ផ្ញើជូនមនុស្សស្រីដែលសម្រេចចិត្តចាកចេញពីប្រុសក្បត់

2018-09-12 09:48:50
ចំនួនមតិ 0 | ចំនួនចែករំលែក 0

ជូនចំពោះមនុស្សស្រីដែលចិត្តដាច់ពីប្រុសក្បត់៖

សូមអ្នកកុំវិលត្រលប់ទៅរកគេម្តងទៀត។ ខ្ញុំដឹង នៅក្នុងចិត្តរបស់អ្នក កំពុងតែគិតថា គ្មានអ្វីត្រូវរារែកបន្តទៀតទេ ដល់ពេលដកខ្លួនហើយ ទើបមិនឈឺចាប់ជាងនេះ។ ខ្ញុំដឹងថា ការសម្រេចចិត្តរបស់អ្នក គឺប្រកបដោយភាពជឿជាក់និងមានហេតុផលច្បាស់លាស់។ ខ្ញុំដឹងទៀតថា អ្នកបានសម្រេចចិត្តដោយមិនស្តាយក្រោយឡើយ។

រឿងកន្លងមកវាល្មមគ្រប់គ្រាន់ពេកហើយសម្រាប់ធ្វើឲ្យអ្នកឆ្អែតចិត្ត។ នេះក៏មិនមែនជាលើកទី១ដែរ ដែលអ្នកបានព្យាយាមចាកចេញពីគេ ត្រូវទេ? កាលពីមុន អ្នកធ្លាប់ធ្វើអីចឹងម្តងរួចហើយ តែនៅមិនដាច់ចិត្ត ក៏ត្រលប់ទៅវិញ តើធ្វើបែបហ្នឹងធ្វើអីទៅ?

មនុស្សប្រុស ដែលមិនខ្វាយខ្វល់ពីអ្នក មនុស្សប្រុសដែលបានធ្វើឲ្យអ្នកឈឺបេះដូងម្តងហើយម្តងទៀត មនុស្សប្រុសដែលមិនអាចកាន់ដៃគ្នាបន្តទៅមុខបាន គ្មានហេតុផលណាដែលអ្នកត្រូវនៅទ្រាំទ្រជាមួយគេទៀតទេ។ ពិតហើយ ហេតុផលគឺដោយសារក្តីស្នេហ៍ស្មោះអ្នកនៅតែមានលើរូបគេ។ ចុះហេតុអ្វី ត្រូវស្រលាញ់គេរហូតភ្លេចស្រលាញ់ខ្លួនឯងទៅវិញ? ហេតុអ្វីត្រូវយកសុភមង្គលរបស់ខ្លួនឯងទៅប្ដូរជាមួយនឹងរឿងឥតបានការ? ខ្ញុំដឹងថាសុភមង្គលរបស់អ្នកអាចកើតមានឡើង កាលណាបាននៅជិតមនុស្សដែលខ្លួនស្រលាញ់ ប៉ុន្តែបើនៅជិតគ្នាហើយបែរជាផ្ទុយស្រឡះពីការរំពឹងទុក ត្រូវតែឈប់ដាច់ខាត។ ពេលបែកគ្នាហើយត្រូវគ្នាវិញ តែងកើតឡើងដដែលៗញយដង ដោយសារតែគេមិនខ្លាចការបែកបាក់ មិនបានឲ្យតម្លៃចំពោះអ្នក។ ឯក្តីស្រលាញ់ដែលគេផ្តល់មកឲ្យអ្នក មិនបាន១០% នៃក្តីស្រលាញ់ដែលអ្នកផ្តល់ឲ្យគេផង។ ទោះមានរឿងអ្វីក៏ដោយ កុំត្រលប់ទៅរកម្នាក់នោះដាច់ខាត ឈប់ខ្ជះខ្ជាយពេលវេលាតទៅទៀត។ មនុស្សស្មោះត្រង់ លះបង់ដូចជាអ្នក មិនស័ក្តិសមនឹងទទួលបានស្នេហាបែបនេះទេ។ មនុស្សប្រុសដូចជាគេ ក៏មិនស័ក្តិសមនឹងទទួលបានមនុស្សល្អដូចជារូបអ្នកដែរ៕