ភើច្រើន មិនត្រឹមតែគួរឲ្យខ្មាស ប៉ុន្តែជាសញ្ញានៃជំងឺធ្ងន់ធ្ងរជាច្រើន
- 2018-08-11 06:52:00
- ចំនួនមតិ 0 | ចំនួនចែករំលែក 0
ភើច្រើន មិនត្រឹមតែគួរឲ្យខ្មាស ប៉ុន្តែជាសញ្ញានៃជំងឺធ្ងន់ធ្ងរជាច្រើន
មនុស្សម្នាក់ៗមានការយល់ឃើញចំពោះការ ភើ ខុសៗគ្នា។ អ្នកខ្លះគិតថាវាជារឿងធម្មជាតិដែលរាងកាយត្រូវបញ្ចេញខ្យល់ចេញមក ដើម្បីជួយកុំឲ្យណែនពោះពិបាក ហើយជាសញ្ញាបង្ហាញថាប្រព័ន្ធរំលាយអាហារនៅធ្វើការល្អ។ ប៉ុន្តែសម្រាប់អ្នកខ្លះទៀត ក៏ចាត់ទុកថាជាការគ្មានសុជីវធម៌ និងគួរឲ្យខ្មាស ដោយសារមានទាំងសំឡេង និងក្លិនមិនល្អ។ ប៉ុន្តែអ្វីដែលកញ្ញាចង់យកមកចែករំលែកនៅថ្ងៃនេះ មិនមែនគ្រាន់តែជារឿងដែលគួរឲ្យខ្មាស ឬក៏អត់នោះទេ ព្រោះពេលខ្លះការភើក៏អាចជាសញ្ញាប្រាប់ថាសុខភាពរបស់យើងមានអ្វីខុសប្រក្រតីផងដែរ។ ចង់ដឹងថាការភើញឹកញាប់អាចជាសញ្ញានៃជំងឺអ្វីខ្លះ សូមតាមដានខាងក្រោមនេះទាំងអស់គ្នា៖
១. ភើញឹកញាប់ខុសធម្មតា
បើអ្នកមានអាការភើលើសពី ៣ដងក្នុងមួយថ្ងៃ និងបន្តបែបហ្នឹងដល់មួយសប្ដាហ៍ នោះអាចជាសញ្ញាប្រាប់ថាអ្នកខ្យល់ក្នុងពោះច្រើនពេក ដែលច្រើនធ្វើឲ្យកើតមានការភើចេញមកម្ដងច្រើនៗ។ ការភើបែបនេះមិនគ្រោះថ្នាក់ដល់សុខភាពខ្លាំងនោះទេ ប៉ុន្តែអ្នកគួរសង្កេតមើលថា មានអាការផ្សេងៗមកជាមួយគ្នាដែរឬក៏អត់។
២. ហើមពោះ
នៅពេលអ្នកភើដោយមានអារម្មណ៍មិនស្រួលក្នុងខ្លួនព្រោះមានខ្យល់ក្នុងពោះច្រើនខ្លាំងពេក នោះអាចជាអាការហើមពោះ រលាកក្នុងពោះវៀន ឬសម្រាប់អ្នកដែលអាឡែស៊ីជាមួយទឹកដោះគោ បើមានអាការហើមពោះនិងក្អួតចង្អោរ ត្រូវប្រញាប់ទៅជួបពេទ្យដើម្បីព្យាបាលទើបបាន។
៣. អាស៊ីតច្រាលបញ្ច្រាស
បើក្រោយញ៉ាំបាយហើយ អ្នកភើចេញមក ហើយមានអាការក្រហាយក្ដៅត្រង់បំពង់ក ឬនៅទ្រូង នោះប្រាកដណាស់ថាអ្នកមានជំងឺអាស៊ីតច្រាលបញ្ច្រាស។ មនុស្សជាច្រើនអាចគិតថា វាមិនអី ប៉ុន្តែការពិត បើទុកមិនព្យាបាលបែបនេះ វានឹងវិវត្តទៅជាជំងឺធ្ងន់ៗផ្សេងទៀត បំពង់អាហារត្រូវមានបញ្ហាដោយសារអាស៊ីតពីក្នុងក្រពះ ហើយធ្ងន់ធ្ងរជាងនេះទៀតគឺមហារីក។
៤. ស្រកគីឡូ
កុំគិតថាការដែលទម្ងន់ខ្លួនរបស់អ្នកស្រកគឺជារឿងល្អ ព្រោះវាអាចបណ្ដាលមកពីបញ្ហាសុខភាព។ ការភើច្រើនខុសធម្មតាអាចបណ្ដាលមកពីការអាឡែស៊ីអាហារ ឬកាន់តែធ្ងន់ធ្ងរជាងនេះគឺមហារីកពោះវៀន។
៥. បញ្ហាការបញ្ចេញចោល
បើអ្នកមានអាការភើញឹកញាប់ រួមទាំងដើរខ្យល់ខុសធម្មតា និងមានបញ្ហារាករូសញឹកញាប់ នោះគឺជារោគសញ្ញារបស់អ្នកដែលអាឡែស៊ីជាស្ករ Lactose ឬអាហារប្រភេទមួយចំនួន រួមទាំងជាសញ្ញានៃជំងឺពោះវៀនដូចគ្នាដែរ។
៦. ឈឺពោះម្ដុំបរិវេណឆ្អឹងជំនី
នេះគឺជាអាការគួរឲ្យខ្លាចមួយទៀត បើអ្នកមានអាការភើ រួមជាមួយអាការឈឺចាប់នៅបរិវេណឆ្អឹងជំនី ឬពោះនោះអាចជារោគសញ្ញានៃជំងឺក្លន (Hernia) ដែលមិនគួរទុកយូរ ព្រោះវាអាចនាំឲ្យឆ្លងមេរោគតាមលំហូរឈាម ដែលនាំឲ្យគ្រោះថ្នាក់ដល់ជីវិត។
៧. ក្អួតចង្អោរ
បើក្រៅពីភើហើយ អ្នកមានអាការក្អួតចង្អោរខ្លាំងញឹកញាប់ សូមកុំទុកយូរ ព្រោះវាអាចជាសញ្ញាមិនប្រក្រតីនៃពោះវៀនដូចជា មានអ្វីរាំងស្ទះក្នុងពោះវៀន រលាកពោះវៀន ឆ្លងមេរោគក្នុងពោះវៀន និងធ្ងន់ធ្ងរបំផុតគឺមហារីកពោះវៀន។
សុខភាពល្អមិនមានដាក់លក់លើទីផ្សារនោះទេ បើយើងចង់បានគឺត្រូវតែថែរក្សាដោយខ្លួនឯង ដូច្នេះសូមកុំព្រងើយកន្តើយនឹងអាការផ្សេងៗនៃរាងកាយ ព្រោះវាអាចជាការឲ្យសញ្ញាគ្រោះថ្នាក់ឲ្យអ្នកដឹងមុន ៕