាំជាតិណា
- 2018-09-14 04:35:20
- ចំនួនមតិ 0 | ចំនួនចែករំលែក 0
អ្នកដណ្ដើមប្ដីប្រពន្ធគេប្រយ័ត្ន! កម្មពៀរទាំងនេះនឹងកើតមាននៅជាតិហ្នឹងមិនចាំជាតិណា
បាបកម្ម អ្នកណាថាចាំដល់ជាតិក្រោយទើបឃើញ? សម័យនេះ មិនថាអ្នកធ្វើអ្វី ត្រឹមជាតិនេះប៉ុណ្ណោះ អ្នកនឹងបានឃើញកម្មពៀរដាក់ទោស ជាពិសេសកម្មពៀរសម្រាប់អ្នកដែលចូលចិត្តប្រព្រឹត្តខុសសីលប្រាំទី៣ “កាមេសុ មិច្ឆាចារា” ដែលជាជនល្មើសក្នុងកាម ចូលចិត្តប្រឡូកប្រឡាក់ប្ដី ឬប្រពន្ធអ្នកដទៃ។
ក្នុងសង្គមបច្ចុប្បន្ននេះ មានវិធីជាច្រើនដែលបណ្ដាលឲ្យមនុស្សមិនថាប្រុស ឬស្រីអាចក្បត់ចិត្តមនុស្សដែលខ្លួនស្រលាញ់បានងាយ។ មនុស្សមួយចំនួនហាក់ចាត់ទុកថា នេះគឺជាក្ដីសុខដែលអ្នកណាៗក៏ប្រព្រឹត្ត ប៉ុន្តែដឹងទេថាអ្នកកំពុងស្ថិតក្នុងបញ្ជីឈ្មោះរបស់មនុស្សដែលកម្មពៀរនឹងជម្រះបញ្ជីហើយ។
*សីលប្រាំចំណុចទី៣នេះសំដៅលើអ្វី?*
“កាមេសុ មិច្ឆាចារា វេរមណី” សំដៅលើការល្មើស ប្រព្រឹត្តខុសឆ្គងក្នុងផ្លូវកាម។ អង្គប្រកបដែលអាចកាត់សេចក្ដីថានរណាម្នាក់ធ្វើខុសចំណុចនេះមានដូចខាងក្រោម៖
១. មានចិត្តប្រព្រឹត្តបំពាន ក៏ខុសបាត់ទៅហើយ។
២. មានការព្យាយាម បញ្ចេញសកម្មភាព ដូចជាព្យាយាមចូលទៅជិត ព្យាយាមធ្វើឲ្យគេចាប់អារម្មណ៍ ដោយមិនខ្វល់ថាគេមានប្ដី ឬប្រពន្ធរួចហើយក៏ដោយ។
៣. បានប្រព្រឹត្តល្មើសដូចប្រាថ្នា ដោយរាប់ទាំងការប្រព្រឹត្តល្មើសផ្លូវភេទ និងការបំពានរាងកាយផ្សេងៗ។ ភាគច្រើនពេលនិយាយដល់ការប្រព្រឹត្តខុសសីលនេះ មនុស្សភាគច្រើននឹងនឹកដល់ការប្រព្រឹត្តខុសក្នុងកាម ដែលត្រូវបានចាត់ទុកថាជាអំពើស្មោកគ្រោក ដែលសង្គមទូទៅមិនទទួលស្គាល់។
អ្នកដែលលួចលាក់ប្រព្រឹត្តរឿងអកុសលបែបនេះ នឹងត្រូវទទួលបានផលតបស្នងក្នុងជាតិនេះ ដូចជា៖
១. មានអ្នកស្អប់ខ្ពើមច្រើន ព្រោះប្រព្រឹត្តទង្វើខុសឆ្គងជាមួយប្ដីប្រពន្ធគេ បង្កកំហឹងដល់ភាគីរងគ្រោះ ធ្វើឲ្យខ្លួនមានសត្រូវ និងអ្នកស្អប់កាន់តែច្រើន។
២. មានអ្នកប៉ងធ្វើបាប ព្រោះធ្លាប់កសាងសត្រូវ បង្កការឈឺចាប់ក្នុងចិត្តអ្នកដទៃ ធ្វើឲ្យគេខឹង និងព្យាយាមស្វែងរកវិធីធ្វើបាប ដូចជាមានឃើញច្រើនតាមព័ត៌មាននានា។
៣. ធ្លាក់ខ្លួន បាត់បង់ទ្រព្យសម្បត្តិ មិនថាធ្វើអ្វីក៏មានតែខាតបង់ ដោយសារទង្វើដែលមិនចេះស្កប់ស្កល់ មិនពេញចិត្តនឹងអ្វីដែលខ្លួនកំពុងមាន (ប្ដី ប្រពន្ធខ្លួនឯង) និងបង្កបញ្ហាដល់អ្នកជុំវិញខ្លួន។
៤. ពោរពេញដោយទុក្ខ ព្រោះការព្យាយាមបិទបាំងទង្វើដែលខ្លួនប្រព្រឹត្ត ខ្លាចថាអ្នកដទៃដឹងរឿងរបស់ខ្លួន ដូច្នេះហើយមិនអាចរស់នៅដោយមានក្ដីសុខក្នុងចិត្តបានឡើយ។
ចំណែកកម្មពៀរដែលត្រូវទទួលក្រោយពេលស្លាប់ គឺគ្មានអ្វីក្រៅពី “នរក” នោះទេ ហើយនៅពេលចាប់ជាតិជាថ្មី ក៏អាចមិនមានជីវិតរស់នៅស្រួល ព្រោះត្រូវដោះបំណុលកម្មដែលខ្លួនបានសាង ដែលកម្មពៀរអាចមានដូចជា ជួបស្នេហាមិនសមបំណង ជួបមនុស្សដែលខ្លួនស្រលាញ់ក៏ត្រូវគេដណ្ដើមយក ឬក៏ក្លាយជាប្រពន្ធចុងរបស់គេជាដើម។
អ្នកដែលកំពុងប្រព្រឹត្ត ហើយមានឱកាសបានអានអត្ថបទនេះ គួរតែបញ្ឈប់នូវអ្វីដែលខ្លួនកំពុងធ្វើទៅ។ អ្នកអាចកំពុងមានក្ដីសុខជាមួយវា ប៉ុន្តែជឿទៅ ក្ដីសុខនោះវាមិនមែនក្ដីសុខស្ថិតស្ថេរទេ ថ្ងៃនេះអ្នកបានគេមកគ្រប់គ្រងដូចចិត្ត ប៉ុន្តែកុំភ្លេចថា ថ្ងៃខាងមុខអ្នកក៏មានឱកាសបាត់បង់គេវិញដោយការឈឺចាប់ដូចគ្នា ៕
ចុចអាន៖
បើមនុស្សស្រីអស់អីត្រូវនិយាយហើយ ស្នេហាក៏ជិតឈានដល់ផ្លូវបញ្ចប់ដែរ
ប្ដីល្អក៏អាចក្លាយជាប្ដីអាក្រក់បាន បើប្រពន្ធមិនចោលចរិត ៥យ៉ាងនេះ