អាចកាន់ដៃមនុស្សដែលខ្លួនស្រលាញ់ដល់ទីបញ្ចប់ មានន័យបំផុតក្នុងមួយជីវិតនេះ

2018-08-18 05:00:25
ចំនួនមតិ 0 | ចំនួនចែករំលែក 0

ស្នេហាប្រៀបបានដូចជាកាដូពិសេសដែលជីវិតបានផ្តល់មកឲ្យអ្នក ហើយវាកាន់តែអស្ចារ្យ ពេលអាចជួបមនុស្សម្នាក់ដែលស្រលាញ់អ្នកខ្លាំង ស្មោះត្រង់ជាមួយអ្នក និងអាចចំណាយពេលនៅជាមួយគ្នាដោយមិនជិនណាយ។ អ្នកណាក៏ចង់បានភាពរីករាយដែរ គ្រាន់តែពេលខ្លះមិនប្រាកដក្នុងចិត្តថា តើម្នាក់នោះអាចកាន់ដៃអ្នកជារៀងរហូត ឬក៏គេអាចនឹងលែងពេលត្រូវឆ្លងកាត់ព្យុះភ្លៀង?

ពេលឈឺថ្កាត់ម្ដងៗ ហើយគ្មានអ្នកមើលថែ គ្មាននរណានៅជិតខ្លួន អ្នកនឹងមានអារម្មណ៍ថាឯកាជាទីបំផុត ទោះបីជាអ្នកមានលុយច្រើនយ៉ាងណា ក៏មិនអាចទិញស្នេហ៍ពិតបានឡើយ។ ពេលខ្លះកើតទុក្ខ យប់ឡើងខំប្រឹងបិទភ្នែក ក៏នៅតែគេងមិនលក់ ហើយនឹកស្រមៃថាជាតិនេះ មិនប៉ងអ្វីច្រើនទេ សុំត្រឹមមានអ្នកយល់ចិត្ត បារម្ភខ្វាយខ្វល់ អាចពឹងផ្អែកស្មាពេលមិនសប្បាយចិត្ត គឺគ្រប់គ្រាន់ហើយ។

មនុស្សស្រីទោះបីខាងក្រៅមើលទៅរឹងមាំប៉ុនណា ប៉ុន្តែនាងនៅតែមានបង្កប់ភាពទន់ជ្រាយនៅខាងក្នុង ហើយតែងតែត្រូវការភាពកក់ក្តៅនិងក្តីស្រលាញ់ពិតពីមនុស្សប្រុស។ មានមនុស្សមិនតិចទេ បានចូលមកក្នុងជីវិតនាង សុំក្តីស្នេហាពីនាង ប៉ុន្តែនាងមិនសម្រេចដោយងាយៗឡើយ ព្រោះនាងខ្លាចជួបមនុស្សប្រុសដែលសម្លឹងឃើញតែខ្លួនប្រាណ ហើយមិនឲ្យតម្លៃលើចិត្តគំនិត ភាពស្មោះត្រង់ដែលនាងមាន ឬខ្វះភាពតស៊ូក្នុងការដើរទៅមុខជាមួយគ្នា។

បុរសគ្រប់រូបត្រូវដឹងថា ទោះបីជាខ្លួនមានទ្រព្យសម្បត្តិ ជោគជ័យលើការងារ និងមានស្រីៗលង់ស្រលាញ់ច្រើនប៉ុនណាក៏ដោយ គូរជ្រើសរើសមើលលើនារីដែលមានលក្ខណៈចរិតឬកពារល្អ អាចនៅជាមួយអ្នក ដោយមិនបោះបង់ចោលគ្នា នៅពេលជួបទុក្ខលំបាក។

នៅទីបញ្ចប់អ្នកនឹងទទួលស្គាល់ថា អ្វីដែលសំខាន់ជាងគេនិងមានន័យបំផុតនៅក្នុងជីវិត គឺអាចកាន់ដៃមនុស្សដែលខ្លួនស្រលាញ់ ដើរលើផ្លូវរួមគ្នា រហូតដល់ដង្ហើមចុងក្រោយ ទោះបីជាត្រូវជួបឧបសគ្គអ្វីក៏ដោយ។ ទាំងអស់នេះហើយ ជាសារដ៏សំខាន់សម្រាប់គូស្នេហ៍ពិត ដើម្បីថែរក្សាគ្នាឲ្យបានយូរអង្វែង។