ជាប់រឿងអាស្រូវដូចគ្នា Yang Mi បានទេវតាជួយ តែ Fan Bingbing ត្រូវអារក្សជាន់
- 2018-05-16 03:19:47
- ចំនួនមតិ 0 | ចំនួនចែករំលែក 0
ជាប់រឿងអាស្រូវដូចគ្នា Yang Mi បានទេវតាជួយ តែ Fan Bingbing ត្រូវអារក្សជាន់
ជួបរឿងអាស្រូវក្នុងពេលតែមួយតែ រឿងភាគ "The Legend of Fuyao” របស់តារាសម្ដែងស្រី Yang Mi នៅតែបានចាក់ផ្សាយធម្មតា ខណៈរឿងភាគ "Win The World” របស់តារាសម្ដែង Fan Bingbing ត្រូវបានគេកប់ចោល។
កាលពីថ្ងៃទី៩ខែឧសភាកន្លងទៅនេះ បណ្ដាញព័ត៌មាន Sina បានរាយការណ៍ថា រឿងភាគ "Win The World” របស់រាជិនីទូរទស្សន៍ Fan Bingbing ដែលបានបោះទុនរាប់សិបលានដុល្លារដើម្បីផលិតនោះ គឺជួយអ្វីលែងបាន ហើយអាចនឹងត្រូវបិទចោលជារៀងរហូតត្បិតតួឯកប្រុសពាក់ព័ន្ធនឹងអាស្រូវរំលោភគេនៅប្រទេសអូស្ត្រាលី។ អត្រាដែលក្រសួងពាក់ព័ន្ធអនុញ្ញាតឲ្យចាក់ផ្សាយគឺទាបបំផុត ស្ទើរតែស្មើសូន្យតែម្ដង។ ក្រុមការងារកំពុងតែចង់ដំឡើងតួឯកប្រុសទី២ឡើងជាតួឯកតែម្ដង ដោយការថតឈុតខ្លះឡើងវិញ។
យ៉ាងណាក្ដី គម្រោងដើមត្រូវបានចាយលុយច្រើនពេក ហើយបើចង់ថតឡើងវិញ ក៏ចាយលុយមិនតិចដែរ ដូចនេះផលិតករកំពុងតែរារែកចិត្តខ្លាំង។
ស្ថិតក្នុងស្ថានភាពស្រដៀងនឹង Fan Bingbing ដែរគឺតារាសម្ដែងជួរមុខ Yang Mi តែនាងត្រូវបានទេវតាសំណាងជួយ។ តាមនោះដែរ កាលពីខែកន្លងទៅ អ្នកម្ដាយកូន១ជាប់រឿងអាស្រូវបំបាត់លុយសប្បុរសធម៌ដែលខ្លួនបានរៃអង្គាស។ ដល់ពេលបែកធ្លាយរឿងទៅ ទើបនាងព្រមបរិច្ចាគ។ ក្រោយពេលហេតុការណ៍នេះកើតឡើង គេបានរំពឹងថា កំពូលរឿងភាគប្រចាំឆ្នាំរបស់នាង "The Legend of Fudao” នឹងមិនត្រូវបានបញ្ចាំង ឬយ៉ាងហោចណាស់ក៏ត្រូវបានពន្យារពេលបញ្ចាំងដើម្បីឲ្យរឿងអាស្រូវនេះស្ងប់ទៅវិញដែរ។
យ៉ាងណាក្ដី ហាក់ដូចជាមានរាសីខ្ពស់ រឿងរបស់ស្រីស្អាតវ័យ៣២ឆ្នាំនៅតែបានបញ្ចាំងតាមគម្រោងដើមដដែល។ តាមនោះដែរ "The Legend of Fuyao” នឹងបង្ហាញមុខភាគដំបូងនៅថ្ងៃទី១៩ខែមិថុនា ខាងមុខ នៅលើប៉ុស្តិ៍ Zhejiangក្រោយពេលរឿង "Summer Ballon” ចប់៕