ហេតុផលសំខាន់ ៤ ដែលមនុស្សស្រីត្រូវធ្វើខ្លួនឲ្យរឹងមាំ
- 2018-07-12 07:29:37
- ចំនួនមតិ 0 | ចំនួនចែករំលែក 0
ហេតុផលសំខាន់ ៤ ដែលមនុស្សស្រីត្រូវធ្វើខ្លួនឲ្យរឹងមាំ
មកដល់ពេលនេះទៅហើយបើអ្នកនៅតែធ្វើខ្លួនជាមនុស្សស្រីដែលទន់ជ្រាយ ចាំតែការជួយពីគេទៀតនោះ អ្នកនឹងអាចប្រឈមបញ្ហាជាច្រើន។ យ៉ាងណាមិញបើអ្នកអាចធ្វើឲ្យខ្លួនឯងក្លាយជាមនុស្សស្រីដែលរឹងមាំ និងឯករាជ្យម្នាក់នោះ អ្នកនឹងមើលឃើញពីភាពផ្លាស់ប្ដូរដែលអ្នកទទួលបាន។ ខាងក្រោមនេះជាហេតុផល ៤យ៉ាងសំខាន់ដែលអ្នកត្រូវធ្វើជាមនុស្សស្រីរឹងមាំម្នាក់ ៖
១. លើកតម្លៃខ្លួនឯង
ប្រហែលមានមនុស្សស្រីមួយចំនួនបានបណ្ដោយខ្លួនឲ្យខ្លួនឯងមានចរិតព្រះនាងម្ចាស់ ហើយគិតថាខ្លួនឯងអស្ចារ្យមានអ្នកស្រឡាញ់ និងចង់បានច្រើន តែនេះគឺប្រៀបដូចបន្ទាបតម្លៃខ្លួនឯងអីចឹង។ មនុស្សស្រីដែលប្រើចរិត Princess គ្មានអ្នកណាម្នាក់លើកតម្កើង និងសរសើរនោះទេ។ មួយវិញទៀតការធ្វើខ្លួនស្លូតពេក អន់ពេក ឲ្យគេជាន់ពេកក៏មិនអាចរស់ស្រួលក្នុងសង្គមមនុស្សដែរ ព្រោះអ្នកនឹងត្រូវបានគេជិះជាន់ មើលងាយ និងធ្វើបាន។ បែបនេះហើយទើបមនុស្សស្រីគ្រប់គ្នាត្រូវតែបង្វឹកខ្លួនឲ្យក្លាយជាមនុស្សស្រីឆ្នើមម្នាក់ រឹងមាំម្នាក់ដែលទោះតៅដល់ទីណាក៏គេគោរព និងឲ្យតម្លៃ មិនហ៊ានមើលលើ មើលក្រោម។
**២. ស្គាល់ពិភពលោកបានទូលាយ**
មនុស្សស្រីដែលឯករាជ្យ និងរឹងមាំភាគច្រើនមិនចូលចិត្តនៅមួយកន្លែងទេ នាងតែងតែដើរទៅរកអ្វីដែលថ្មី អ្វីដែលល្អ ដូច្នេះនាងមានឱកាសច្រើនក្នុងការដើរហើរក្នុងសង្គម។ អ្នកក៏ត្រូវបែបនេះដូចគ្នា កុំគិតថាមនុស្សស្រីកើតមកដើម្បីតែបង្កើតកូនឲ្យមនុស្សប្រុស ឬឲ្យមនុស្សប្រុសចិញ្ចឹមនោះ តែនៅមានរឿងជាច្រើនទៀតត្រូវធ្វើដូចគ្នា។
៣. មានជីវិតនឹងធឹងសម្រាប់ខ្លួនឯង
មានមនុស្សស្រីមិនតិចទេដែលរងគ្រោះដោយសារ មិនអាចរស់នៅដោយខ្លួនឯងបាន បន្ទាប់ត្រូវមនុស្សប្រុសបោះបង់ចោល ឬលែងលះគ្នា ឬមួយទៀតត្រូវគ្រាំចិត្តដោយសារមិនអាចធ្វើអ្វីបាន។ តើនេះជាអ្វីដែលមនុស្សស្រីត្រូវទទួលបាន? បើអ្នកមិនអាចធ្វើឲ្យខ្លួនឯងរឹងមាំទេ អ្នកនឹងជួបរឿងបែបនោះ តែបើអ្នកជាមនុស្សស្រីដែលរឹងមាំវិញ ទោះអ្នកជួបបញ្ហាអីក៏ដោយ ក៏អ្នកនៅតែអាចគ្រប់គ្រងជីវិតខ្លួនឯង និងកូនៗអ្នកបានយ៉ាងប្រសើរ។
៤. ជួបមនុស្សប្រុសល្អ
ហេតុអីបានមនុស្សស្រីរឹងមាំអាចជួបមនុស្សប្រុសល្អ? ព្រោះមនុស្សស្រីរឹងមាំម្នាក់ មិនងាយស្រឡាញ់មនុស្សប្រុសផ្ដេសផ្ដាសនោះទេ ដូច្នេះមនុស្សប្រុសដែលអាចឲ្យនាងស្រឡាញ់បានក៏ត្រូវមានចរិតរឹងមាំ និងអាចឲ្យនាងទុកចិត្តបានដែរ។ ម្យ៉ាងទៀតនៅពេលដែលអ្នកមិនទន់ជ្រាយ រឹងមាំ ឯករាជ្យ ពេលនោះអ្នកជាមនុស្សស្រីដែលនៅក្នុងកែវភ្នែកមនុស្សប្រុសល្អហើយ ព្រោះមនុស្សប្រុសល្អ តែងសម្លឹងរកនារីល្អដូចគ្នាហើយ៕
ចុចអាន៖មនុស្សស្រីដែលរស់នៅដោយរីករាយ និងស្រស់ស្អាតរាល់ថ្ងៃ តែងមានចំណុចនេះ