ស្រីៗមុនទិញរបស់ថ្លៃ ប្រេនៗ ត្រូវចេះសួរសំណួរទាំងនេះទៅខ្លួនឯងជាមុនសិន

2018-06-12 10:00:00
ចំនួនមតិ 0 | ចំនួនចែករំលែក 0

សម័យនេះ ការប្រើប្រាស់សម្ភារផ្សេងៗ មិនថាជាគ្រឿងអេឡិចត្រូនិក កាបូប ស្បែកជើង ឬមួយក៏សម្លៀកបំពាក់នោះទេ ភាគច្រើនមានការនិយមទៅលើម៉ាកល្បីៗ និងមានតម្លៃថ្លៃៗ។ យ៉ាងណាមិញ សម្ភារនិយមទាំងអស់នោះ បានធ្វើឲ្យមនុស្សខិតខំប្រឹងប្រែង ប្រកួតប្រជែងសំញែងដាក់គ្នា ទាំងដែលពេលខ្លះភ្លេចគិតថា ខ្លួនឯងមិនសល់លុយ ដោយសារតែការខ្ជះខ្ជាយលើរបស់មិនគួរចំណាយនោះទាល់តែសោះ។ ដូច្នេះហើយ មុនទិញអ្វីមួយដែលមានតម្លៃថ្លៃ អ្នកគួរធ្វើការត្រិះរិះពិចារណា និងសួរខ្លួនឯងជាមុនសិន ដើម្បីទប់ស្កាត់កុំឲ្យមានការចំណាយហួសពីសមត្ថភាព។

សំណួរទី១៖ តើអ្នកធ្លាប់ទិញរបស់នេះដែរទេពីមុនមក?

ឧទាហរណ៍ថាអ្នកចង់ទិញខោអាវថ្លៃ ត្រូវនឹកគិតមើលថានៅផ្ទះមានម៉ូដបែបនេះហើយឬនៅ បើមិនធ្លាប់មានទេ អ្នកអាចបន្តចូលទៅសំនួរទី ២ បាន។ ប្រសិនបើធ្លាប់មានហើយ ត្រូវចងចាំថា អ្នកមិនគួរទិញឲ្យជាន់គរលើគ្នានោះទេ លុះត្រាតែខោអាវនោះប្រើការលែងកើត ព្រោះជាក់ស្តែងបើមានខោអាវក្នុងទូកាន់តែច្រើន អ្នកកាន់តែមិនសូវស្លៀក អីចឹងទិញមកច្រើនពេក នាំឲ្យចង្អៀតទូ កប់ម៉ូដហើយខ្ជះខ្ជាយលុយទៀត។

សំណួរទី២៖ តើអ្នកជាមនុស្សចូលចិត្តទិញអីវ៉ាន់ ឬក៏ញៀនជាមួយសម្ភារនិយមឬទេ?

នេះជាសំណួរដ៏សំខាន់សម្រាប់ស្រីៗ ឧទាហរណ៍ថា អ្នកចង់ទិញកាបូបដែលមានតម្លៃដល់ទៅរាប់រយ ឬរាប់ពាន់ដុល្លារ តើអ្នកប្រាកដទេថា អ្នកអាចប្រើវាបានរាប់ឆ្នាំ ហើយទប់អារម្មណ៍កុំឲ្យទិញបន្តទៀត ទោះបីជាមានម៉ូដចេញថ្វីស្អាតៗទាន់សម័យប៉ុនណាក៏ដោយនោះ? បើគិតថាខ្លួនឯងជាមនុស្សចូលចិត្តផ្លាស់ប្តូរច្រើន ទៅតាមការនិយម ដូច្នេះគួរទិញរបស់ណាដែលមានតម្លៃសមល្មមបានហើយ។

សំណួរទី៣៖ ពេលដែលទិញរបស់ថ្លៃនោះទៅ តើអាចនឹងធ្វើឲ្យអ្នកលំបាកដែរទេ?

