រឿងពិតពីអ្នកអាន៖ ខ្ញុំមិនហ៊ានរៀបការ ព្រោះឃើញគំរូប៉ារបស់ខ្ញុំ

2018-07-18 04:22:47
ចំនួនមតិ 0 | ចំនួនចែករំលែក 0

កញ្ញា បានជួបប្អូនស្រីម្នាក់ ហើយនាងបានរៀបរាប់រឿងរ៉ាវពីជីវិតគ្រួសារនាងប្រាប់ក្រុមការងារយើង ដោយសុំមិនបញ្ចេញឈ្មោះ ថាមូលហេតុដែលនាងមិនហ៊ានដាក់ចិត្តលើបុរសណាម្នាក់ ក៏ដោយសារតែទង្វើប៉ារបស់នាងធ្វើដាក់គ្រួសារ។ ប្អូនស្រីបានរៀបរាប់ថា៖

“ខ្ញុំអាយុ២៧ឆ្នាំហើយបង! ខ្ញុំនៅចាំបានថា កាលនៅតូចប៉ារបស់ខ្ញុំចូលចិត្តផឹកស្រា។ គាត់ស្រវឹងរាល់ថ្ងៃ ហើយស្រែកជេរប្រទេចម៉ាក់ខ្ញុំ និងអ្នកជិតខាង។ ពេលណាគាត់យ៉ុងចិត្ត ឬមិនសប្បាយចិត្តរឿងអីមួយ គាត់តែងវាយម៉ាក់ខ្ញុំ ជួនកាលរាលដាលដល់ពួកខ្ញុំទៀត។ បើនិយាយពីចានឆ្នាំងមិនដឹងបែកអស់ប៉ុន្មានហើយទេ ហើយម៉ាក់រកលុយទិញថ្មីក៏មិនដឹងអស់ប៉ុន្មានដែរ។ មានពេលខ្លះបាយក្នុងចានខ្ទាតប្រឡាក់ពេញដីក៏មាន។ ហើយមានពេលខ្លះទៀត ម៉ាក់និងពួកខ្ញុំត្រូវរត់ចេញក្រៅផ្ទះ ទៅនៅផ្ទះអ្នកជិតខាងមួយយប់ក៏មាន ទម្រាំហ៊ានចូលក្នុងផ្ទះវិញ។

រូបតំណាង

ម៉ាក់ខ្ញុំតែងលាក់រឿងនេះពីគ្រួសារ ជាពិសេសពីលោកយាយខ្ញុំ ព្រោះគាត់មិនចង់ឱ្យយាយតាបារម្ភ ហើយម៉ាក់ក៏មិនចង់បង្ករឿងក្នុងគ្រួសារដែរ។ ខ្ញុំមានប្អូនប្រុសម្នាក់ កាលនោះគេអាយុ១៨ឆ្នាំ គេបានចូលបម្រើការនៅផ្នែកយោធា តែគេនៅតែគិតដល់ម៉ាក់ ហើយមិនអាចទ្រាំមើលប៉ាវាយម៉ាក់តទៀតទេ។ គេតែងប្រតាយប្រតប់ជាមួយប៉ា ដើម្បីការពារម៉ាក់។ ទោះជាយ៉ាងណា ម៉ាក់របស់ខ្ញុំបានស្លាប់ទៅហើយ គឺស្លាប់ទាំងរស់ដែលទ្រាំរស់នៅជាមួយប៉ាក្នុងស្ថានភាពបែបនេះ។

