អាហារថ្លៃៗបំផុតលើពិភពលោក ៨មុខដែលអាចឲ្យអ្នកហួសចិត្ត

2018-08-13 08:42:41
ចំនួនមតិ 0 | ចំនួនចែករំលែក 0

មនុស្សភាគច្រើនគិតថា មាស ពេជ្រជារបស់ដែលថ្លៃជាងគេបំផុតហើយ ចំពោះអាហារវិញមិនអាចថ្លៃកប់ពពកនោះទេ។ ប៉ុន្តែក្រោយពីបានដឹងតម្លៃនៃអាហារទាំងនេះអ្នកច្បាស់ជាភ្លឺភ្នែកមិនខាន៖

១. ផ្សិត Matsutake

ផ្សិតប្រភេទនេះគឺកម្របំផុត ហេតុនេះហើយទើបតម្លៃវាអាចឡើងដល់ ៦០០ដុល្លារក្នុងមួយគីឡូក្រាម។ ផ្សិត Matsutake មានដើមកំណើតមកពីប្រទេសជប៉ុន ប៉ុន្តែវាក៏មាននៅក្នុងប្រទេសអាស៊ីជាច្រើនទៀតដែរ។ ចំនួននៃការកកើតផ្សិតនេះបានធ្លាក់ចុះដោយសារតែបញ្ហាសត្វល្អិត និងដើមឈើដុះកន្លែងដែលផ្សិតនេះដុះ។ គេអាចប៉ា់ន់ស្មានថាផ្សិត Matsutakeនឹងអស់នៅថ្ងៃអនាគត។

២. កាហ្វេអាចម៍សំពោច (Kupi Luwak)

កាហ្វេអាចម៍សំពោចគឺជាកាហ្វេដែលថ្លៃជាងគេបំផុតលើពិភពលោកដែលផលិតភាគច្រើននៅ ឥណ្ឌូណេស៊ី ហ្វីលីពីន និង ភាគខាងត្បូងនៃប្រទេសឥណ្ឌា។ រីឯតម្លៃវិញគឺចន្លោះពី ២៥០ដុល្លារ ទៅ១២០០ដុល្លារក្នុងមួយគីឡូក្រាម។ វាមានភាពល្បីល្បាញដោយសារតែការផលិតដ៏ចម្លែក និងរសជាតិឆ្ងាញ់បំផុត។

៣. ពងត្រី White Pearl Albino Caviar

ក្នុងមួយគីឡូក្រាមវាមានតម្លៃ ៨៥០០អឺរ៉ូ (ប្រមាណ៩១០០ដុល្លារ)។ ត្រី Albino Sturgeon គឺជាប្រភេទត្រីដែលរស់នៅក្នុង សមុទ្រ Caspian។ តម្លៃដ៏ថ្លៃនេះមកពីភាពកម្ររបស់ត្រីនេះព្រោះវាមិនងាយបន្តពូជនោះទេទាល់តែប្រមាណជា១០០ឆ្នាំទើបមាន។

៤. ស៊ុបសំបុកត្រចៀកកាំ Swallow

ដូចដែលអ្នកបានដឹងហើយថាសត្វប្រភេទនេះយកទឹកមាត់ធ្វើជាសំបុករបស់វាដោយមិនប្រើធាតុផ្សំអ្វីទាំងអស់។ ថ្មីៗនេះសំបុកវាក្លាយជាអាហារដ៏ពេញនិយមនិងមានតម្លៃពីសំណាក់ជនជាតិចិន។ ហេតុផលដែលធ្វើឱ្យអាហារប្រភេទនេះមានតម្លៃថ្លៃគឺដោយសារតែការប្រមូលសំបុកត្រចៀកកាំ Swallow មានភាពលំបាកខ្លាំង។ វាសង់សំបុកនៅច្រាំងថ្មខ្ពស់ៗ ដែលមានគ្រោះថ្នាក់សម្រាប់អ្នកប្រមូល។ វាមានតម្លៃប្រមាណ ៣០០០ដុល្លារក្នុងមួយគីឡូ។

៥. លំអងផ្កា (Saffron)

តម្លៃរបស់វាអាស្រ័យទៅតាមរដូវកាលតែជាធម្មតាគឺ ចាប់ពី៤០០ទៅ១០០០ដុល្លារក្នុងមួយគីឡូក្រាម ក៏ព្រោះតែផ្កានេះរីកតែ៧ថ្ងៃក្នុងមួយឆ្នាំនៅរដូវស្លឹកឈើជ្រុះហើយត្រូវបេះវាដោយដៃ។ លំអងផ្កាមួយគីឡូត្រូវបេះជាង៣០ម៉ឺនផ្កា។

៦.មាន់ខ្មៅ Ayam Cemani

មាន់ខ្មៅ Ayam Cemani ត្រូវបានបង្កាត់ពូជនៅឥណ្ឌូណេស៊ី ហើយវាមិនអាចនាំចេញទៅប្រទេសដទៃបានទេដោយខ្លាចជំងឺផ្ដាសាយបក្សី។ បក្សីនេះមានតម្លៃរហូតដល់ទៅ២០០ដុល្លារក្នុងមួយក្បាលនៅឥណ្ឌូណេស៊ីហើយកើនដល់រាប់ពាន់ដុល្លារនៅប្រទេសផ្សេងទៀត។

៧. សាច់គោជប៉ុន Wagyu

សាច់គោនេះមានតម្លៃក្នុងមួយគីឡូប្រមាណជា៤៥០ដុល្លារ។ វាជាសាច់គោជប៉ុនដែលមានរសជាតិឆ្ងាញ់ជាគេបំផុតនិងថ្លៃជាងគេបំផុតដែរ។ នៅជប៉ុន សត្វគោបរិសុទ្ធ Wagyu មុននឹងកាប់សាច់ត្រូវម៉ាស្សា ផឹកស្រាបៀរ និងលេងភ្លេងឱ្យវាស្តាប់។

៨. ឈីសធ្វើពីទឹកដោះក្តាន់

វាជាឈីសដែលថ្លៃជាងគេបំផុតហើយក៏ព្រោះតែការផលិតមានតែមួយកន្លែងទេនៅលើពិភពលោកគឺនៅប្រទេសស្វីស។ ចំណែកឯការផលិតក៏មានចំនួនកំណត់ដែរ ហើយតម្លៃគឺ ១០០០អឺរ៉ូ ក្នុងមួយគីឡូ៕