៦យ៉ាងពុំគួរធ្វើឡើយចំពោះសង្សារចាស់ បើមិនចង់ឲ្យខ្លួនកាន់តែអន់ និងដុនដាប

2018-08-14 09:42:48
ចំនួនមតិ 0 | ចំនួនចែករំលែក 0

បែកគ្នាទៅហើយ ប៉ុន្តែអារម្មណ៍ជាច្រើនពាក់ព័ន្ធនឹងសង្សារចាស់ នៅតែដិតជាប់ក្នុងខួរក្បាល។ ប៉ុន្តែទោះបីអ្នកនៅតែស្អប់ ឬនៅតែស្រលាញ់ប៉ុណ្ណា បើគេសម្រេចបោះបង់អ្នកចោលទៅហើយ គឺមានរឿងខ្លះដែលមិនគួរធ្វើជាមួយគេទៀតនោះទេ។ ចង់ដឹងថាមិនគួរនោះមានអ្វីខ្លះ តោះមកអានខាងក្រោមនេះជាមួយកញ្ញាតែម្ដង៖

៦. ទាមទារចំណាប់អារម្មណ៍ពីគេ

នៅពេលបែកគ្នាទៅហើយ ហើយគេគឺជាអ្នកដែលបោះបង់យើងទៅទៀតនោះ ការដែលយើងនៅទាមទារការចាប់អារម្មណ៍ពីមនុស្សបែបនេះទៀត គឺមានតែខាតលើខាតប៉ុណ្ណោះ ខាតទាំងពេលវេលា ខាតទាំងអារម្មណ៍ ព្រោះក្រៅពីគេមិនចាប់អារម្មណ៍យើងហើយ គេនឹងមានអារម្មណ៍ថាយើងគួរឲ្យរំខាន រហូតដល់ថ្នាក់ Block លេខទូរសព្ទ line និងវិធីទាក់ទងផ្សេងៗ។ យកល្អគួរចំណាយពេលមើលថែខ្លួនឯង តែងខ្លួនឲ្យស្អាត និងព្យាបាលរបួសចិត្តតែម្នាក់ឯងវិញប្រសើរជាង។

៥. ផុសតិះដៀលគេតាមបណ្ដាញសង្គម

ធ្វើបែបនេះនឹងធ្វើឲ្យអ្នកដទៃមើលមកថា យើងមិនចេះគ្រប់គ្រងអារម្មណ៍ និងបញ្ចេញរឿងខ្លួនឯងឲ្យគេដឹងជ្រុលពេក។ យកល្អ គួរនៅស្ងៀមៗ រក្សាភាពស្ងៀមស្ងាត់ ឲ្យគ្រប់យ៉ាងសាបរលាបទៅដោយខ្លួនឯងវិញប្រសើរជាង ដើម្បីបង្ហាញទៅសង្សារចាស់ថាយើងមិនបានឈឺ មិនបានសោកស្ដាយដែលបែកគ្នាពីគេនោះទេ ហើយឈ្មោះគេក៏គ្មានអ្វីសំខាន់នឹងឲ្យយើងត្រូវរំឭកទៀតដែរ។

៤. ផ្ញើសារទៅគេម្ដងហើយម្ដងទៀត សង្ឃឹមថាគេនឹងផ្ញើតបវិញ

ការដែលយើងនៅកាត់ចិត្តពីគេមិនបាន និងសម្រេចចិត្តផ្ញើសារទៅច្រើន ព្រោះសង្ឃឹមថាគេនឹងផ្ញើវិញមួយម៉ាត់ពីរនោះ គឺជាអ្វីដែលមិនគួរធ្វើសោះឡើយ ព្រោះវានឹងកាន់តែបង្ហាញយ៉ាងច្បាស់ថា យើងមិនទាន់ភ្លេចគេ ចំណែកគេត្រូវអានសាររបស់យើងទាំងធុញទ្រាន់។ មនុស្សបែកគ្នាទៅហើយ ប្រាកដជាមានអ្នកណាអាចភ្លេចមុន ហើយបើយើងជាអ្នកភ្លេចក្រោយគេ នោះក៏ត្រូវរស់នៅជាមួយខ្លួនឲ្យបាន ហើយសឹមបំភ្លេចគេតាមសម្រួល។ ខណៈពេលនេះ អាចរកមនុស្សជុំវិញខ្លួនណាម្នាក់ដែលយើងអាចនិយាយបញ្ចេញអារម្មណ៍ប្រាប់គេបាន ដោយព្យាយាមយ៉ាងណាកុំយកចិត្តខ្លួនឯងទៅគិតសង្សារចាស់ទៀត។

