បទពិសោធន៍អាណាព្យាបាលយកកូនទៅព្យាបាលនៅពេទ្យគន្ធបុប្ផា អានហើយរំជួលចិត្ត!

2018-09-11 11:07:55
ចំនួនមតិ 0 | ចំនួនចែករំលែក 0

ក្រោយមរណភាពរបស់វេជ្ជបណ្ឌិត Beat Richner ដែលជាស្ថាបនិកមន្ទីរពេទ្យគន្ធបុប្ផា កាលពីពេលថ្មីៗកន្លងទៅនេះ ធ្វើឲ្យមានការស្ដាយស្រណោះ អាឡោះអាល័យជាពន់ពេកពីសំណាក់ប្រជាជនកម្ពុជា ជាពិសេសអ្នកដែលមានកូនចៅធ្លាប់ត្រូវបានជួយសង្គ្រោះដោយ លោកវេជ្ជបណ្ឌិតផ្ទាល់ និងក្រុមគ្រូពេទ្យទាំងអស់នៃមន្ទីរពេទ្យគន្ធបុប្ផា។ ដំណឹងដ៏ក្រៀមក្រំនេះធ្វើឲ្យអ្នកឲ្យអ្នកម្ដាយ និងលោកឪពុក២រូប ដែលធ្លាប់ដឹងគុណលោក និងមន្ទីរពេទ្យផ្ទាល់ចែករំលែកពីអារម្មណ៍ផ្ទាល់ខ្លួនយ៉ាងដូច្នេះថា៖

វេជ្ជបណ្ឌិត Beat Richner នៅមន្ទីរពេទ្យ

អ្នកស្រី ហ៊ឹង សុធា ជាស្ត្រីមេផ្ទះ ដែលសព្វថ្ងៃមានកូន ២នាក់ក្នុងបន្ទុក ហើយកូនស្រីពៅធ្លាប់បានជួយសង្គ្រោះដោយក្រុមគ្រូពេទ្យនៃមន្ទីរពេទ្យគន្ធបុប្ផាបានរៀបរាប់ប្រាប់ វិបសាយកញ្ញាថា៖ " អ៊ំមានអារម្មណ៍សោកស្ដាយ ពេលគាត់ (Beat Richner) ស្លាប់ទៅ ព្រោះអីគាត់ជួយកូនក្មេង បានច្រើនណាស់។"

អ្នកស្រីបានរំលឹកពីការជួយសង្គ្រោះកូនស្រីពៅរបស់អ្នកស្រីកាលពី ១០ ឆ្នាំមុននោះថា៖ កាលណោះកូនអ្នកស្រី អាយុទើប ៥ ឆ្នាំ ឈរលេងលើកៅអីមិនប្រយ័ត្ន ធ្លាក់ដួលផ្កាប់មុខនឹងឥដ្ឋមួយទំហឹង បណ្ដាលឲ្យពកក្បាលធ្ងន់ធ្ងរ។ ល្ងាចថ្ងៃដដែលនោះដោយមើលស្រាលស្ថានភាព អ្នកស្រីមិនបានជូនកូនទៅមន្ទីរពេទ្យនោះទេ ដោយទុករហូតដល់ពេលយប់ម៉ោង ៣:០០ ទៀបភ្លឺ ស្រាប់តែកូនមានអាការក្អួតចង្អោរ និងឈឺក្បាលក្ដៅខ្លួនខ្លាំង ទើបប្រញាប់ប្រញាល់ ដឹកទៅពេទ្យទាំងយប់។ អ្នកស្រីប្រាប់ថា អារម្មណ៍ពេលនោះភ័យផងបារម្ភផង នឹកមិនឃើញអ្វីទាំងអស់ ដឹងតែធ្វើយ៉ាងណាដឹកកូនឲ្យដល់ពេទ្យ តែពេទ្យដែលអ្នកស្រីនឹកដល់មុនគេនោះគឺគន្ធបុប្ផា ព្រោះអ្នកស្រីមានការជឿជាក់លើពេទ្យ។

"កាលនោះគេឃើញកូនអ៊ំមានសភាពធ្ងន់ធ្ងរ អ៊ីចឹងគេមិនឲ្យតម្រង់ជួរទេ គឺយកចូលបន្ទប់សង្គ្រោះតែម្ដង។ ក្រោយមកពេទ្យប្រាប់ថា កូនអ៊ំរបួសសរសៃត្រង់ក្បាលនោះដែលតម្រូវឲ្យគេងពេទ្យ ៤ ទៅ៥ ថ្ងៃ។ ហើយក្រោយមកទៀតកូនអ៊ំធូរស្រាល ហើយអត់មានអស់លុយកាក់អីមួយរៀលទេ។ ទាល់តែពេលអ៊ីចឹងទៅ មានអារម្មណ៍ថា ចាំគុណពេទ្យហ្នឹងរហូតមក។ ដល់តែហើយល្ងាចមិញមើលហ្វេសប៊ុកឃើញពេទ្យធំស្លាប់ អ៊ំមានអារម្មណ៍ក្ដុកក្ដួលណាស់ នឹកឃើញថា បានគាត់ហ្នឹងហើយជាអ្នករៃអង្គាសលុយជំនួយស្រុកគេ មកជួយកូនខ្មែរយើង។"

អ្នកស្រី ហ៊ឹង សុធា និងកូនស្រី

មិនខុសគ្នាពី លោក ជាន ចាន់រ៉ា បុគ្គលិកក្រុមហ៊ុនឯកជនមួយរូបក៏បានចែករំលែកបទពិសោធន៍ដែរថា៖

