ជំងឺ ៦យ៉ាងដែលស្រ្តីមានផ្ទៃពោះគួរប្រយ័ត្នឱ្យមែនទែន

2018-06-22 07:38:31
ចំនួនមតិ 0 | ចំនួនចែករំលែក 0

កំឡុងពេលមានផ្ទៃពោះ ស្រ្តីគ្រប់រូបងាយទទួលរងនូវជំងឺផ្សេងៗណាស់ក៏ព្រោះតែរាយកាយត្រូវការអាហារូបត្ថម្ភច្រើនជាងស្រ្តីធម្មតា។ ស្ត្រីមានផ្ទៃពោះច្រើនតែឡើងទម្ងន់ដែលជាហេតុនាំឱ្យមានជំងឺផ្សេងៗដូចជា ទឹកនោមផ្អែម ឈឺជើង ស្រ្តេស ។ល។ ហេតុនេះហើយបានជាអ្នកមានផ្ទៃពោះទាំងឡាយត្រូវប្រយ័ត្នចំពោះជំងឺទាំង៧នេះ៖

១. ជំងឺក្រឡាភ្លើង (Preeclampsia)

ជំងឺប្រភេទនេះច្រើនកើតចាប់ពី២០សប្តាហ៍ដំបូងនៃការមានគភ៌ទៅ ជាពិសេសកំឡុងពេលសប្តាហ៍ទី៣២។ ជំងឺនេះអាចប៉ះពាល់ទាំងម្តាយនិងកូនដោយសារតែសំពាធឈាមកើនឡើង និងការប៉ះពាល់សរីរាង្គមួយចំនួនដូចជា តម្រងនោមជាដើម។ បើសិនជាគ្មានការវិនិច្ឆ័យឱ្យបានត្រឹមត្រូវទេនោះវានឹងបណ្តាលឱ្យប្រកាច់ ខូចខួរក្បាល តម្រងនោមនិងគាំងបេះដូង។ ជាធម្មតារោគសញ្ញានៃជំងឺនេះគឺ ការហើមដៃ ឬជើង ពិបាកដកដង្ហើម ឈឺក្បាល និងនោមតិចជាងធម្មតា។

២. ជំងឺខ្សោយបេះដូង (Peripartum Cardiomyopathy)

ជំងឺបេះដូងប្រភេទនេះគឺទាក់ទងនឹងការចុះខ្សោយនៃសាច់ដុំបេះដូងដែលច្រើនតែកើតឡើងនៅពេលជិតសម្រាល។ ស្រី្តជាច្រើនជួបប្រទះនឹងការផ្លាស់ប្តូរសរីរាង្គកំឡុងពេលមានផ្ទៃពោះនាំឱ្យសរសៃឈាមរីកធំ និងបេះដូងពិបាកដំណើរការ។ ជាលទ្ធផល ក្នុងករណីខ្លះអាចបណ្តាលឱ្យក្លាយទៅជាជំងឺបេះដូង។ រោគសញ្ញានៃជំងឺនេះក៏ដូចជាជំងឺក្រឡាភ្លើងដែរគ្រាន់តែជំងឺនេះច្រើនកើតឡើងនៅពេលជិតសម្រាល។ មនុស្សស្រីខ្លះ បេះដូងអាចដំណើរការបានធម្មតាឡើងវិញកំឡុងពេល២សប្តាហ៍ក្រោយពេលសម្រាល រីឯអ្នកខ្លះទៀតចំណាយពេលដល់ទៅ៦ខែឬលើសពីនេះ។

៣. ជំងឺបាក់ទឹកចិត្ត (Depression)

នេះជាជំងឺដែលស្ត្រីមានផ្ទៃពោះច្រើនជួបប្រទះក៏ព្រោះតែការគេងមិនគ្រប់គ្រាន់ ការឡើងចុះអរម៉ូន ឬក៏ការមានផ្ទៃពោះជាលើកដំបូងដែលហេតុនាំឱ្យមានការតប់ប្រមល់ក្នុងចិត្ត និងខ្វាយខ្វល់ច្រើន។ វាជាជំងឺធម្មតាតែក៏តម្រូវឱ្យមានការយកចិត្តទុកដាក់ផងដែរ ព្រោះវាអាចប៉ះពាល់ដល់កូនក្នុងផ្ទៃ។

៤. ជំងឺទឹកនោមផ្អែម (Diabetes)

អ្នកប្រហែលជាធ្លាប់បានដឹងហើយថាកំឡុងពេលមានផ្ទៃពោះ ស្ត្រីងាយកើតជំងឺទឹកនោមផ្អែមប៉ុន្តែពេលខ្លះជំងឺនេះក៏នៅតែមានក្រោយពេលសម្រាលកូនរួច។ ស្រ្តីដែលមានជំងឺទឹកនោមផ្អែមកំឡុងពេលមានផ្ទៃពោះត្រូវតមអាហារដែលមានគ្លុយកូសខ្ពស់ និងតាមដានឱ្យបានម៉ត់ចត់ឱ្យមែនទែន។

៥. ជំងឺរលាកខ្នែងពោះរៀន (Appendicits)

កំឡុងពេលមានផ្ទៃពោះ ពោះវៀនរបស់អ្នកនឹងធ្វើការផ្លាស់ទីដែលជាហេតុនាំឱ្យងាយកើតជំងឺរលាកខ្នែងពោះវៀន។ ស្ត្រីមានផ្ទៃពោះតែងជួបប្រទះនឹងការឈឺចាប់នៅត្រង់ពោះ និងរាលដល់ផ្នែកខាងក្រោមផ្ចិតទៅផ្នែកខាងលើស្តាំនៃខ្នង។

៦. ជំងឺមហារីកសុដន់

ជំងឺមហារីកសុដន់ក៏មានទំនាក់ទំនងជាមួយការមានគភ៌ដែរតែវាអាស្រ័យលើវ័យមានផ្ទៃពោះដែរ។ ស្រ្តីដែលមានកូនដំបូងនៅវ័យរាងចាស់អាចប្រឈមមុខនឹងជំងឺមហារីកដោះជាងស្រ្តីនៅក្មេង។ នៅពេលអ្នកមានគភ៌កោសិកាដើមទ្រូងរបស់អ្នកកើនឡើងយ៉ាងលឿន ហើយហ្សែនខ្លះបង្កការខូចខាតដល់កោសិកាដើមទ្រូងទាំងមូលធ្វើឱ្យជំងឺមហារីកកើតឡើង។ ហើយការខូចខាតនេះភាគច្រើនកើតមាននៅលើស្រ្តីវ័យចំណាស់៕

ប្រភព៖ self ប្រែសម្រួល៖ តាន់ ច័ន្ទលក្ខិណា