មេរៀនក្រៅសាលា ៥ ដែលមនុស្សស្រីរឹងមាំម្នាក់ត្រូវចាំក្រោយរៀបការ
- 2018-07-16 06:22:22
- ចំនួនមតិ 0 | ចំនួនចែករំលែក 0
មេរៀនក្រៅសាលា ៥ ដែលមនុស្សស្រីរឹងមាំម្នាក់ត្រូវចាំក្រោយរៀបការ
ជីវិតមនុស្សស្រីក្រោយរៀបការមិនមែនងាយស្រួលដូចដែលមនុស្សជាច្រើនគិតនោះទេ។ អ្នកអាចនឹងធ្លាប់ត្រូវបានគេប្រាប់ថា បើរកបានប្ដីពូកែរកលុយម្នាក់ អ្នកនឹងមានជីវិតរស់នៅស្រួលមិនបាច់គិតច្រើន ឬមិនបាច់ខំប្រឹងរៀនសូត្រ ធ្វើការខ្ពង់ខ្ពស់ពេកទេ ព្រោះការហើយត្រូវនៅផ្ទះមើលកូនដដែល -ល-។ ប៉ុន្តែអ្នកពិតជាចង់បានជីវិតបែបនេះមែន? ខាងក្រោមនេះ កញ្ញាសូមចែករំលែកមេរៀនជីវិតក្រោយរៀបការខ្លះៗដែលមនុស្សស្រីសម័យនេះត្រូវដឹង៖
១. ជាមនុស្សស្រីហាមឈប់ស្អាត
បើទោះបីរៀបការរួចហើយក៏ដោយ ប៉ុន្តែហាមបណ្ដោយខ្លួនបណ្ដោយប្រាណឲ្យមើលទៅទ្រុឌទ្រោមដាច់ខាត។ កុំទាន់គិតថាខ្លួនមានប្ដីហើយ មិនដឹងតែងខ្លួនឲ្យអ្នកណាមើល ព្រោះគ្មានមនុស្សប្រុសណាមិនចូលចិត្តមនុស្សស្រីស្អាតៗនោះទេ រួមទាំងប្ដីរបស់អ្នក។ ម្យ៉ាងទៀតមនុស្សស្រីដែលមិនបណ្ដោយឲ្យសម្រស់ខ្លួនទ្រុឌទ្រោម នោះគឺមានន័យថានាងចេះមើលថែ យកចិត្តទុកដាក់នឹងខ្លួនឯងបានយ៉ាងល្អ។
២. ហួសសម័យហើយដែលមនុស្សស្រីត្រូវឈប់ធ្វើការដើម្បីមកធ្វើការងារផ្ទះ
ការងារផ្ទះគឺជាអ្វីដែលមនុស្សស្រីគួរធ្វើដើម្បីសុភមង្គលគ្រួសារ ប៉ុន្តែអ្នកក៏មិនចាំបាច់លាឈប់ពីការងារដើម្បីមកធ្វើមេផ្ទះទាំងស្រុងនោះទេ ព្រោះការងារ ឬមុខរបររកស៊ីក៏សំខាន់ដូចគ្នា ជាពិសេសបើសិនថ្ងៃណាមួយគ្មានគេ អ្នកនឹងមិនលំបាកបើអ្នកមានចំណូលផ្ទាល់ខ្លួន។ ការងារផ្ទះមិនមែនជាការងារផ្ដាច់មុខសម្រាប់មនុស្សស្រីទៀតទេ ប៉ុន្តែវាជាទំនួលខុសត្រូវរួមរបស់ប្ដីប្រពន្ធដែលត្រូវចេះជួយគ្នាទៅវិញទៅមក ទៅតាមស្ថានភាពជាក់ស្ដែង។
៣. កុំបណ្ដោយឲ្យជីវិតគូសោះកក្រោះ
ពិតមែនថា ជីវិតក្រោយរៀបការអាចមិនផ្អែមល្ហែមដូចពេលដំបូងៗដែលស្រលាញ់គ្នា ប៉ុន្តែធ្លាប់ឮគេនិយាយអត់ថា ការរៀបការមិនមែនជាចំណុចបញ្ចប់នោះទេ ប៉ុន្តែវាជាការចាប់ផ្ដើមយ៉ាងផ្លូវការនៃជីវិតគូ។ អ្នកត្រូវចេះថែរក្សាទំនាក់ទំនងគ្រួសារឲ្យបានរលូនល្អ។ ដូច្នេះត្រូវយកចិត្តទុកដាក់ បន្ថែមភាពផ្អែមល្ហែមឲ្យគ្នាខ្លះ ស្វែងរកឱកាសរឹតចំណងទំនាក់ទំនងក្នុងគ្រួសារ និងអ្វីដែលខ្វះមិនបាននោះគឺសិច ព្រោះបើអ្នករវល់តែធ្វើការ ហើយចេះតែព្រងើយៗចំពោះរឿងលើគ្រែ វាក៏ជាមូលហេតុមួយដែលធ្វើឲ្យស្វាមីចេញទៅរកខាងក្រៅដែរ។
៤. កុំប្រើអារម្មណ៍ដោះស្រាយបញ្ហា
ចំណុចនេះគឺពិតហួសពីការពិតទៅទៀត។ ចំនួនឆ្នាំដែលអ្នកស្រលាញ់គ្នា គឺមិនអាចធានាបានទេថា បុរសម្នាក់នោះនឹងស្មោះត្រង់ជាមួយអ្នកមួយជីវិត។ អ្វីក៏អាចកើតឡើងដែរក្នុងជិវិតគូ ដូច្នេះហើយអ្នកត្រូវតាំងសតិឲ្យបានល្អក្នុងការដោះស្រាយបញ្ហា ចៀសវាងធ្វើអ្វីតាមអារម្មណ៍ដែលធ្វើឲ្យបញ្ហាកាន់តែធ្ងន់ធ្ងរ។
៥. បើបែកគ្នា ត្រូវក្រោកឈរវិញឲ្យបានលឿនបំផុត
ការលែងលះគឺជាសុបិនដ៏អាក្រក់ដែលគ្មានមនុស្សស្រីណាចង់ជួប តែបើទីបំផុតអ្នកត្រូវចែកផ្លូវពិតមែន អ្វីដែលត្រូវធ្វើគឺត្រូវតាំងសតិ និងក្រោកដើរឡើងវិញឲ្យបានលឿនបំផុត។ បើរវល់តែអង្គុយយំ អង្គុយសោក អ្វីៗក៏មិនប្រសើរឡើងដែរ។ ជាពិសេសបើអ្នកមានកូន គឺត្រូវគិតកូននៅលំដាប់ទីមួយ។ បើទោះបីជាវាឈឺ ប៉ុន្តែបើយើងឆ្លងកាត់ចំណុចនេះបាន យើងនឹងក្លាយជាមនុស្សរឹងមាំម្នាក់ ៕
ចុចអាន៖
៣ ដំណាក់កាល ដែលបុរសអ្នកមានមើលលើស្ត្រី មុនសម្រេចចិត្តយកជាប្រពន្ធ
ចង់ឲ្យប្រពន្ធសប្បាយចិត្ត និងមានសុភមង្គល មិនមែនជារឿងលំបាកនោះទេ