វិធីសងសឹកដ៏ថ្លៃថ្នូរសម្រាប់មនុស្សស្រី ពេលដឹងថាសង្សារ ឬប្ដីក្បត់ចិត្ត

2018-08-04 07:13:18
ចំនួនមតិ 0 | ចំនួនចែករំលែក 0

ហេតុអីត្រូវអង្គុយយំ ឬទៅតាមអង្វរគេ ពេលគេដាច់ចិត្តទៅមានថ្មី? មនុស្សស្រីសម័យនេះមិនគួរធ្វើខ្លួនឱ្យទន់ខ្សោយក្នុងរឿងស្នេហាទៀតទេ។ បើអ្នកកំពុងស្ថិតក្នុងកាលៈទេសៈដែលត្រូវគេក្បត់ចិត្ត ឬដើម្បីត្រៀមខ្លួននៅពេលណាមួយ គួរតែធ្វើរឿងទាំងនេះ ដើម្បីជាការសងសឹកឱ្យគេដេកស្ដាយក្រោយ និងរក្សាតម្លៃខ្លួនមិនឱ្យគេមើលងាយបាន។

ស្វែងយល់ពីសត្រូវថ្មីនោះសិន

សម្រាប់មនុស្សស្រីថ្មីដែលសង្សារ ឬប្ដីអ្នកកំពុងបែកចិត្តពីអ្នកទៅទាក់ទងនោះ អ្នកគួរតែស្វែងយល់ព័ត៌មានសំខាន់ៗខ្លះពីនាង។ គោលបំណងនៅទីនេះគឺ ដើម្បីដឹងច្បាស់ថាត្រូវប្រឈមមុខបែបណា ពេលបានជួបពួកគេនៅទីសាធារណៈ។ កុំធ្វើខ្លួនជាមនុស្សអវិជ្ជមាន ឬឱ្យគេឃើញពីចំណុចខ្សោយយើង បើជួបមុខគ្នា អ្នកត្រូវញញឹមឱ្យគេមើល ទើបគេដឹងថាអ្នកមិនបានស្ដាយក្រោយ ឬចង់បានមនុស្សក្បត់នោះមកវិញឡើយ។

ស្រលាញ់ខ្លួនឯង និងបង្ហាញឱ្យគេឃើញថាអ្នកមានក្ដីសុខ

ពេលកំពុងស្រលាញ់គ្នា ស្រីៗច្រើនតែឱ្យអាទិភាពស្នេហា និងមនុស្សជាទីស្រលាញ់មុនគេបង្អស់។ តែក្រោយពេលត្រូវគេក្បត់ចិត្ត ទើបពួកគេភ្ញាក់ខ្លួន និងស្គាល់ពីខ្លួនឯងច្បាស់ជាងមុន។ ដូច្នេះអ្វីដែលមនុស្សស្រីត្រូវធ្វើគឺឱ្យគេគិតខុស កុំឱ្យគេមោទនភាពថា អ្នកនឹងយំ ដេកស្ដាយគេ ញ៉ាំមិនបាន គេងក៏មិនលក់ ស្រមៃចង់ទាមទារគេត្រលប់ទៅវិញ។ ផ្ទុយទៅវិញ ត្រូវផ្ដល់ការស្រលាញ់ដល់ខ្លួនឯងឱ្យបានច្រើន និងបង្ហាញឱ្យគេឃើញថា គ្មានគេក៏យើងមិនស្លាប់។

ធ្វើខ្លួនជាមនុស្សរឹងមាំ មិន Drama

អ្នកណាក៏ចេះខូចចិត្ត ពេលត្រូវគេក្បត់ដែរ ប៉ុន្តែកុំបង្ហាញឱ្យគេឃើញឱ្យសោះ។ អ្នកមានសិទ្ធិនឹងយំ ឬខូចចិត្តមួយរយៈ តែលើបណ្ដាញសង្គម ហាមដាច់ខាតយករឿងផ្ទាល់ខ្លួន និងអារម្មណ៍ខ្លួនឯងមក Drama។ មួយវិញទៀត កុំទៅចំណាយពេលផុស Status ដៀមដាម ឬជេរប្រទេចមនុស្សក្បត់នោះជាសាធារណៈអី។ និយាយរួម បើជ្រុលជាដាច់គ្នា ឬគេធ្វើឱ្យឆ្អែតចិត្តហើយ ឈប់យករូបគេមកដាក់ក្នុងខួរក្បាលទៀតគឺចប់ទៅហើយ។

ខ្លាចអីនឹងសាកទាក់ទងអ្នកផ្សេង

ដូចនិយាយខាងលើអ៊ីចឹង អ្នកណាក៏ឈឺដែរ ពេលត្រូវគេក្បត់ តែកុំយកទស្សនៈត្រីស្អុយមួយស្អុយម៉ាកន្ត្រកឱ្យសោះ ព្រោះមនុស្សម្នាក់ៗតែងតែខុសគ្នា។ កុំឱ្យបទពិសោធន៍នេះមកឃុំអ្នកលែងចង់មានស្នេហា ឬមើលមនុស្សប្រុសក្នុងផ្លូវអាក្រក់ទាំងអស់អី។ អ្នកអាចមានសិទ្ធិទាក់ទងអ្នកថ្មី តែត្រូវមើលឱ្យបានច្បាស់ជាមុនសិន។ ម្យ៉ាងទៀត កុំយកវិធីយកអ្នកថ្មីមកបញ្ឈឺអ្នកចាស់ ដោយមិនបានពិនិត្យច្បាស់លាស់ ព្រោះវាមានតែធ្វើឱ្យអ្នកឈឺជាងមុន៕

ចុចអាន៖ គេចង់បែកទៅហើយ តើយើងអាចឃាត់គេយ៉ាងម៉េចទៅ? មានតែបែរខ្នងដើរចេញ

អត្ថបទ៖ សរ សុគន្ធី