៣. នាំអ្នកថ្មីទៅឡកឡើយនៅមុខគេ

ទោះបីចង់ឲ្យគេឈឺចាប់ខ្លះដែលយើងកាត់ចិត្តបានលឿនជាង និងរកអ្នកថ្មីបានលឿនជាងក៏ដយ ប៉ុន្តែការដែលនាំអ្នកថ្មីទៅបញ្ឈឺមុខគេនោះ ក្រៅពីដើម្បីឲ្យស្កប់ចិត្តយើង វាក៏គ្មានផលល្អចំពោះអ្នកណាទាំងអស់ ហើយសង្សារថ្មីរបស់អ្នកនឹងគិតថាអ្នកមិនទាន់ភ្លេចសង្សារចាស់បានឡើយ ដែលធ្វើឲ្យបញ្ហារាលដាលកាន់តែធំ។

២. ធ្វើគ្រប់យ៉ាងដូចកាលមិនទាន់បែកគ្នា

នៅសុខៗក៏ទូរសព្ទទៅរកគេ ផ្ញើសារទៅរកគេ ធ្វើដូចកាលដែលនៅស្រលាញ់គ្នា។ បែបនេះអ្នកដែលឈឺចាប់ខ្លាំងបំផុតមានតែយើងនេះហើយ ព្រោះសង្សារចាស់គេបានចាប់ផ្ដើមជីវិតថ្មីទៅហើយ មានតែយើងប៉ុណ្ណោះដែលមិនអាចដើរទៅមុខបាន ព្រោះរវល់តែវិលវល់ក្នុងអតីតកាលម្នាក់ឯង។ ដូច្នេះគួរតែឈានជើងចេញពីស្នេហាចាស់នោះឲ្យដាច់ស្រលះ ហើយចាប់ផ្ដើមជួបមនុស្សថ្មីៗ ដែលថាមិនត្រូវមានមនុស្សកំពុងរង់ចាំអ្នកក្បែរៗខ្លួនអ្នកក៏ថាបាន។

១. ចង់សុំធ្វើមិត្តជាមួយគេវិញ

នៅពេលធ្វើចិត្តបានហើយ មិត្តនារីខ្លះក៏ចង់ទៅរកគេវិញក្នុងឋានៈជាមិត្តភ័ក្ដិ។ ប៉ុន្តែអ្នកត្រូវដឹងដែរថា នេះនឹងធ្វើឲ្យអ្នកឈឺចាប់ដដែលៗ នៅពេលត្រូវមកជួបគេស្និទ្ធស្នាលជាមួយអ្នកថ្មី ដោយអ្នកគ្មានសិទ្ធិប្រច័ណ្ឌខឹងអ្វីទាំងអស់។ ដូច្នេះបើអ្នកមិនអាចទ្រាំនឹងស្ថានភាពបែបនេះបាន គួរកុំធ្វើមិត្តជាមួយគេអី។

ឃើញស្រាប់ហើយថាមួយចំណុចៗខាងលើនេះគឺសុទ្ធតែជាអ្វីដែលនាំឲ្យយើងឈឺចាប់។ ផ្ទុយមកវិញ បើសិនចង់ឲ្យសង្សារចាស់អ្នកមានអារម្មណ៍សោកស្ដាយដោយសារទង្វើរបស់គេដែលធ្វើជាមួយយើង និងសោកស្ដាយដែលគេមើលមិនឃើញតម្លៃយើងនោះ យើងគួរតែធ្វើខ្លួនឲ្យស្អាត មើលថែខ្លួនឲ្យបានល្អ បំភ្លេចមនុស្សអាក្រក់ៗ និងរស់នៅឲ្យមានក្ដីសុខបំផុត ៕

ចុចអាន៖

ប្រភព៖ Spiceee ប្រែសម្រួល៖ ស្វាយ វ៉ាន់ថន