ខូចចិត្តប៉ុណ្ណាក៏ដោយ នារីរឹងមាំរឿងស្នេហាមិនបណ្ដោយខ្លួនឲ្យធ្លាក់ដល់ ៤ ចំណុចនេះ

2018-07-13 05:30:00
ចំនួនមតិ 0 | ចំនួនចែករំលែក 0

ស្រលាញ់ខ្លាំងប៉ុណ្ណា ពេលបែកគ្នាក៏ឈឺចាប់ខ្លាំងប៉ុណ្ណឹងដែរ។ ពេលបែកគ្នា មនុស្សស្រីមានប្រតិកម្មផ្សេងៗគ្នា ខ្លះទៅចង់នៅម្នាក់ឯងលួចយំ ឈឺចិត្តតែមិនចង់ប្រាប់អ្នកណា ចំណែកខ្លះទៀតចូលចិត្តចេញក្រៅជួបមិត្ត ដើម្បីរៀបរាប់ពីទុក្ខលំបាក។ វាគ្មានខុស ឬត្រូវអ្វីទេក្នុងការខូចចិត្តហើយធ្វើបែបនេះ ប៉ុន្តែចំពោះនារីដែលរឹងមាំមិនបណ្ដោយឲ្យខ្លួនឯងធ្លាក់ដល់ចំណុចទាំង ៤ នេះឡើយ៖

១. ខូចចិត្តស្ទើរឆ្កួត ធ្វើអ្វីលែងកើត

ត្រូវហើយស្នេហាគឺឈឺចាប់ ប៉ុន្តែបើនារីមានចិត្តរឹងមាំ អាចធ្វើចិត្តបាន ដោយមិនបណ្ដោយឲ្យខ្លួនឯងធ្លាក់ដល់ចំណុចដូចជាទៅធ្វើការអីក៏មិនកើត គិតតែពីសំងំនៅម្នាក់ឯង មិនញ៉ាំអី នាំឲ្យឈឺឡើយ។ នារីខ្លាំងមិនធ្វើបែបនេះដាច់ខាត នាងប្ដូរការគិតទៅវិញថា ធ្វើបែបនេះ ដើម្បីមនុស្សប្រុសទៅចោលនាងធ្វើអី? បានអ្វីមកវិញ ហើយមនុស្សម្នាក់នោះគ្មានតម្លៃឲ្យនាងធ្វើបែបនេះទេ។

២. ភ្លេចគេមិនបាន

មនុស្សស្រីខ្លះចិត្តទន់ ស្រលាញ់អ្នកណា ហើយគឺស្រលាញ់ខ្លាំង ទោះបីជាបែកគ្នាហើយក៏នៅនឹកគិតពីគេដែរ។ នាងនឹកគេរហូតខលទៅ ឬសុំត្រូវគ្នាវិញជាដើម។ ខុសពីនារីរឹងមាំ តែហាមាត់ហើយគឺមិនដែលលេបសម្ដីខ្លួនវិញឡើយ បែកហើយគ្មានថ្ងៃត្រលប់ទៅវិញនោះទេ។ នាងស៊ូនៅម្នាក់ឯងទុកឱកាសឲ្យខ្លួនឯងបើកបេះដូងទទួលយកអ្នកថ្មីវិញប្រសើរជាង។

៣. ប្ដូរខ្លួនឯង ដើម្បីបានឱកាសបន្តទៀត

ការបែកបាក់គ្នាខ្លះបណ្ដាលមកពីមានអ្នកទី៣ ចូល។ចំពោះនារីទន់ខ្សោយ នាងនឹងខឹងសង្សារបានមួយភ្លែត លុះគេមកលួងនិងព្រមវិញ ព្រោះចិត្តនៅស្រលាញ់គេ ហើយសុខចិត្តប្ដូរខ្លួនឯង ដើម្បីផ្គាប់ចិត្តគេទៅវិញ។ នារីរឹងមាំស្អប់ខ្ពើម និងរអើមបំផុតចំពោះអំពើផិតក្បត់ ដាច់ខាតមិនត្រលប់វិញឡើយ បើដឹងថាដៃគូមានចរិតអន់ប្រភេទនេះ។

៤. យកស្រាធ្វើជាថ្នាំបំបាត់ទុក្ខ

កុំក្លាយជាមនុស្សប្រមឹកដោយសារខូចចិត្តអី។ នារីដែលរឹងមាំយល់ថា គ្រឿងស្រវឹងធ្វើឲ្យភ្លេចមនុស្សម្នាក់តែមួយភ្លែតប៉ុណ្ណោះ។ ប៉ុន្តែវាជះឥទ្ធិពលអាក្រក់ខ្លាំងដល់ខ្លួនឯងដូចជា អ្នកដទៃមើលមកមិនល្អ ឬទៅជាឈឺ និងអាចបង្កគ្រោះថ្នាក់ផ្សេងៗបាន។ ដូច្នេះពេលខូចចិត្តនារីរឹងមាំ ជ្រើសយកវិធីផ្សេងដោយទៅដើរលំហែកម្សាន្ត ឬទៅជួបមិត្តភក្តិជជែកគ្នាជាដើម៕

ចុចអាន៖ជ្រុលចិត្តស្រឡាញ់មនុស្សដែលមានសង្សារហើយ គួររៀនដកខ្លួនតាមវិធីនេះ

អត្ថបទ៖ Pencharm