រឿងសំខាន់ៗដែលកូនក្រមុំត្រូវដឹង មួយអាទិត្យមុនថ្ងៃចូលរោងការមកដល់

2018-05-22 06:14:10
ចំនួនមតិ 0 | ចំនួនចែករំលែក 0

ទីបំផុតថ្ងៃដែលអ្នកប៉ងប្រាថ្នាបានមកដល់ហើយ អ្នកច្បាស់ជាមានរឿងជាច្រើនត្រូវធ្វើ ហើយប្រហែលជាមិនដឹងថាត្រូវធ្វើអីទុកអីទេ ប៉ុន្តែយ៉ាងហោចណាស់ អ្នកអាចដឹងថាអ្វីគូរធ្វើ អ្វីមិនគួរធ្វើក្នុងពេលមួយអាទិត្យមុនថ្ងៃចូលរោងការ។

១. មិនត្រូវកាត់សក់

អ្នកប្រហែលជាចង់ឲ្យសក់មើលទៅ មានស្ទីលថ្មីប្លែក ប៉ុន្តែនេះមិនមែនជាពេលដ៏ល្អសម្រាប់អ្នកនោះទេ។ អ្នកគួរទៅរកជាងដែលធ្លាប់កាត់ឲ្យពីមុនមក គ្រាន់តែតម្រឹមបន្តិចបន្តួចបានហើយ ទើបអ្នកមិនស្តាយក្រោយក្នុងថ្ងៃពិសេសរបស់អ្នក។

២. គេងឲ្យបានគ្រប់គ្រាប់

ជិតដល់ថ្ងៃនោះមិនថាសាច់ញាតិ ក្រុមគ្រួសារ ឬកូនក្រមុំទេ គឺរវល់តែទាំងអស់គ្នាហ្នឹង យ៉ាងណាមិញអ្នកត្រូវតែឆ្លៀតពេល សម្រាកនិងគេងឲ្យបានគ្រប់គ្រាន់ ដើម្បីកុំឲ្យបាក់កម្លាំង បាក់សម្រស់ភ្នែកស្លក់ មើលទៅមិនស្អាត។

៣. កុំតមអាហារនិងហាត់ប្រាណខុសពីអ្វីដែលធ្វើប្រចាំថ្ងៃ

បើអ្នកភ័យព្រួយខ្លាចធាត់ ស្លៀករ៉ូបមិនចុះ សូមកុំព្យាយាមអត់អាហារ និងហាត់ប្រាណសម្រុកខ្លាំងៗ ព្រោះវានឹងមិនបានផល ថែមទាំងអាចធ្វើឲ្យអ្នកឈឺខ្លួនអត់ប្រយោជន៍។ បើរ៉ូបអ្នកសមល្មមនឹងខ្លួនហើយ អ្នកអាចហាត់ប្រាណតាមធម្មតា និងញ៉ាំអាហារដែលជួយឲ្យសុខភាពល្អ ក្នុងបរិមាណសមរម្យ ឲ្យបានទៀងទាត់។

៤. មិនផ្លាស់ប្តូរគ្រឿងសម្អាង និងផលិតផលថែរក្សាស្បែក

បើអ្នកធ្លាប់តុបតែងមុខ និងថែរក្សាស្បែកជាមួយផលិតផលប្រចាំថ្ងៃណាមួយ អ្នកគូរបន្តប្រើរហូតដល់ថ្ងៃរៀបការ ព្រោះការផ្លាស់ប្តូរ ក្នុងករណីផលិតផលនោះធ្វើឲ្យស្បែកអ្នកប្រតិកម្ម វាច្បាស់ជាពិបាកកែខៃ ឲ្យទាន់ពេលវេលាណាស់។ ម្យ៉ាងទៀតគួរជៀសឲ្យផុត ពីការបកឬខាត់ស្បែក ដែលមានសារធាតុគីមីផ្សេងៗ។

៥. លស្បែកជើងដែលត្រូវពាក់

ត្រូវប្រាកដថា ស្បែកជើងដែលពាក់ពេញមួយយប់ គឺមិនឲ្យតឹងពេក កែងចោទខ្លាំងពេក ព្រោះវាអាចឲ្យអ្នកឈឺជើង ឈរមិនបានយូរហើយរាំជាមួយកូនកំលោះមិនកើតទៀត។

៦. កុំខ្លាចក្នុងការស្វែងរកជំនួយ

អ្នកអាចស្វែងរកជំនួយពីបងប្អូន ឬមិត្តជិតស្និទ្ធចំពោះរឿងណាដែលអាចពឹងពាក់បាន មកធ្វើជុំគ្នា បានទាំងការចងចាំល្អហើយ ថែមទាំងធ្វើឲ្យអ្នកមិនស្មុគស្មាញចំពោះរឿងតូចតាច និងមានពេលសម្រាប់ធ្វើអ្វីផ្សេងទៀត។

៧. មិនតក់ក្រហល់ មុនថ្ងៃចូលរោងការ

ខ្វះមួយអាទិត្យមុនចូលរោង អ្នកគូរព្យាយាមបញ្ចប់អ្វីៗដែលបានគ្រោងទុកប៉ុន្មានខែមុនឲ្យអស់ ទើបមិនតក់ក្រហល់ពិបាកខ្លាំង ពេលថ្ងៃដ៏ធំជិតមកដល់។

៨. មិនកើតទុក្ខ

ទុក្ខកង្វក់ទាំងប៉ុន្មានត្រូវបំភ្លេចចោលឲ្យអស់ ធ្វើចិត្តឲ្យសប្បាយ ត្រៀមខ្លួនស្វាគមន៍សម្រាប់ជីវិតថ្មី ជាមួយនឹងអនាគតស្វាមីរបស់អ្នក។

៩. មានពេលនៅជាមួយដៃគូ

វាជាពេលដ៏សំខាន់ដែលអ្នកទាំងពីរ ត្រូវចំណាយពេលនៅជាមួយគ្នាឲ្យបានច្រើន បង្កើតស្នាមញញឹម អនុស្សាវរីយ៍ល្អៗ ហើយកម្ចាត់ឲ្យអស់នូវការខឹងអន់ចិត្តនឹងគ្នា ឬរឿងណាដែលអាចរំខានដល់អារម្មណ៍អ្នកទាំងពីរ។