មនុស្សប្រុស ៥ប្រភេទដែលមានតែក្នុងរឿងភាគ កម្រមានក្នុងជីវិតពិត

2018-08-09 10:29:12
ចំនួនមតិ 0 | ចំនួនចែករំលែក 0

ប្រហែលមានមនុស្សស្រីជាច្រើនតែងស្រមៃថាខ្លួនឯងជាតួឯកស្រី ហើយបានជួបតួឯកប្រុស រហូតមិនអាចទទួលអ្នកណាបានដោយសារតែក្នុងជីវិតពិតនាងមិនអាចជួបមនុស្សប្រុសប្រភេទនោះ។ គេតែងនិយាយថាមនុស្សប្រុសល្អបែបនោះមានតែនៅក្នុងកុនទេ តែតថភាពពិតវាមិនអាចឡើយ។ ខាងក្រោមនេះជាប្រភេទមនុស្សប្រុសដែលមានតែក្នុងរឿងប៉ុណ្ណោះ បើក្នុងជីវិតជាក់ស្ដែងវិញគឺកម្រណាស់៖

១. ស្ងប់ស្ងាត់ខាងក្រៅ តែខាងក្នុងស្រឡាញ់ខ្លាំង

ភាគច្រើននៅក្នុងរឿងតួប្រុសគឺមានចរិតបែបនេះ ខាងក្រៅគឺមិនសូវជារវីរវល់នឹងតួស្រីទេ តែការពិតគេលួចធ្វើរឿងជាច្រើនដើម្បីតួស្រី ហើយខាងក្នុងវិញគឺស្រឡាញ់តួស្រីខ្លាំង។ ចំណែកក្នុងជីវិតពិតវិញតើមានមនុស្សប្រុសបែបនេះប៉ុន្មាននាក់ទៅ? បើគេមានចរិតស្ងប់ស្ងាត់វិញ គឺស្ងប់ស្ងាត់ហួស ស្ងប់ស្ងាត់ដល់ទុកមនុស្សស្រីចោល ស្ងប់ស្ងាត់រហូតលែងរវល់នឹងនាង លែងខ្វល់ខ្វាយទាំងអស់។ ពាក្យសម្ដីក៏ស្ងាត់ទង្វើក៏ស្ងាត់ និយាយឲ្យស្រួលស្ដាប់សោះកក្រោះទាំងក្នុងទាំងក្រៅ។

រូបតំណាង

**២. នៅតែស្រឡាញ់តួស្រីទោះបែកគ្នា ១០ឆ្នាំក៏ដោយ**

រឿងដែលមិនអាចកើតឡើងក្នុងជីវិតពិត កុំថាឡើយ ១០ឆ្នាំ ៥ឆ្នាំក៏សឹងតែមិនអាចទៅរួចដែរ។ វាមានតែនៅក្នុងរឿងតែប៉ុណ្ណោះដែលមានមនុស្សប្រុសម្នាក់នៅតែស្រឡាញ់មនុស្សស្រីម្នាក់មិនប្រែ និងរង់ចាំនាងនោះ។ និយាយតាមត្រង់ទៅចុះ ប្រហែលបែកគ្នាតែ ៣ខែ ឬកន្លះឆ្នាំហ្នឹងមានស្រីថ្មីបាត់ទៅហើយ។

៣. ចេញមុខការពារតួស្រីគ្រប់ពេល ហើយមិនដែលធ្វើឲ្យនាងឈឺចាប់

ប្រហែលមានតែតួប្រុសក្នុងរឿងប៉ុណ្ណោះដែលសុខចិត្តលះបង់ខ្លួនឯងការពារមនុស្សស្រីដែលស្រឡាញ់នោះ។ គេមិនខ្លាចនឹងបញ្ហា អ្វីដែលសំខាន់អាចឲ្យនាងមានសុវត្ថិភាព ទោះបីពេលខ្លះខ្លួនឯងត្រូវលំបាកប៉ុណ្ណាក៏ដោយ។ សម្រាប់ក្នុងជីវិតជាក់ស្ដែង មនុស្សប្រុសតិចណាស់ដែលអាចធ្វើបែបនេះបាន ព្រោះប្រហែលពេលមានបញ្ហាអីកើតឡើង គេអាចគិតពីអារម្មណ៍ខ្លួនគេច្រើនជាង ឬពេលខ្លះទុកនាងចោល ហើយដើរចេញក៏ថាបាន។ លើសពីនេះ តើមានមនុស្សប្រុសប៉ុន្មាននាក់ទៅដែលមិនធ្លាប់ធ្វើឲ្យមនុស្សស្រីឈឺចាប់សោះ ប្រហែលធ្វើឲ្យនាងទឹកភ្នែករាល់យប់ក៏មិនដឹង។

រូបតំណាង

៤. ស្រឡាញ់នាង ស្មោះត្រង់នឹងនាងគ្រប់កាលៈទេសៈ

បើចៃដន្យនាងត្រូវខូចសម្រស់ បើចៃដន្យនាងត្រូវពិការភ្នែក បើចៃដន្យនាងពិការដៃ ឬជើង នៅក្នុងរឿងតួប្រុសនឹងមិនទៅណាចោលនាងទេ ហើយមើលថែនាងគ្រប់ពេលទៀតផង។ ដោយឡែកតើក្នុងស្ថានភាពជាក់ស្ដែងតើមានទេ មានមនុស្សប្រុសសុខចិត្តចំណាយពេលមួយជីវិតរបស់ខ្លួននៅជាមួយមនុស្សស្រីដែលមិនស្អាត ដែលមើលមិនឃើញ ដែលដើរមិនរួច ឬមានជំងឺអីមួយទេ? ប្រហែលកម្រណាស់ ព្រោះពេលខ្លះគេក៏មិនអាចយកពាក្យស្រឡាញ់ដាក់មុខហើយបំផ្លាញជិវិតដែលនៅសល់នោះទេ។

៥. បដិសេធន៍មនុស្សស្រីផ្សេងទៀតជាច្រើន ដើម្បីតែមនុស្សស្រីដ៏សាមញ្ញម្នាក់

បើនៅក្នុងរឿងវិញទោះមានស្រីផ្សេងស្អាតប៉ុណ្ណា មានប៉ុណ្ណា ឬក៏ឲ្យដៃប៉ុណ្ណា ក៏តួប្រុសមិនចាប់អារម្មណ៍ដែរ គឺសុខចិត្តតាមស្រឡាញ់តួស្រី និងមានតែតួស្រីម្នាក់ក្នុងចិត្ត។ ចំណែកក្នុងជីវិតពិតវិញប្រហែលគ្មានមនុស្សប្រុសច្រើននោះទេដែលអាចតស៊ូតាមស្រឡាញ់តួស្រីដ៏សាមញ្ញម្នាក់នោះ ដោយមិនរវល់ជាមួយអ្នកផ្សេង។ ប្រហែលបើមានស្រីណាម្នាក់មកក្បែរហ្នឹង ទៅងប់ងុលជាមួយគេបាត់ហើយ។