របស់៧យ៉ាង កុំស្លៀក ឬដាក់តាមខ្លួនពេលហោះហើរ ក្រែងមានបញ្ហា
- 2018-06-20 07:55:45
- ចំនួនមតិ 0 | ចំនួនចែករំលែក 0
របស់៧យ៉ាង កុំស្លៀក ឬដាក់តាមខ្លួនពេលហោះហើរ ក្រែងមានបញ្ហា
ការធ្វើដំណើរតាមផ្លូវអាកាសលើកដំបូងគឺជារឿងរំភើបបំផុត។ ទន្ទឹមនឹងអារម្មណ៍រំភើបនេះ អ្នកគួរតែត្រៀមខ្លួនជាស្រេច និងយល់ដឹងពីចំណុចសំខាន់ៗពាក់ព័ន្ធនឹងដំណើរកម្សាន្តជើងផុតពីដីនេះ។ ខាងក្រោមនេះអាចជាជំនួយខ្លះសម្រាប់ស្រីៗយើងដែលមិនទាន់ធ្លាប់មានបទពិសោធន៍ផ្នែកដំណើរផ្លូវអាកាសនេះឱ្យយល់ដឹងពីគន្លឹះស្លៀកពាក់ថា អ្វីដែលគួរនិងមិនគួរស្លៀក ឬដាក់ខ្លួនក្នុងពេលហោះហើរ ដើម្បីជៀសវាងបញ្ហាដោយយថាហេតុ។
១. ទឹកអប់៖
រឿងនេះធ្លាប់ត្រូវបានធ្វើច្រើនមកហើយ ហើយក៏មិនសូវមានអ្នកយកចិត្តទុកដាក់ខ្លាំងដែរ។ ហេតុអីត្រូវហាមទឹកអប់នៅលើយន្តហោះ? ព្រោះដូចយើងដឹងស្រាប់ហើយថា មិនមែនគ្រប់គ្នាសុទ្ធតែអារម្មណ៍ជាមួយក្លិនទឹកអប់នោះទេ។ មានអ្នកខ្លះប្រតិកម្មនឹងក្លិនទឹកអប់ណាមួយ ឬទាំងអស់តែម្ដង។
ដូច្នេះបើមានអ្នកយកទឹកអប់មកបាញ់ផ្ទាល់នៅលើយន្តហោះ ក្លិនរបស់វានឹងធ្វើឱ្យប៉ះពាល់ដល់អ្នកដំណើរដទៃ ហើយគ្រោះថ្នាក់សុខភាពនៅលើយន្តហោះមិនមែនងាយដោះស្រាយដូចនៅលើដីឡើយ។
២. ស្លៀកពាក់រឹបពេក៖
ពេលធ្វើដំណើរតាមយន្តហោះ អ្នកគួរចៀសវាងការស្លៀកពាក់តឹងឬរឹបពេក ជាពិសេសសម្រាប់អ្នកដែលត្រូវធ្វើដំណើរលើសពី៤ម៉ោង។ អ្នកធ្វើដំណើរផ្លូវឆ្ងាយអាចនឹងមានអាការៈឈាមរត់មិនស្រួល ឬស្ទះសរសៃឈាមនៅផ្នែកជើង ដែលអាចបណ្ដាលឱ្យទៅជាហើមជើងបន្តិច។
ដូច្នេះបើស្លៀកពាក់តឹងពេក វានឹងធ្វើឱ្យប៉ះពាល់សុខភាពក្នុងពេលនោះ។ ដើម្បីជៀសវាងអាការៈស្ទះនេះ អ្នកគួរស្លៀកពាក់បែបរលុងៗ ធ្វើម៉េចស្រួលខ្លួនសម្រាប់ខ្លួនឯង ហើយអាចងើបដើរទៅបន្ទប់ទឹកញឹកញាប់សម្រាប់អ្នកដែលងាយនឹងកើតបញ្ហានេះ។
៣. ស្លៀកពាក់រញ៉េរញ៉ៃពេក៖
អ្នកត្រូវដឹងថា បង្គន់នៅក្នុងយន្តហោះមានទំហំតូចខ្លាំងណាស់។ ដូច្នេះបើអ្នកពាក់ខោអាវដែលស្មុគស្មាញ មានច្រើនជាន់ ឬស្លៀកអៀមខោ អ្នកអាចនឹងពិបាកក្នុងពេលស្រាតខោបត់ជើង។ ត្រូវចងចាំថា សម្លៀកបំពាក់ដែលមានឡេវច្រើន ឬរូត នឹងមិនធ្វើឱ្យអ្នកមានផាសុកភាពឡើយក្នុងពេលហោះហើរ។
