បើចង់ជោគជ័យមែន គួរតែសួរសំណួរ ៨ នេះទៅខ្លួនឯងជាមុនសិន

2018-06-04 09:38:35
ចំនួនមតិ 0 | ចំនួនចែករំលែក 0

គ្មាននរណាដែលថាមិនចង់ជោគជ័យ ក្នុងជីវិតនោះឡើយ គ្រាន់តែមិនដឹងពីវិធីជួយឲ្យសម្រេចក្ដីស្រមៃ។ បើអ្នកពិតជាចង់ជោគជ័យមែន អ្នកគួរតែសួរខ្លួនឯងនូវសំណួរទាំង ៨ នេះសិន ទើបរកផ្លូវរក៖

១.តើសកម្មភាពណាមួយដែលធ្វើឲ្យអ្នកមានអំណរ?

ព្យាយាមឆ្លើយសំណួរនេះឲ្យបានលឿនបំផុតតាមដែលអាចធ្វើទៅបាន។ បើអ្នកពិតជាអាចរកចម្លើយឃើញពិតមែន ជីវិតអ្នកអាចមានពន្លឺ និងជួយអ្នកឲ្យរីកចម្រើនថែមទៀតផង។ វាអាចជាគន្លឹះក្នុងការចាប់ផ្ដើមអាជីវកម្ម និងដឹងពីចំណង់ចំណូលចិត្តខ្លួនឯង។

រូបតំណាង

**២.ប្រសិនបើទំនាក់ទំនងស្នេហា ឬការងារធ្វើឲ្យអ្នកមិនសប្បាយចិត្ត តើអ្នកនៅបន្ត ឬចាកចេញ?**

ត្រូវដឹងពីបញ្ហាផ្ទាល់ខ្លួនមួយនេះជាមុនសិន ទើបអាចផ្លូវត្រូវបាន។ តើអ្នកអាចទ្រាំបានយូរប៉ុណ្ណាប្រសិនបើការងារ ស្នេហា ឬមិត្តភាពធ្វើឲ្យអ្នកខឹងមិនឈប់នោះ? ប្រសិនបើក្នុងចំណោមរឿង ២-៣ នោះប៉ះទង្គិចផ្លូវចិត្តអ្នកខ្លាំង ហើយអ្នកអាចប្រយុទ្ធតទល់នឹងវាបានរហូត នោះបញ្ជាក់ថាអ្នកជាមនុស្សរឹងមាំណាស់។

៣.តើរឿងអ្វីដែលរារាំងអ្នកមិនឲ្យសប្បាយចិត្តបាន?

គួរតែគិតពីហេតុផលដែលធ្វើឲ្យអ្នកស្ថិតក្នុងស្ថានភាពសោកសៅ។ នេះជាបញ្ហាត្រូវការដោះស្រាយភ្លាមៗ ទើបជីវិតមិនស្មុគស្មាញ ហើយអ្នកអាចដើរលើផ្លូវរលូនបានខ្លះ តែបើសូម្បីរឿងមិនសប្បាយចិត្ត ក៏មិនអាចដោះស្រាយបាន នោះជាឧបសគ្គមួយរារាំងភាពជោគជ័យរបស់អ្នកហើយ។

៤.តើអ្នកជឿថា អ្នកអាចធ្វើរឿងពិបាកៗបានដែរឬទេ?

នេះជាឱកាសធ្វើឲ្យសុបិនក្លាយជាការពិតបានឬមិនបាន។ នៅពេលអ្នកឆ្លើយសំណួរមួយនេះ នឹងដឹងថាអនាគតទៅជាយ៉ាងណា។ បើសូម្បីខ្លួនឯងមិនទាំងជឿជាក់លើខ្លួនឯងថា អាចពុះពារគ្រប់រឿងរ៉ាវពិបាកៗបានផង អ្នកពិតរកផ្លូវជោគជ័យមិនឃើញទេ។

៥.តើអ្នកចង់ឲ្យអ្នកដទៃដឹងពីអ្នកយ៉ាងដូចម្ដេច?

គ្មានមនុស្សណាដែលមិនស្រមៃថា អ្នកដទៃនឹងនិយាយពីរឿងល្អៗដែលអ្នកធ្លាប់បានធ្វើកន្លងមក។ ប៉ុន្តែបើអ្នកមិនធ្លាប់គិតបែបនោះទេ អ្នកពិតជាមិនអាចរកផ្លូវឈានទៅភាពត្រចះត្រចង់បានដែរ ព្រោះអ្នកអាចមិនធ្លាប់បានធ្វើរឿងអ្វីអស្ចារ្យមួយសោះ។

៦.តើអ្នកគិតថា អ្នកដទៃមានអារម្មណ៍យ៉ាងណាចំពោះអ្នក?

សំណួរនេះចង់បង្ហាញថា អ្នកធ្លាប់ដឹងពីអារម្មណ៍ដទៃមានចំពោះខ្លួនដែរឬទេ។ បើអ្នកមិនដឹង នោះវាមានន័យថា អ្នកមិនដែលខ្វល់ពីការគិតអ្នកផ្សេងមានចំពោះខ្លួនឯង។ សំណួរមួយនេះ គឺអាចបង្រៀនអ្នកច្រើនទៀតអំពីខ្លួនអ្នក ជាងអ្នកដទៃ។ វានឹងជួយអ្នករកឃើញភាពទន់ខ្សោយ និងគុណវិបត្តិ ដូច្នេះអ្នកអាចបង្វែរវាទៅជាចំណុចខ្លាំង។

រូបតំណាង

៧.តើអ្នកជឿថា វាសនារបស់អ្នកត្រូវកំណត់ជាមុន ឬស្ថិតនៅក្នុងកណ្ដាប់ដៃរបស់អ្នក?

សំណួរបែបនេះ នឹងធ្វើឲ្យដឹងកាន់តែច្បាស់ថា ជោគជ័យបែរមុខទៅខាងណា។ ប្រសិនបើអ្នកគិតថា ជោគវាសនាអ្នកត្រូវបានកំណត់ជាមុន អ្នកនឹងទទួលបានតែភាពបរាជ័យ និងបាត់បង់តែប៉ុណ្ណោះ។ ប៉ុន្តែបើអ្នកជាមនុស្សមិនជឿលើព្រេងវាសនា បញ្ជាក់ថាជាមនុស្សមានឆន្ទៈស្វះស្វែងទៅរកភាពរីកចម្រើន។

៨.នៅក្នុងគំនិតអ្នក តើអត្ថន័យនៃជីវិតមានន័យយ៉ាងដូចម្ដេច?

សួរខ្លួនឯងថា ហេតុអ្វីបានជាអ្នកនៅទីនេះ? តើអ្នកមានឥទ្ធិពលអ្វីលើពិភពលោក និងមនុស្សនៅជុំវិញអ្នក? សំណួរនេះនឹងផ្ដល់ឲ្យអ្នកនូវចម្លើយយ៉ាងស៊ីជម្រៅ ដែលធ្វើឲ្យខ្លួនឯងដឹងថាអ្នកពិសេសចំពោះពិភពលោកនេះ ហើយវានឹងជំរុញអ្នករកឃើញផលវិជ្ជមាន ជាជាងរឿងអវិជ្ជមាន៕

ចុចអាន៖ឈប់ប្រើពាក្យថា «ជាតិនេះឆាចោល» តែត្រូវងាកមកពិចារណារឿងទាំងនេះវិញ

ប្រភព៖ Careergirldaily ប្រែសម្រួល៖ ទ្រី រ៉ាវី