ស្រីៗគួរដឹងវិធីគូសចិញ្ចើមឱ្យត្រូវទម្រង់មុខ ទើបមើលទៅឃើញស្អាត

2018-07-14 04:33:35
ចំនួនមតិ 0 | ចំនួនចែករំលែក 0

ស្រីៗមួយចំនួនតែងជួបការលំបាកក្នុងការគូសចិញ្ចើម ដើម្បីឱ្យសមនិងស្រស់ស្អាតតែម្ដង។ ដោយសារគ្រប់គ្នាមានទម្រង់មុខមិនដូចគ្នា ទើបការគូសចិញ្ចើមក៏មិនអាចគូសដូចគ្នា ឬតាមតែចិត្តស្រលាញ់នោះដែរ។ បើចង់ឱ្យមើលទៅស្រស់ស្អាត និងទាក់ទាញ នារីៗគួរតែដឹងពីទម្រង់មុខរបស់ខ្លួន ហើយដឹងពីទម្រង់ចិញ្ចើមដែលសក្ដិសមនឹងមុខដូចខាងក្រោម៖

មុខជ្រុង

សម្រាប់នារីដែលមានមុខជ្រុង ឬថ្គាមខ្លាគួរគូសចិញ្ចើមរាងត្រង់បន្តិច ហើយកាច់ចុះក្រោមត្រឹមប្រស្រីភ្នែកដើម្បីឱ្យមើលទៅឃើញមុខតូច។ ចំណែកកន្ទុយចិញ្ចើមគួរតែគូសឱ្យនៅខ្ពស់ជាងគល់ចិញ្ចើម (មើលតាមរូប)។

មុខវែង

ដើម្បីជួយឱ្យមុខមើលទៅមិនវែងពេក នារីមានមុខបែបនេះគួរតែគូសចិញ្ចើមរាងត្រង់ដូចនារីកូរ៉េ ហើយបន្ទាត់ខាងលើគូសចុះមកស្រួចចុងជាមួយបន្ទាត់ខាងក្រោមដោយវាស់ពីចុងភ្នែកបញ្ឆិតឡើងមកលើ។ ចំពោះទំហំពីគល់ដល់ចុងចិញ្ចើមអាចគូសឱ្យស្មើគ្នាបាន។

មុខមូល

ចិញ្ចើមរាងបះបន្តិចហើយកាច់ចុង គឺសក្ដិសមសម្រាប់នារីដែលមានមុខមូល។ កន្ទុយដែលកាច់ចុះមិនមែនកាច់ត្រឹមផ្នែកប្រស្រីភ្នែកដូចនារីថ្គាមខ្លាទេ តែកាច់នៅចុងភ្នែក ហើយគួរគូសឱ្យមានរាងស្ដើងជាងគល់ចិញ្ចើម។

ទម្រង់មុខ V ឬរាងបេះដូង

នារីដែលមានមុខទ្រវែង ថ្ងាសទូលាយ មុខ V ឬមុខរាងបេះដូង សក្ដិសមនឹងទម្រង់ចិញ្ចើមកោងដូចធម្មជាតិ ដោយមិនបាច់គូសកាច់ឡើយ។ ចំពោះពណ៌រោមចិញ្ចើមគួរគូសឱ្យត្រូវនឹងពណ៌សក់ ជៀសវាងពណ៌ដិតជាងពណ៌សក់ដែលនាំឱ្យមើលទៅហោះពេក៕

ចុចអាន៖ មិនចេះគូសចិញ្ចើមក៏អាចគូសបានស្អាតដូចអ្នកជំនាញដែរ បើដឹងល្បិចងាយៗនេះ(វីដេអូ)

ប្រភព៖ bestie ប្រែសម្រួល៖ សរ សុគន្ធី