ចង់ស្លៀកពាក់ឃើញស្អាត ស្រីៗគួរដឹងវិធីរើសអាវទ្រនាប់ឱ្យត្រូវទម្រង់ដើមទ្រូង
- 2018-08-04 00:32:00
- ចំនួនមតិ 0 | ចំនួនចែករំលែក 0
ចង់ស្លៀកពាក់ឃើញស្អាត ស្រីៗគួរដឹងវិធីរើសអាវទ្រនាប់ឱ្យត្រូវទម្រង់ដើមទ្រូង
គ្នាយើងមានធ្លាប់ឆ្ងល់អត់ថា ពេលខ្លះទិញអាវទ្រនាប់មកពាក់ តែវាហាក់មិនជួយឱ្យឃើញដើមទ្រូងស្អាត ឬអាវខ្លះធ្វើឱ្យឃើញហើបៗ ខ្លះទៀតតឹងពេក ខ្លះទៀតពាក់ទៅឃើញស្នាមអាវតែម្ដង? នេះមិនមែនមកពីអាវទ្រនាប់នោះគុណភាពអន់នោះទេ តែគឺមកពីអ្នករើសវាមិនសមនឹងទម្រង់ដើមទ្រូង ឬសុដន់របស់អ្នក។
ដើម្បីកែប្រែបញ្ហានេះ កញ្ញា នឹងប្រាប់គន្លឹះក្នុងការជ្រើសរើសអាវទ្រនាប់ឱ្យសក្ដិសមនឹងដើមទ្រូង ទើបជួយឱ្យមើលឃើញដើមទ្រូងទាក់ទាញ និងសិចស៊ី។ ដំបូងយើងត្រូវដឹងថា ដើមទ្រូងនារីបែងចែកជា៦ប្រភេទ ដូចខាងក្រោម៖
ប្រភេទទី១
សុដន់ទាំងពីរញែកទៅខាងតែមិនសូវមានសាច់ពេញនៅត្រង់គល់ ឬដើមទ្រូងឡើយ។ ចំណែកអាវទ្រនាប់ដែលសក្ដិសមសម្រាប់ដើមទ្រូងប្រភេទនេះគឺ អាវដែលមានប៉ុងក្ដោប តែត្រឹមពាក់កណ្ដាល ឬមិនពេញដើមទ្រូង (ដូចរូប)។
ប្រភេទទី២
សុដន់ប្រភេទនេះស្រដៀងទី១ដែរគឺញែកចេញទៅចំហៀងៗ គ្រាន់តែមានសាច់ពេញនៅដើមទ្រូងជាង។ បើអ្នកមានសុដន់ប្រភេទនេះគួរជ្រើសរើសអាវទ្រនាប់ដែលមានប៉ុងក្ដោប តែមានស្បៃ ឬក្រណាត់បន្ថែមនៅខាងលើដើម្បីក្ដោបសាច់សុដន់ខាងលើកុំឱ្យហៀរចេញក្រៅ។
ប្រភេទទី៣
សុដន់ដែលមានរាងតូចពីខាងលើ តែធំនៅខាងក្រោម។ អ្នកគួរជ្រើសរើសអាវទ្រនាប់ដែលមានក្រណាត់ ឬប៉ុងពេញដើម្បីទប់សាច់ដើមទ្រូង និងលើកសុដន់ឱ្យឡើងក្លំស្មើគ្នា។ ប៉ុន្តែបើអ្នកប្រើអាវទ្រនាប់ប្រភេទទី១ អ្នកនឹងឃើញសាច់ខាងលើចំហ ធ្វើឱ្យឃើញស្នាមអាវទ្រនាប់ ពេលពាក់អាវ ឬរ៉ូបពីលើ។
ប្រភេទទី៤
ជាប្រភេទសុដន់ដែលធំស្មើតាំងពីលើមក ហើយទំហំក៏មិនខុសគ្នាប៉ុន្មានរវាងសុដន់ម្ខាងៗ។ ដោយសារតែដើមទ្រូងប្រភេទនេះមិនសូវត្រូវការការកល់ ឬរឹបអ្វីបន្ថែម អ្នកអាចប្រើអាវទ្រនាប់ដែលស្ដើង ឬមិនមានប៉ុងកល់ ហើយមិនបាច់គ្របពេញដើមទ្រូងក៏បាន។
ប្រភេទទី៥
ជាប្រភេទនារីដែលមានសុដន់តូច ហើយវែង។ អ្នកគួរជ្រើសរើសប្រភេទអាវទ្រនាប់ដូចប្រភេទទី២ គឺមានប៉ុងក្ដោប តែមានស្បៃ ឬបង្ហៀរឡើងដល់លើដើម្បីជួយទប់ និងលើកដើមទ្រូងបានស្អាត។ ក្រៅពីនេះ អ្នកក៏គួរជ្រើសរើសប្រភេទអាវដែលមានបន្ទះខ្នងពីក្រោយ។
ប្រភេទទី៦
អ្នកមានដើមទ្រូងដែលស្រស់ស្អាត គឺសុដន់ពេញ មិនធ្លាក់ ក៏មិនញែកទៅខាងៗ។ បើអ្នកមានដើមទ្រូងបែបនេះ អាចជ្រើសរើសអាវទ្រនាប់ណាក៏បាន តាមការស្រលាញ់ចូលចិត្ត៕
ចុចអាន៖ អាវទ្រនាប់ ៩ ប្រភេទជាតម្រូវការចាំបាច់ ហើយស្ត្រីគ្រប់រូបគួរតែដឹងពីការប្រើប្រាស់ផងដែរ!