រូបតំណាង

ពេលខ្ញុំរៀនដល់ឆ្នាំទី១ ម៉ាក់ក៏សម្រេចចិត្តលែងលះជាមួយប៉ា ហើយប៉ាក៏យកទ្រព្យសម្បត្តិទៅ ឯម៉ាក់បានពួកខ្ញុំ២នាក់ត្រលប់ទៅផ្ទះវិញ។ ប៉ុន្មានខែក្រោយមក ខ្ញុំឮដំណឹងថា ប៉ាយកប្រពន្ធក្រោយ។ ខ្ញុំមិនយល់សោះ ហេតុអីប៉ាប្រញាប់រៀបការប្រពន្ធថ្មីបែបនេះ។ ប៉ុន្តែខ្ញុំបានប្រាប់ខ្លួនឯងថា មិនបាច់ខ្វល់ច្រើនពីរឿងដែលមិនសំខាន់សម្រាប់ជីវិតខ្ញុំពេលនេះឡើយ។

ប៉ាបានផ្លាស់ប្ដូរច្រើន ប្រពន្ធក្រោយរបស់គាត់បានបង្កើតកូន២នាក់ ប៉ុន្តែគ្រប់យ៉ាងមិនដូចមុនទេ។ ប៉ាលែងផឹកស្រាអួទីនួដូចមុន មិនវាយធ្វើបាបប្រពន្ធកូនដូចជាមួយពួកខ្ញុំ ជួយរកស៊ីចិញ្ចឹមគ្រួសារ ហើយអ្នកណាៗក៏ស្រលាញ់រាប់អានគាត់។

សម្រាប់ខ្ញុំ អតីតកាលរបស់ប៉ាមិនបានធ្វើឱ្យខ្ញុំនឹកនា ឬស្ដាយស្រណោះអ្វីឡើយ ដោយសារតាំងពីចាប់ដៃគ្នាជាមួយម៉ាក់ រហូតដល់លែងលះគ្នា ពួកយើងហាក់នៅឆ្ងាយពីគ្នាដូចមេឃនិងដី ប៉ាក៏មិនជាប់កាតព្វកិច្ចចិញ្ចឹមពួកខ្ញុំទៀតដែរ មិនដែលបានផ្ដល់ប្រាក់ផ្គត់ផ្គង់ការសិក្សាពួកខ្ញុំ ហើយគាត់ក៏មិនដែលមកលេងពួកយើងសូម្បីម្ដង។

រូបតំណាង

វាកើតឡើងយូរមកហើយដែរ ពេលនេះខ្ញុំអាយុ២៧ឆ្នាំហើយ តែខ្ញុំនៅមិនទាន់មានសង្សារនៅឡើយ។ ខ្ញុំមិនដែលចូលជិតបុរសណាដែលផឹកស្រា ទោះបីពេលមិត្តភក្ដិខ្ញុំជុំគ្នា ឬមានពិធីជប់លៀង ហើយគេផឹកស៊ីសប្បាយក៏ដោយ។ ខ្ញុំចេះតែខ្លាចថា បុរសគ្រប់គ្នាគឺដូចប៉ា ទើបខ្ញុំមិនហ៊ានដាក់ចិត្តស្រលាញ់អ្នកណាឡើយ។ ខ្ញុំខ្លាចខ្ញុំត្រូវរងទុក្ខវេទនាដូចម៉ាក់ទៀត ខ្ញុំមិនចង់ឃើញកូនខ្ញុំទៅថ្ងៃក្រោយរងសម្ពាធ ឬភាពភ័យខ្លាចដូចខ្ញុំពីក្មេងទេ ទោះបីពេលនេះប៉ាបានកែប្រែ ធ្វើជាឪពុកល្អសម្រាប់កូនៗប្រពន្ធក្រោយរបស់គាត់ក៏ដោយ។

តើខ្ញុំគិតបែបនេះខុសទេ? ហើយតើធ្វើយ៉ាងណាដើម្បីបំភ្លេចស្រមោលដ៏ខ្មៅកខ្វក់នេះបាន?"

ចុចអាន៖ មនុស្សស្រីហ៊ានយកបុរស ៧ប្រភេទនេះធ្វើប្ដី ដូចហ៊ានឱបទុក្ខមួយជីវិត

អត្ថបទ៖ សរ សុគន្ធី