កុំបណ្ដោយ! ៦សញ្ញាបង្ហាញថាអ្នកកំពុងចាស់ទ្រុឌទ្រោមលឿនជាងវ័យ

2018-07-04 04:00:08
ចំនួនមតិ 0 | ចំនួនចែករំលែក 0

បើទោះបីភាពចាស់ជរាគឺជារឿងធម្មជាតិដែលយើងមិនអាចជៀសវាងបាន ប៉ុន្តែបើវាកើតឡើងឆាប់ខ្លាំងពេក យើងក៏គួរយកចិត្តទុកដាក់ដែរ។ សព្វថ្ងៃនេះមានបុរសនិងស្ត្រីជាច្រើននាក់ដែលមានបញ្ហាឆាប់ចាស់ជាងអាយុ ដោយមានអាការផ្សេងៗដូចខាងក្រោមនេះ៖

១. ស្បែកស្ងួត មាត់ប្រេះញឹក

បញ្ហាស្បែកឆាប់ចាស់ច្រើនចាប់ផ្ដើមលេចឡើងក្រោយអាយុ ២៥ឆ្នាំ ប៉ុន្តែសភាពបរិយាកាសជុំវិញ និងកត្តាជាច្រើនទៀតអាចបណ្ដាលឲ្យបញ្ហានេះកើតឡើងលឿនជាងធម្មតា ដូចជាការញ៉ាំអាហារមិនមានតុល្យភាព ឬមិនគ្រប់ជីវជាតិ ការព្រងើយកន្តើយរឿងកម្ដៅថ្ងៃ និងការស្រ្តេសខ្លាំងពេកជាដើម។

២. ស្នាមជ្រួញជុំវិញភ្នែក

ស្បែកនៅបរិវេណជុំវិញភ្នែកអាចបង្ហាញពីស្ថានភាពរស់នៅរបស់មនុស្សយើងបានយ៉ាងល្អ ថាតើយើងគេងច្រើន ឬគេងតិច ស្រេ្តសច្រើនឬអត់។ ដូច្នេះប្រសិនបើមានស្នាមជ្រួញជុំវិញបរិវេណនេះ គឺអាចប្រាប់បានថារាងកាយរបស់យើងកំពុងទ្រុឌទ្រោមជាងវ័យ។ ដំណោះស្រាយនោះគឺគួរគេងឲ្យបានគ្រប់គ្រាន់ កុំញ៉ាំប្រៃច្រើនពេក និងញ៉ាំទឹកឲ្យបានច្រើន។

៣. រដូវមកមិនទៀងទាត់

បញ្ហាមករដូវមិនទៀងទាត់គឺជារឿងធម្មតារបស់មនុស្សស្រីវ័យ ៤៦ទៅ៥៤ឆ្នាំ ប៉ុន្តែសព្វថ្ងៃនេះគេបែរជារកឃើញថា ស្ត្រីនៅយុវវ័យមានបញ្ហាច្រើនជាងស្ត្រីវ័យកណ្ដាលទៅទៀត។ នេះគឺដោយសារអវយវៈផ្នែកខាងក្នុងកំពុងមានបញ្ហា ហើយអ្នកអាចការពារបានដោយការត្រួតពិនិត្យសុខភាពញឹកញាប់ និងប្រឹក្សាជាមួយគ្រូពេទ្យខ្លះថា មករដូវមិនទៀងទាត់នេះកើតឡើងដោយសារអ្វី ហើយត្រូវមានទម្លាប់រស់នៅបែបស្រលាញ់សុខភាពផង ដូចជាគេងឲ្យបានគ្រប់គ្រាន់ ញ៉ាំអាហារមានប្រយោជន៍ និងហាត់ប្រាណជាដើម។

៤. រាងកាយហត់នឿយ

បើត្រឹមតែការឡើងជណ្ដើរ ការដើរ ឬបម្លាស់ទីផ្សេងៗក្នុងជីវិតប្រចាំថ្ងៃក៏អ្នកត្រូវការប្រឹង ឬមានអារម្មណ៍ថាប្រើកម្លាំងច្រើន នោះអាចជាសញ្ញាបង្ហាញថាខាងក្នុងខ្លួនរបស់យើងកំពុងមានបញ្ហាចាស់ជាងវ័យ។ ប៉ុន្តែមិនត្រូវឈប់បញ្ចេញសកម្មភាពរាងកាយដាច់ខាត តែអាចផ្លាស់ជ្រើសរើសការហាត់ប្រាណស្រាលៗឲ្យបានច្រើនដូចជា ហាត់ Yoga រាំតាមចង្វាក់ភ្លេង ធាក់កង់ ដើម្បីឲ្យសាច់ដុំផ្នែកផ្សេងៗនៃរាងកាយបានបញ្ចេញកម្លាំង និងកាន់តែរឹងមាំ។

៥. សក់ជ្រុះឃើញច្បាស់ៗ

ជាធម្មតាមនុស្សយើងអាចមានសក់ជ្រុះប្រមាណ ៥០ទៅ១២៥សរសៃក្នុងមួយថ្ងៃស្រាប់ហើយ ប៉ុន្តែបើវាជ្រុះច្រើនជាងនេះ នោះអ្នកគួរតែទៅជួបគ្រូពេទ្យទៅ ព្រោះវាជាសញ្ញាបង្ហាញថាអ្នកមានបញ្ហាអ័រម៉ូន បើទុកចោលយូរ នឹងអាចប្រឈមបញ្ហាទំពែកជាមិនខាន។ អ្នកមានបញ្ហានេះគួរព្យាយាមជ្រើសរើសផលិតផលថែរក្សាសរសៃសក់ឲ្យបានល្អ ជ្រើសរើសញ៉ាំអាហារដែលមានសារធាតុ Omega 3 ដូចជាបន្លែ និងសាច់ត្រីឲ្យកាន់តែច្រើន និងជៀសវាងកុំឲ្យសរសៃសក់ប៉ះជាមួយកម្ដៅថ្ងៃយូរ។

៦. បញ្ហាការគេង

ការគេងមិនលក់ គឺជាបញ្ហាធំដែលកើតឡើងបានគ្រប់ភេទគ្រប់វ័យ ប៉ុន្តែបើវាកើតឡើងមុនអាយុ ៦០ឆ្នាំ យើងអាចព្យាបាលវាបានដោយការផ្លាស់ប្ដូរទម្លាប់រស់នៅមិនល្អចេញ។ សាកល្បងហាត់ Yoga ហែលទឹក ឬអានសៀវភៅមុនគេងដើម្បីសម្រាកខួរក្បាលមុនគេង។ បិទទូរទស្សន៍ ទូរសព្ទ និងឧបករណ៍ទាក់ទងផ្សេងៗឲ្យបានមួយម៉ោងមុនចូលគេង ក៏ជួយឲ្យអ្នកឆាប់គេងលក់ដែរ។

ពិនិត្យមើលខ្លួនឯង បើមានសញ្ញាណាមួយ ត្រូវដោះស្រាយជាបន្ទាន់ណា៎!

ប្រភព៖ gangbeauty ប្រែសម្រួល៖ ស្វាយ វ៉ាន់ថន