កូនខ្ញុំកើតនៅមន្ទីរពេទ្យកាល់ម៉ែត្រ។ កើតបាន២ថ្ងៃ តែមិនជុះអាចម៍ព្រៃ ដូច្នេះខាងមន្ទីរពេទ្យបានបញ្ជូនទៅគន្ធបុប្ផា។ ដំបូងគេអត់ទទួលទេដោយសារគ្មានគ្រែ។ គេបានបញ្ជូនកូនខ្ញុំទៅមន្ទីរពេទ្យរដ្ឋមួយ។

នៅទីនោះបានព្យាបាលដាក់សេរ៉ូម ចាក់ថ្នាំ និងបញ្ច្រកថ្នាំ ប៉ុន្តែគ្មានមធ្យោបាយណាជួយព្យាបាលឲ្យវាជុះបានឡើយ ក្រៅពីយកទុយយោបូមលាមតាមរន្ធគូទ។ នៅពេលបៅទឹកដោះគោម្ដងៗ ធ្វើឲ្យពោះឡើងប៉ោងធំ គួរឲ្យញញើត ព្រោះវាមិនអាចជុះបាន។ មធ្យោបាយតែម្យ៉ាងគត់ គឺបូមលាមកជារៀងរាល់ថ្ងៃ។

គ្រូពេទ្យនៅទីនោះប្រាប់ថា ដោយសារពោះវៀនបត់ មិនអាចជុះបានទេ។ ទាល់តែកូនមានទម្ងន់១០គីឡូក្រាមទើបអាចវះកាត់។ សាកស្រមៃមើលទៅ តើអាយុប៉ុន្មានទើបមានទម្ងន់១០គីឡូក្រាម ហើយទម្ងន់ឡើងយ៉ាងម៉េចកើត បើបៅបាន តែជុះមិនចេញ ហើយត្រូវបូមរន្ធគូទរហូតនោះ។ ព្យាបាលនៅមន្ទីរពេទ្យនោះបានប្រហែលជា១០ថ្ងៃ អ្វីៗគ្មានការប្រែប្រួលឡើយ។

ទីបំផុត ខ្ញុំបានជិះម៉ូតូទៅមន្ទីរពេទ្យគន្ធបុប្ផាសាកសួរសន្តិសុខរឿងមានសល់គ្រែអត់។ លើកទី១ សន្តិសុខប្រាប់ថា អត់ទាន់មានទេ។ មួយថ្ងៃក្រោយមក ខ្ញុំបានទៅសួរម្តងទៀត សន្តិសុខប្រាប់ថា មានគ្រែសល់ហើយ។ ខ្ញុំក៏បានផ្លាស់កូនទៅគន្ធបុប្ផាបានសម្រេច។

គ្រាន់តែយកទៅដល់ភ្លាម ក្រុមគ្រួសារពេទ្យចាប់ផ្ដើមពិនិត្យ ហើយមួយរយៈពេលខ្លីមកប្រាប់ថា ២ថ្ងៃទៀត កូនខ្ញុំត្រូវវះកាត់ហើយ។ ២ថ្ងៃក្រោយមក កូនខ្ញុំត្រូវបានវះកាត់ដោយជោគជ័យ។ បន្ទាប់ពីវះកាត់ ត្រូវសម្រាកព្យាបាលប្រហែលជា១០ថ្ងៃ ក៏លោកគ្រូពេទ្យអនុញ្ញាតឲ្យចេញទៅផ្ទះ។

ក្រុមគ្រួសារខ្ញុំបានមើលថែកូននៅផ្ទះតាមការណែនាំរបស់លោកគ្រូពេទ្យគន្ធបុប្ផា។ រាល់ពេល៣ខែម្ដង ខ្ញុំបាននាំកូនមកឲ្យពិនិត្យមើលពោះវៀនរបស់វា។ មួយឆ្នាំក្រោយមក គ្រូពេទ្យក៏ឈប់ណាត់ដោយសារពោះវៀនកាន់តែល្អ។

រាល់ពេលដែលខ្ញុំនឹកឃើញរឿងកំណើតកូន ឬធ្វើដំណើរកាត់មន្ទីរពេទ្យគន្ធបុប្ផា ខ្ញុំតែងនឹកស្រមៃដល់រឿងព្យាបាល។ ប្រសិនបើមិនមានមន្ទីរពេទ្យគន្ធបុប្ផាទេ ម្ល៉េះកូនខ្ញុំទៅជាយ៉ាងណា? តើចិញ្ចឹមយ៉ាងណា ប៉ុន្មានឆ្នាំទើបមានទម្ងន់១០គីឡូក្រាម? ពេលនេះ កូនខ្ញុំមានសុខភាពល្អ អាយុជិត៦ឆ្នាំហើយ។

លោក ជាន ចាន់រ៉ា និងកូនប្រុស

មិនត្រឹមតែអ្នកទាំង២ ដែលជាអាណាព្យាបាលធ្លាប់នាំកូនទៅទទួលការព្យាបាលនៅពេទ្យនេះបញ្ចេញយោបល់បែបនេះនោះទេ។ ប៉ុន្តែអាណាព្យាបាលស្ទើរតែទូទាំងប្រទេសទៅហើយ ដែលកោតសរសើរ និងមានទំនុកចិត្តលើមន្ទីរពេទ្យមួយនេះ ហើយក៏មិនភ្លេចគុណ និងការលះបង់របស់លោកដុកទ័រ Beat Richner ក្នុងការសង្គ្រោះកុមារកម្ពុជាដែលមិនរើសអើងគ្រប់វណ្ណៈ៕

ចុចអាន៖មកដឹងមូលហេតុដែលទារិកាទម្ងន់ ៦,៨ គីឡូ ម្ដាយអាចកើតធម្មជាតិបាន

អត្ថបទ៖ Pencharm