មើលតាមប្រភេទឈាមក៏ដឹងថាអ្នកជាមិត្តស្រីរបៀបណាដែរ

2018-07-12 05:40:00
ចំនួនមតិ 0 | ចំនួនចែករំលែក 0

ជឿទេថាប្រភេទឈាមអាចទស្សន៍ទាយពីអត្តចរិតអ្នកបាន? ប្រភេទឈាមខុសៗគ្នាធ្វើឱ្យចរិតលក្ខណៈខុសគ្នាទៅតាមហ្នឹងដែរ។ ចង់ដឹងថាប្រភេទឈាមអាចប្រាប់ពីអត្តចរិតអ្នកបានច្បាស់កម្រិតណាមានតែមើលការទស្សន៍ទាយខាងក្រោមនេះ៖

#ប្រភេទ A ជាមនុស្សងក់ងរច្រើនចូលចិត្តគិតម្នាក់ឯងតែមានការប្ដេជ្ញាចិត្តខ្ពស់

អ្នកគឺមនុស្សដែលច្បាស់លាស់ចំពោះស្នេហា។ អ្នកគិតថាស្នេហាដែលអ្នកមានគឺជាស្នេហាចុងក្រោយ ហេតុនេះហើយអ្នកព្យាយាមយកចិត្តទុកដាក់ព្រោះមិនចង់បាត់បង់។ អ្នកមិនឱ្យសង្សារអ្នករបូតផុតពីដៃអ្នកងាយៗឡើយ និងតែងតែគិតរឿងអនាគតជាមួយគេ។ ប៉ុន្តែពេលខ្លះអ្នកមិនអាចគ្រប់គ្រងភាពងរងក់របស់អ្នកបានទេ។ អ្នកចង់ឱ្យគេយកចិត្តទុកដាក់គ្រប់ពេល រហូតដល់ពេលខ្លះឈ្លោះគ្នាក៏មាន។ អ្នកជាមនុស្សដែលព្រួយបារម្ភច្រើន ពេលខ្លះដូចកូនក្មេង។ តែការព្រួយបារម្ភនោះគ្រាន់តែចង់បង្ហាញថាអ្នកច្បាស់លាស់ចំពោះស្នេហា ហើយក៏ចង់ឱ្យសង្សារអ្នកមានអារម្មណ៍បែបនេះដូចគ្នា។ រឿងដែលគេធ្វើបន្តិចបន្តួចអាចធ្វើឱ្យអ្នករំភើបចិត្តខ្លាំង ហើយក៏អន់ចិត្តខ្លាំងដែរ។

#ប្រភេទ B ជាមនុស្សរប៉ិលរប៉ូចតែសុទិដ្ឋិនិយម

អ្នកមានស្មារតីខ្ពស់ ហើយតែងតែរីករាយស្រស់ស្រាយនិងចូលចិត្តផ្សងព្រេង។ អ្នកក៏ជាមិត្តស្រីដែលចូលចិត្តធុញទ្រាន់ អញ្ចឹងហើយអ្នកតែងតែញ៉ោះសង្សារអ្នកលេង។ អ្នកជាមនុស្សចូលចិត្តរាប់អានមិត្តហើយចិត្តទូលាយមិនសូវប្រច័ណ្ឌច្រើន។ គំនិតច្នៃប្រឌិតរបស់អ្នកធ្វើឱ្យសង្សារអ្នកកាន់តែស្រលាញ់អ្នកខ្លាំង។ អ្វីដែលរំខានស្នេហាអ្នកនោះគឺការមិនសម្រេចឱ្យច្បាស់លាស់ និងគ្មានទំនួលខុសត្រូវរបស់អ្នក។ អ្នកមិនសូវយកចិត្តទុកដាក់លើរឿងតូចតាចទេ ហើយអ្នកក៏មិនសូវបានបំពេញតួនាទីជាសង្សារឱ្យបានល្អដែរ។ ប៉ុន្តែមានអ្នកខ្លះក៏លង់ស្រលាញ់អ្នកដោយសារតែភាពមិនរវីរវល់និងសុទិដ្ឋិនិយមរបស់អ្នក។

#ប្រភេទ AB ជាមនុស្សមិនច្បាស់លាស់តែមានហេតុផល

មនុស្សប្រភេទនេះអាចនឹងពិបាកមើលចិត្តបន្តិច ដោយសារធាតុផ្សំរវាង A និង B។ ពេលខ្លះអ្នកជាមនុស្សក្លៀវក្លា រីឯពេលខ្លះទៀតក៏ស្ងប់ស្ងាត់។ អ្នកក៏ជាមនុស្សចេះបត់បែន និងយល់ពីមនុស្សដែលខ្លួនស្រលាញ់ច្រើន។ លើសពីនេះទៅទៀត អ្នកគឺជាមនុស្សដែលចូលចិត្តរកហេតុរកផលហើយព្យាយាមចង់ដឹងចង់យល់ពីគ្រប់ហេតុការណ៍។ អ្វីដែលល្អនេះគឺអ្នកងាយសម្របជាមួយសង្សារអ្នកមិនថានៅក្នុងស្ថានការណ៍ណាក៏ដោយ។ វាក៏អាចជាការលំបាកដែរនៅពេលអ្នកវិភាគច្បាស់លាស់ពេកសូម្បីតែរឿងតូចតាច សង្សារអ្នកអាចនឹងធុញទ្រាន់។

#ប្រភេទ O ជាមនុស្សឆេវឆាវ ប៉ុន្តែឯករាជ្យ

អ្នកមានទំនុកចិត្តលើខ្លួនឯងខ្ពស់ណាស់ អ្នកជាមិត្តស្រីដែលតែងតែគ្រប់គ្រងលើស្នេហាពីព្រោះតែអ្នកតែងតែកំណត់អ្វីដែលអ្នកត្រូវការសម្រាប់ស្នេហា និងអ្វីដែលអ្នកចង់បានពីស្នេហា។ អ្នកតែងតែគិតថាគេត្រូវតែទុកអ្នកដូចជាព្រះនាង។ បែបនេះធ្វើឱ្យសង្សារអ្នកពិបាកហើយធុញទ្រាន់ខ្លាំង។ តែអ្នកមិនសូវខ្វល់ទេ តែត្រូវប្រយ័ត្នចំពោះភាពអំណួតរបស់អ្នកព្រោះពេលខ្លះអ្នកធ្វើឱ្យភាពអំណួតបាំងមុខ។ ត្រូវចាំថាសង្សារអ្នកក៏មានតម្លៃដែរ កុំអាត្មានិយមពេក។ តែចំណុចពិសេសនោះគឺអ្នកមានភាពម្ចាស់ការលើខ្លួនឯង សូម្បីតែត្រូវគេក្បត់ក៏អ្នកអាចរឹងមាំវិញបានយ៉ាងឆាប់រហ័សដែរ៕