៤. ពាក់របស់របរដែលធ្វើពីលោហៈ៖
វាមិនមែនជារឿងភ្ញាក់ផ្អើលទេ ដែលថាគ្រឿងអលង្ការធ្វើពីលោហៈអាចនាំឱ្យមានបញ្ហាក្នុងពេលឆែកឆេរមុនឡើងយន្តហោះនោះ ព្រោះអ្នកអាចនឹងធ្លាប់ឮខ្លះពីរឿងនេះថា រាល់របស់របរដែលមានជាតិលោហៈនឹងមិនត្រូវបានអនុញ្ញាតឱ្យយកឡើងយន្តហោះបានទេ។
បើគ្រាន់តែជាស្បែកជើង ឬគ្រឿងអលង្ការដែលធ្វើពីលោហៈត្រូវបានគេឆែកឃើញ ហើយហាមយកឡើងយន្តហោះ អ្នកអាចដោះវាចេញបាន ប៉ុន្តែសម្រាប់សម្លៀកបំពាក់មួយចំនួនដែលមានឡេវ ឬខ្សែរូតធ្វើពីលោហៈដែរនោះ អ្នកច្បាស់ជាពិបាកមិនខាន។ ដូច្នេះត្រូវពិនិត្យ និងជ្រើសរើសសម្លៀកបំពាក់ និងគ្រឿងដាក់តាមខ្លួនឱ្យបានច្បាស់លាស់ ចៀសវាងមានបញ្ហា។
៥. ពាក់ Contact Lense៖
ក្នុងពេលធ្វើដំណើរតាមផ្លូវអាកាស មានភាគរយខ្ពស់ណាស់ដែលអាចនាំឱ្យ Lense ដែលពាក់ក្នុងភ្នែករបស់អ្នកទៅជាស្ងួត និងបណ្ដាលឱ្យរមាស់ភ្នែក។ ដូច្នេះ បើអ្នកត្រូវធ្វើដំណើរផ្លូវឆ្ងាយ គួរប្រើវ៉ែនតាជំនួស Lense ដាក់ភ្នែកទើបមានសុវត្ថិភាព។
៦. ស្បែកជើងកែង៖
សន្តិសុខខាងប្រលានយន្តហោះនឹងស្នើសុំឱ្យដោះស្បែកជើងកែង និងស្បែកជើងឃ្លុបផ្សេងៗចេញ នៅពេលឆែកឆេរសុវត្ថិភាព ព្រោះស្បែកជើងទាំងនេះអាចមានកន្លែងលាក់របស់គ្រោះថ្នាក់។ មិនត្រឹមតែប៉ុណ្ណេះ បើស្បែកជើងអ្នកធ្វើពីលោហៈទៀត អ្នកនឹងមិនអាចយកវាឡើងទៅលើជាមួយបានឡើយ។
ដូច្នេះដើម្បីជៀសវាងបញ្ហា ឬបណ្ដាលឱ្យឈឺ ពេលហើមជើងដូចរៀបរាប់ខាងលើ គួរកុំជ្រើសយកស្បែកជើងប្រភេទនេះអី។
៧. សម្លៀកបំពាក់ដែលមានអក្សរមិនសមរម្យ៖
តិចមិនជឿ? ប៉ុន្តែធ្លាប់មានករណីច្រើនមកហើយ ដែលអ្នកដំណើរត្រូវបានហាមឃាត់ មិនឱ្យហោះហើរដោយសារតែពាក់សម្លៀកបំពាក់ដែលមានសរសេរអក្សរមិនសមរម្យដូចជា ពាក្យចម្អេះចំអាស ពាក្យជេរ ឬពាក្យមើលងាយ រើសអើងណាមួយក៏ដោយ។
យកល្អ គួរស្លៀកសម្លៀកបំពាក់លាត ផ្កា ឬប្រាកដថាគ្មានពាក្យអវិជ្ជមានទាំងនេះឡើយ។
ចុចអាន៖