វិធីបង្រៀនកូនតូចឱ្យឆាប់ចេះនិយាយ ឪពុកម្ដាយគួរតែយល់ដឹង

2018-05-21 09:22:25
ចំនួនមតិ 0 | ចំនួនចែករំលែក 0

តាំងពីកើតមក ទារកត្រូវទទួលការលូតលាស់តាមដំណាក់កាលនីមួយៗក្នុងជីវិត។ តាំងពីដំណាក់កាលចេះយំ អាចមើលឃើញ ចេះចាប់កាន់របស់ ចេះប្រតិកម្មតបនឹងសកម្មភាពឬរបស់ដែលគេមើល ក៏ដល់ដំណាក់កាលចេះនិយាយ។ ថ្ងៃនេះ វិបសាយ កញ្ញា សូមណែនាំឪពុកម្ដាយឱ្យបានយល់ដឹងពីការលូតលាស់នៃការចេះនិយាយរបស់កូនតូច និងវិធីជំរុញកូនបន្ថែម។

តើកូនតូចចាប់ផ្ដើមចេះនិយាយនៅពេលណា?

ជាទូទៅ ទារកចាប់ផ្ដើមចេះបញ្ចេញសំឡេងតាំងពីអាយុ២ខែមកម្ល៉េះ គ្រាន់តែនោះជាសំឡេងថ្ងូរ ឬបញ្ចេញស្នូរវ៉ៗជាដើម។ ទាំងនេះគឺជាដំណាក់កាលដំបូងនៃការរៀននិយាយរបស់ក្មេង ដែលអាចឈានទៅដល់ការរអ៊ូអេសអូសច្រើនដងនៅអាយុ៤ខែ។ បន្តមកទៀត ដល់អាយុ១២ខែ ទារកចាប់ផ្ដើមចេះប្រើពាក្យគោលមួយចំនួនដូចជា ហៅម៉ាក់ៗ ប៉ាៗ ឬពាក្យគូៗជាច្រើនទៀតដែលងាយបញ្ចេញសំឡេង និងងាយចាំ។

ចូលដល់អាយុ២ឆ្នាំ ក្មេងអាចចេះនិយាយឃ្លាងាយៗដែលមានត្រឹម៣-៤ពាក្យ និងពាក្យស្រួលៗដូចជា សួស្ដី ជម្រាបលា ទៅ ជាដើម។ ចំណែកដល់អាយុ៣ឆ្នាំ កូនតូចអាចចំណាំរបស់បានច្រើនជាងនេះ និងចេះបែងចែកពាក្យខ្ញុំ គាត់ គេបានល្អជាងមុន និងអាចចាប់ផ្ដើមនិយាយសន្ទនាបានស្ទាត់។

ឪពុកម្ដាយគួរធ្វើអ្វីខ្លះដើម្បីឱ្យកូនឆាប់ចេះនិយាយ?

មិនប្រាកដថា ដល់អាយុដូចរៀបរាប់ខាងលើ ក្មេងដឹងតែអាចធ្វើបានទាំងអស់នោះទេ។ ក្មេងខ្លះអាយុច្រើនហើយនៅតែមិនទាន់អាចបញ្ចេញសំឡេងជាពាក្យបានត្រឹមត្រូវ ឬមិនសូវចងចាំពាក្យសម្រាប់និយាយឆ្លើយឆ្លងបាន។ ដូច្នេះឪពុកម្ដាយអាចជួយជំរុញបន្ថែមដើម្បីឱ្យការលូតលាស់របស់កូនកាន់តែបានល្អ និងមានទំនាក់ទំនងល្អ។

- ឧស្សាហ៍និយាយជាមួយកូនតាំងពីនៅតូច៖

ការនិយាយជាមួយកូនតាំងពីពួកគេនៅតូចៗគឺជាវិធីដ៏ល្អមួយដើម្បីបង្រៀនឱ្យកូនចេះហារមាត់ បញ្ចេញសំឡេង និងចងចាំពាក្យដែលអ្នកនិយាយទៅកាន់ពួកគេ។ តាមការសិក្សាបានឱ្យដឹងថា ការនិយាយជាមួយកូនឱ្យបានឆាប់ចាប់ពីអាយុ៣ខែឡើងទៅ អាចជួយឱ្យទារកលូតលាស់ផ្នែកខួរក្បាល និងភាសាបានល្អជាងក្មេងដែលមិនសូវមានអ្នកនិយាយជាមួយ។

- ឧស្សាហ៍អាន ឬច្រៀងឱ្យកូនស្ដាប់៖

ចម្រៀងនិងការអានគឺជាស្ពានមួយដែលអាចចងកូនៗឱ្យយកចិត្តទុកដាក់នឹងការប្រើពាក្យ និងចងចាំពាក្យទាំងនោះបានល្អ។ ការស្ដាប់យូរៗ អាចឱ្យកូនរៀនហាមាត់បញ្ចេញសំឡេងតាមអ្វីដែលគេអាចស្ដាប់បាន។

- រៀបរាប់ពីអ្វីមួយនៅជុំវិញខ្លួនឱ្យកូនស្គាល់ ជាជាងហៅឈ្មោះតែមួយមុខ៖

ក្រៅពីនិយាយពាក្យឱ្យគេស្ដាប់ហើយ អ្នកគួររៀបរាប់ ឬពន្យល់អ្វីដែលនៅជុំវិញខ្លួនឱ្យគេបានដឹង និងចំណាំផង។

- ចេះសួរនិងនិយាយសន្ទនាជាមួយកូនឱ្យបានច្រើន៖

ការសួរគេ នៅពេលគេចង់បានអ្វីមួយ ឬអនុញ្ញាតឱ្យគេសួរអ្វីដែលគេចង់ដឹង គឺជាការបង្រៀនឱ្យកូនចេះចាំពាក្យ និងប្រើពាក្យពេចន៍បានល្អ។

- ប្រើភាសាណាដែលអ្នកពេញចិត្ត និងប្រើរាល់ថ្ងៃជាមួយកូន៖

ភាសាដែលនិយាយជាមួយកូនគឺជារឿងសំខាន់ ព្រោះវានឹងដក់ជាប់ខួរក្បាលគេតាំងពីតូចមក។ ដូច្នេះគួរជ្រើសរើសភាសាណាដែលគេអាចប្រើបានរាល់ថ្ងៃ មិនមែនប្រើតែក្នុងគ្រួសារមួយមុខទេ តែត្រូវតែអាចប្រើនៅខាងក្រៅបាន ព្រោះមានគ្រួសារខ្លះប្រើភាសាជាមួយកូនជាភាសាអង់គ្លេស ដល់ពេលចេញទៅក្រៅ មានអ្នកនិយាយភាសាខ្មែរដាក់ កូនពិបាកស្ដាប់បាន។ នេះក៏អាចជាបញ្ហាមួយដែលឪពុកម្ដាយគួរយកចិត្តទុកដាក់ផងដែរ៕

ចុចអាន៖ ម្ដាយគួរធ្វើរឿង ៧ យ៉ាងនេះ ដើម្បីជួយឲ្យកូនមានមិត្តសម្លាញ់តាំងពីនៅក្មេង

ចុចអាន៖ ៦ ចំណុចដាស់តឿន ឪពុកម្ដាយមានកូនតូចៗត្រូវប្រយ័ត្ន បើមិនចង់ស្ដាយក្រោយអស់មួយជីវិត

ប្រភព៖ momjunction ប្រែសម្រួល៖ សរ សុគន្ធី