២៥ឆ្នាំរបស់មនុស្សស្រីជាវ័យត្រូវរឹងមាំ និងឯករាជ្យ មិនមែនវ័យត្រូវរត់តាមស្នេហាទេ
- 2018-06-14 05:04:55
- ចំនួនមតិ 0 | ចំនួនចែករំលែក 0
២៥ឆ្នាំរបស់មនុស្សស្រីជាវ័យត្រូវរឹងមាំ និងឯករាជ្យ មិនមែនវ័យត្រូវរត់តាមស្នេហាទេ
២៥ឆ្នាំទៅហើយអ្នកមិនអាចនៅតែត្រូវការការពារ និងថ្នាក់ថ្នមពីអ្នកដទៃដូចក្មេងទៀតបាននោះទេ ប៉ុន្តែភាពចាស់ទុំអ្នកត្រូវតែមាន។
មកដល់សម័យនេះទៅហើយ កូនស្រីគឺលែងសូវមានការអៀនប្រៀនច្រើនទៀតហើយ ហើយការផ្ដោតទៅលើរឿងមនុស្សប្រុសវិញកាន់តែឆ្ងាយទៅៗទៀត ព្រោះមនុស្សស្រីពេលនេះមិនមែនចាំតែផ្ញើវាសនាអនាគតខ្លួនទៅលើមនុស្សប្រុសទាំងស្រុងទៀតឡើយ។
ជាទូទៅមនុស្សស្រីភាគច្រើនអង្គុយនៅហាងកាហ្វេគឺតែងនិយាយពីបញ្ហាមនុស្សប្រុសដែលខ្លួនបានស្គាល់ ឬមនុស្សប្រុសដែលកំពុងតាមស្រឡាញ់នាង ឬមនុស្សប្រុសដែលនាងលង់ស្រឡាញ់ជាដើម ខណៈមនុស្សប្រុសអង្គុយនិយាយជាពីរឿងការងារ ការរកស៊ី ឬរឿងផ្សេងទៀត។
បែបនេះហើយទើបមនុស្សស្រីមើលទៅអន់ជាងមនុស្សប្រុស ហើយត្រូវបានសង្គមមនុស្សជាច្រើនលើកឡើងថាមនុស្សស្រីមិនបាច់ចេះអីក៏បាន ព្រោះមុននឹងក្រោយគង់តែពឹងលើប្ដីដដែល។
មនុស្សស្រីគ្រប់គ្នាត្រូវចាំណាវ័យ ២៥ឆ្នាំ ជាវ័យដែលអ្នកត្រូវធ្វើជាមនុស្សស្រីដ៏រឹងមាំម្នាក់ ឯករាជ្យម្នាក់ ដោយមានការងារល្អមួយ មានស្ថេរភាពរឿងលុយកាក់ និងរស់នៅដោយមិនបាច់លើការជួយរបស់អ្នកណា។
អ្នកមិនបាច់ព្យាយាមតែងខ្លួនស្អាតពេកទេ បើអ្នកសូម្បីតែលុយក៏ត្រូវសុំពីគេមកទិញគ្រឿងសម្អាងនោះ។ ស្អាតដើម្បីតែចង់រកបានមនុស្សប្រុសល្អម្នាក់នោះ អ្នកគ្មានថ្ងៃបានដូចបំណងឡើយ ព្រោះមនុស្សប្រុសល្អគេនឹងស្វែងរកមនុស្សស្រីល្អដូចគ្នា។
២៥ឆ្នាំ មិនបាច់ខ្លាចថាគ្មានអ្នកណាស្រឡាញ់នោះទេ ព្រោះបើអ្នករឹងមាំ មនុស្សប្រុសនឹងដើរមករកអ្នកដោយឯងៗ។ វ័យនេះអ្នកច្បាស់ណាស់នឹងមានស្នេហា តែកុំបណ្ដោយឲ្យវ័យ ២៥ឆ្នាំអ្នកជាវ័យដែលងប់ងុលនឹងស្នេហា ផ្លាស់ប្ដូរខ្លួនឯងដើម្បីតែស្នេហា និងលះបង់រឿងដែលនៅសល់ជាច្រើនទៀតដើម្បីតែស្នេហា។
ជំនួសឲ្យការចំណាយពេលគិតលើរឿងមនោសញ្ចេតនា អ្នកគួរតែយកពេលនោះទៅ ហាត់ប្រាណ ដើរតាមសួន ដើម្បីឲ្យសុខភាពល្អវិញប្រសើរជាង។ ជំនួសឲ្យការខូចចិត្តព្រោះត្រូវគេក្បត់ចិត្ត អ្នកគួរតែយកពេលដែលអ្នកត្រូវដេកយំនោះ ទៅរៀននៅជំនាញណាមួយដែលអាចជួយអ្នកឲ្យរកលុយបានវិញទើបប្រសើរ ព្រោះពេលនោះអ្នកនឹងអាចផ្គត់ផ្គង់សម្រស់ខ្លួនឯងបាន។
ជំនួសឲ្យការហិចហើរ លលេងនឹងល្បែងស្នេហាអត់ប្រយោជន៍ អ្នកគួរតែយកពេលនោះធ្វើខ្លួនឲ្យច្បាស់លាស់ និងពិតប្រាកដមួយសម្រាប់អនាគតខ្លួនឯង និងគ្រួសារ ព្រោះមនុស្សប្រុសល្អគេមិនយកភ្នែកមើលអ្នកទេ បើអ្នកនៅតែរសាត់គ្មានទិសដៅ។
មនុស្សស្រីដែលចូលវ័យ ២៥ឆ្នាំ មិនទាន់រៀបការគឺគ្មានអីត្រូវភ័យនោះទេ សំខាន់បំផុតអ្នកអាចធ្វើឲ្យជីវិតអ្នករីករាយ ស្រស់ស្អាត និងជួយជ្រោមជ្រែងគ្រួសារឲ្យបានខ្ពង់ខ្ពស់។ កុំគិតថាមនុស្សស្រីត្រូវតែឆាប់រៀបការនោះ ព្រោះបើរៀបការទាំងខ្លួនគ្មានអីសោះ នោះជីវិតអ្នកនឹងចាញ់ប្រៀបគេរហូត ហើយអនាគតកូនៗអ្នកក៏មិនប្រាកដថាអាចល្អដូចកូនៗគេដែរ។
រៀបចំខ្លួនឲ្យល្អ ធ្វើជីវិតឲ្យរឹងមាំ នោះវ័យ២៥ឆ្នាំអ្នក នឹងស្រស់ស្អាតជាទីបំផុត៕