មកដឹងមូលហេតុដែលទារិកាទម្ងន់ ៦,៨ គីឡូ ម្ដាយអាចកើតធម្មជាតិបាន

2018-09-06 09:16:24
ចំនួនមតិ 0 | ចំនួនចែករំលែក 0

កាលពីល្ងាចថ្ងៃទី៤ កញ្ញាកន្លងទៅនេះ មានការភ្ញាក់ផ្អើលនៅលើបណ្ដាញសង្គម ដោយសារតែមានការចែកចាយតគ្នាថាមានទារិកាទម្ងន់ ៦,៨គីឡូ បានសម្រាលដោយសុវត្ថិភាពនៅឯមន្ទីរពេទ្យបង្អែកខេត្តកំពត។ ទារិកានោះត្រូវបានគេដឹងថា មានឈ្មោះ លីដា ដែលសម្រាលដោយធម្មជាតិ និងជាកូនទី២ ក្នុងគ្រួសារ។

ទារិកា លីដា ពេលកើតភ្លាម

ឆ្លើយឆ្លងជាមួយវិបសាយ **កញ្ញា** ម្ចាស់ Account Facebook ដែលមានឈ្មោះថា Hunii LiKa ដែលប្រាប់ថាមានបងស្រីសម្រាលនៅមន្ទីរពេទ្យខាងលើដូចគ្នា និងបានឃើញទារិកាលីដា បានឱ្យដឹងថា ម្ដាយទារិកានោះចូលក្នុងបន្ទប់សម្រាលត្រឹមប្រហែលមួយម៉ោងប៉ុណ្ណោះ ក៏សម្រាលរួចរាល់ ក្រោមការជួយពីក្រុមគ្រូពេទ្យ ៥ នាក់។ ប្រភពដដែលបានឲ្យដឹងទៀតថា ម្ដាយរបស់ទារិកាលីដា ជាស្ត្រីដែលមានមាឌធំគួរសម ដែលមានទម្ងន់ជាង ៩០គីឡូក្រាម។

ជាធម្មតា ស្ត្រីដែលមានទម្ងន់ធ្ងន់បែបនេះច្រើនពិបាកក្នុងការសម្រាល ប៉ុន្តែអ្នកម្ដាយរួបនេះបែរជាកើតស្រូលទៅវិញ។ បើយោងតាមការបំភ្លឺពីអ្នកគ្រូពេទ្យចុះកម្មសិក្សានៅមន្ទីរពេទ្យបង្អែកខេត្តកំពតមួយរូបសុំមិនបញ្ចេញឈ្មោះដែលបានដឹងពីការសម្រាលនេះ បានឲ្យដឹងពីមូលហេតុដែលទារិកាខាងលើងាយស្រួលសម្រាល គឺដោយសារម្ដាយមានកម្ពស់ខ្ពស់។

"បងស្រីគាត់មានកម្ពស់ ១,៧០ ម៉ែត្រ និងមានទម្ងន់ ៩៥គីឡូ ដោយសារតែកម្ពស់ខ្ពស់នាំឲ្យអាងត្រគាកធំជាងអ្នកមានកម្ពស់ទាប ទើបធ្វើឲ្យកូនស្រួលកើត។ ម៉្យាងវិញទៀត គាត់ធ្លាប់បង្កើតកូនទី១ម្ដងរួចមកហើយ សម្រាលដោយធម្មជាតិដូចគ្នា ហើយមានទម្ងន់ ៤.៨ គីឡូក្រាម ទើបធ្វើឲ្យការសម្រាលលើកទី២នេះ មានភាពងាយស្រួលបែបនេះ។" អ្នកគ្រូពេទ្យបញ្ជាក់។

មួយវិញទៀត មុនពេលសម្រាល ១២ ថ្ងៃ ម្ដាយទារិកាបានទៅពិនិត្យសុខភាព និងថ្លឹងឃើញថាកូនមានទម្ងន់ត្រឹមតែ ជាង៥គីឡូប៉ុណ្ណោះ ដែលគាត់គិតថាអាចកើតរួច ព្រោះកូនដំបូងក៏គីឡូធ្ងន់បែបនោះដែរ តែទាល់តែកើតចេញមកមានទម្ងន់ ៦,៨គីឡូ លើសពីការស្មាន។

អ្នកគ្រូពេទ្យបន្ថែមទាក់ទងនឹងកត្តាដែលក្មេងនេះកើតមកថ្លោសខ្លាំងបែបនេះថា៖ "មិនបណ្ដាលមកពីរបបអាហាររបស់ម្ដាយទាំងស្រុងនោះទេ តែវាអាចបណ្ដាលមកពីហ្សែនរបស់ម្ដាយ ដោយសារគាត់ធ្លាប់មានកូនសុទ្ធតែធំៗបែបនេះ។ ជាក់ស្ដែងបងស្រីបរិភោគរបបអាហារត្រឹមត្រូវតាមការណែនាំ និងពិនិត្យផ្ទៃពោះទៀងទាត់"៕

អត្ថបទ៖ Pencharm