បើមិនបានប្រាកដប្រជាជាមួយខ្ញុំទេ កុំចូលមកក្នុងជីវិតខ្ញុំអី

2018-09-10 03:30:00
ចំនួនមតិ 0 | ចំនួនចែករំលែក 0

ពាក្យទាំងនេះគឺចង់និយាយទៅកាន់បុរសដែលចង់ចូលមកក្នុងជីវិតខ្ញុំ!

ខ្ញុំពិតជាហត់ណាស់ ខ្ញុំហត់នឹងទំនាក់ទំនងមួយដែលមិនច្បាស់លាស់ ខ្ញុំហត់នឹងប្រគល់ការស្រឡាញ់ខ្ញុំទៅកាន់មនុស្សដែលគ្រាន់តែចូលមកលេងក្នុងជីវិតស្នេហាខ្ញុំ។

រូបតំណាង

ប្រាប់តាមត្រង់ខ្ញុំពិតជាមិនចូលចិត្តការលេងល្បែងស្នេហាទេ ខ្ញុំចង់បានភាពច្បាស់លាស់ ភាពជាក់លាក់មួយ ព្រោះខ្ញុំមិនដែលមានបំណងនឹងលេងសើចជាមួយអារម្មណ៍អ្នកណាម្នាក់ឡើយ។

បើអ្នកមិនបានតាំងចិត្តថាប្រាកដប្រជាជាមួយខ្ញុំទេ សូមកុំចូលមកក្នុងជីវិតខ្ញុំអី ព្រោះខ្ញុំមិនចង់ចំណាយពេល ចំណាយកម្លាំង ចំណាយទឹកចិត្ត លើមនុស្សដែលយកខ្ញុំទុកជាការលេងសើច ទុកខ្ញុំជាការពិសោធន៍នោះទេ។ អ្នកដឹងអត់ពេលដែលអ្នកដើរចូលមកហើយបេះដូងខ្ញុំនឹងចងចាំអ្នកទុក វានឹងចាប់ផ្ដើមស្គាល់អ្នក ហើយក៏ចាប់ផ្ដើមស្និទ្ធស្នាលជាមួយអ្នកដែរ ប៉ុន្តែបើបន្ទាប់មកអ្នកក៏ដើរចេញទៅវិញ តើអ្នកមានគិតដល់វាទេ? តើវាឈឺចាប់បែបណា? វានឹងត្រូវជួបរឿងពិបាកចិត្តអីខ្លះ? បែបនេះហើយទើបខ្ញុំចង់ឲ្យអ្នកគិតមុនពេលមកស្រឡាញ់ខ្ញុំ។

រូបតំណាង

បេះដូងខ្ញុំជាសាច់ជាឈាមមិនមែនជាឧបករណ៍កម្សាន្តអារម្មណ៍ពេលអ្នកអផ្សុកទេ ដូច្នេះកុំព្យាយាមយកខ្ញុំមកកំដរអារម្មណ៍អ្នក ព្រោះខ្ញុំមិនដែលគិតថាយកអ្នកមកកំដរដូចគ្នា។

ព្យាយាមយកអារម្មណ៍មនុស្សស្រីដាក់ក្នុងអារម្មណ៍អ្នកផង បើគេធ្វើបែបនោះដាក់អ្នកវិញតើអ្នកមានអារម្មណ៍យ៉ាងណា? កុំព្រោះតែការចង់សប្បាយរបស់អ្នកមកបំផ្លាញទឹកចិត្តរបស់មនុស្សស្រីម្នាក់ដែលខំស្រឡាញ់អ្នកអស់ពីចិត្ត។

ខ្ញុំអាចនឹងអាយុតិចជាងអ្នក តែខ្ញុំដឹងថាខ្ញុំច្បាស់លាស់លើរឿងមនោសញ្ចេតនាជាងអ្នក ព្រោះខ្ញុំមិនចង់ផ្លាស់ប្ដូរស្នេហាដូចជាខោអាវឡើយ។ ស្រឡាញ់ខ្ញុំត្រូវច្បាស់លាស់ជាមួយខ្ញុំ ព្រោះខ្ញុំប្រាកដចិត្តណាស់ថាពេលខ្ញុំទទួលយកអ្នក ខ្ញុំនឹងដាក់ចិត្ត ដាក់បេះដូងខ្ញុំមកស្រឡាញ់អ្នកហើយនឹងព្យាយាមកាន់ដៃអ្នករហូតបើអ្នកមិនលែងដៃខ្ញុំ។