ជួនកាលអ្នកត្រូវបែកចែកការចំណាយប្រចាំខែទៅលើថ្លៃផ្ទះផង ថ្លៃសាលាផង ឬសេវាផ្សេងៗទៀត ប៉ុន្តែស្បែកជើងដែលអ្នកប៉ងចង់ទិញជាយូរមកហើយនោះ មានតម្លៃលើសពីថ្លៃចំណាយប្រចាំខែទៅទៀត។ ដើម្បីកុំឲ្យនាំភាពលំបាកមកដាក់ខ្លួន អ្នកត្រូវធ្វើការសន្សំម្តងបន្តិចៗសិន បានគ្រប់កាលណាសឹមទិញតាមក្រោយក៏បាន។

សំណួរទី៤៖ តើអ្នកទិញដោយសារតែការពេញចិត្ត ឬដោយសារតែរបស់នោះមានម៉ាកល្បី?

របស់ថ្លៃតែងមានការច្នៃប្រឌិតដ៏ទាក់ទាញ ប៉ុន្តែបើការច្នៃម៉ូដនោះ មិនមែនជារសនិយមរបស់អ្នក ហេតុអ្វីត្រូវចំណាយទៅលើរបស់ដែលគ្រាន់មានម៉ាកល្បី ដោយគ្មានការពេញចិត្តពិតប្រាកដ?

សំណួរទី៥៖ បើសិនជាមិនមានបណ្តាញសង្គម Instagram facebook តើអ្នកនឹងទិញវាដែរអត់?

ការទិញរបស់របរប្រើប្រាស់ជាសិទ្ធិរបស់បុគ្គលម្នាក់ៗ ប៉ុន្តែបើអ្នកទិញដោយសារហេតុផលតែមួយគត់ គឺចង់ថតបង្ហោះនៅក្នុង facebook ឬInstagram ដើម្បីឲ្យគេឯងបានឃើញនោះ គួរគិតពិចារណាឡើងវិញ។

សំណួរទី៦៖ តើអ្នកទិញព្រោះតែតម្រូវការ ឬដោយសារតែអារម្មណ៍មួយឆាវ?

សព្វថ្ងៃនេះ សម្បូរណាស់អ្នកលក់តាមអនឡាញ ឬហាងនានាធ្វើការផ្សព្វផ្សាយ និងមានប្រូម៉ូសិនពិសេសៗជាច្រើនដែលឃើញហើយ អ្នកអាចពិបាកនឹងទប់អារម្មណ៍។ បើអ្នកចេះតែជក់ចិត្តនឹងកម្មវិធីប្រូម៉ូសិនអស់ទាំងនោះ អ្នកច្បាស់ជាអស់លុយដោយមិនដឹងខ្លួន។

សំណួរទី៧៖ តើអ្នកប្រើប្រាស់វាញឹកញាប់ដែរទេ?

គ្មានអ្វីខុសទេ បើគ្រាន់តែទិញរបស់ថ្លៃដើម្បីលើកទឹកចិត្តខ្លួនឯងនោះ ប៉ុន្តែបើយល់ថា ទិញទៅមិនសូវបានប្រើប្រាស់ ហើយយកមកទុកចោលដដែល គួរកុំអីល្អជាង ព្រោះលុយមិនមែនស្រួលរកទេ។

សំណួរទី៨៖ តើអ្នកទិញដោយសារតែឃើញតារាៗ ឬអ្នកល្បីៗប្រើមែនដែរឬទេ?

មានមនុស្សជាច្រើន តែងចង់ចម្លងស្ទីលនៃការស្លៀកពាក់ពីតារា ឬអ្នកល្បីៗ នៅក្នុងបណ្តាញសង្គម ប៉ុន្តែសូមកុំភ្លេចថា ពេលខ្លះអ្នកទាំងអស់នោះ មានអ្នកឧបត្ថម្ភឲ្យ ព្រោះពួកគេជាមនុស្សល្បីស្រាប់ ហើយបើអ្នកចង់ប្តូរម៉ូដច្រើនដូចជាតារាល្បីដែរនោះ អ្នកនឹងរីងរៃអស់ពីខ្លួន៕