ចរិតលក្ខណៈធំៗរបស់មនុស្សស្រីឯករាជ្យចំពោះស្នេហា
- 2018-06-23 00:42:00
- ចំនួនមតិ 0 | ចំនួនចែករំលែក 0
ចរិតលក្ខណៈធំៗរបស់មនុស្សស្រីឯករាជ្យចំពោះស្នេហា
នារីរឹងមាំនិងឯករាជ្យតែងឱ្យតម្លៃលើរបស់សំខាន់ដូចជា ចំណូលប្រចាំថ្ងៃ ក្ដីសុខសម្រាប់គ្រួសារ ការពង្រឹងសមត្ថភាព ជាជាងចំណាយពេលគិតលើរឿងស្នេហា។ បើអ្នកបានមើលចំណុចទាំង៦ខាងក្រោមនេះនឹងដឹងថា នារីរឹងមាំម្នាក់មានទស្សនៈបែបណាខ្លះចំពោះស្នេហា។
១. នាងសុខចិត្តនៅម្នាក់ឯង ប្រសើរជាងរើសមនុស្សខុស៖
នារីរឹងមាំតែងយល់ថា សុខចិត្តរស់នៅម្នាក់ឯងវិញ ប្រសើរជាងទៅពាក់ព័ន្ធនឹងមនុស្សខុសដែលមិនអាចនាំក្ដីសុខដល់ជីវិតនាង។ នាងតែងប្រកាន់ទស្សនៈមួយថា "យកប្ដីប្រពន្ធមក គឺដើម្បីផ្ដល់ក្ដីសុខឱ្យគ្នា តែបើយកមកផ្ដល់តែទុក្ខដល់គ្នា មិនបាច់យកល្អជាង"។
២. នាងចេះស្វែងយល់ពីបុរសម្នាក់នោះច្បាស់លាស់ មុនសម្រេចចិត្តស្រលាញ់៖
មុននឹងដាក់ចិត្តថាស្រលាញ់អ្នកណាម្នាក់ នារីរឹងមាំតែងត្រូវការពេលវេលា និងមានវិធីពិសោធន៍ដើម្បីដឹងច្បាស់ថា បុរសនោះពិតជាមនុស្សដែលអាចរស់នៅជាមួយគ្នាទៅថ្ងៃអនាគតបានដែរឬអត់? មិនមែនផ្តោតតែលើកត្តាបន្តិចបន្តួច ដូចជារូបសម្រស់ ឋានៈតួនាទីការងារ ឬមើលតែលើចំណុចវិជ្ជមានតែមួយមុខនោះទេ។
ចុចអាន៖ រឿងអស្ចារ្យទាំងនេះបុរសនឹងទទួលបាន ពេលមានមិត្តស្រីជាមនុស្សឯករាជ្យ
៣. នាងមានសមត្ថភាពអាចរស់ដោយខ្លួនឯងបាន៖
ដោយសារស្នេហាមិនមែនជាអាទិភាពសម្រាប់នារីប្រភេទនេះ ទើបនាងត្រូវចំណាយពេលវេលាវិនិយោគលើការពង្រឹងសមត្ថភាពខ្លួនជាមុនសិន។ នាងនឹងត្រូវប្រាកដខ្លួនឯងថា អាចរស់ដោយខ្លួនឯងបាន ដោយមិនបាច់ពឹងផ្អែកលើស្វាមីឡើយ ហើយបើទោះជាគ្មានស្នេហាក៏នៅតែអាចរស់ដោយរីករាយបាន។
៤. នាងមិនដែលភ្លេចបំពេញក្ដីស្រមៃរបស់ខ្លួន៖
មិនថាមានស្នេហាឬក៏អត់ទេ នារីឯករាជ្យតែងតែមិនបោះបង់ក្ដីស្រមៃរបស់ខ្លួនឡើយ។ នាងនៅតែផ្ដោតលើគម្រោងប្រចាំជីវិតរបស់ខ្លួន និងមិនដើរខុសផ្លូវឡើយ ទោះបីមានអ្នកមកណែនាំឱ្យផ្លាស់ប្ដូរចិត្តក៏ដោយ។ សម្រាប់នាង មនុស្សជាទីស្រលាញ់អាចមានតម្លៃ ប៉ុន្តែមិនអាចមានតម្លៃដល់ថ្នាក់បង្ខំឱ្យនាងផ្លាស់ប្ដូរសុបិនរបស់នាងឡើយ។
៥. នាងរស់នៅក្នុងជីវិតពិត៖
នារីបែបនេះមិនចូលចិត្តចាត់ទុកជីវិតខ្លួនឯងដូចក្នុងរឿងនិទាន ឬរឿងកុននោះទេ។ នាងចេះស្វែងរកអត្ថន័យពិតនៃជីវិតដើម្បីរស់នៅឱ្យមានក្ដីសុខ និងពិតប្រាកដ ដោយមិនបាច់ដេកស្រមៃថា អ្នកដែលនាងត្រូវស្រលាញ់ទាល់តែមានភាពឥតខ្ចោះដូចក្នុងរឿងទេ។ នាងមិនដែលសង្ឃឹមថា ទោះបីគ្រួសារនាងក្រីក្រក៏នៅអាចមានបុរសអ្នកមានចិត្តល្អមកស្រលាញ់ ហើយរស់នៅដូចព្រះនាងឡើយ។
ចុចអាន៖ ២៥ឆ្នាំរបស់មនុស្សស្រីជាវ័យត្រូវរឹងមាំ និងឯករាជ្យ មិនមែនវ័យត្រូវរត់តាមស្នេហាទេ
៦. នាងមិនសូវខ្វល់ខ្វាយរឿងរស់នៅជាមួយគ្នាមុនរៀបការ៖
ការរស់នៅជាមួយគ្នាមុនពេលរៀបការនឹងត្រូវបានគេវាយតម្លៃ និងចាត់ទុកថាខុសឆ្គងនឹងប្រពៃណី។ ប៉ុន្តែសម្រាប់នារីឯករាជ្យមិនបានយករឿងនេះជាទម្ងន់ពេកនោះទេ។ កាលណានាងមើលឃើញថាបុរសណាម្នាក់ល្អសម្រាប់នាង ហើយប្រាកដប្រជា នាងអាចបើកសិទ្ធិក្នុងការរស់នៅក្រោមដំបូលផ្ទះជាមួយគ្នា ដោយមិនបាច់ខ្វល់ពីពាក្យចេចចូចពីអ្នកណាឡើយ។
នាងគិតថា ការប្រឹងរកលុយដើម្បីរៀបការគឺជារឿងដែលអ្នកទាំងពីរត្រូវធ្វើដោយខ្លួនឯង។ ដូច្នេះបើមិនទាន់មានលុយគ្រប់គ្រាន់ រស់នៅជាមួយគ្នាក៏មិនជាបញ្ហា៕