បុគ្គលិកខ្លះចង់បានប្រាក់ខែខ្ពស់ ប៉ុន្តែមិនអាចធ្វើរឿង ៦ យ៉ាងនេះបាន
- 2018-05-16 01:00:00
- ចំនួនមតិ 0 | ចំនួនចែករំលែក 0
បុគ្គលិកខ្លះចង់បានប្រាក់ខែខ្ពស់ ប៉ុន្តែមិនអាចធ្វើរឿង ៦ យ៉ាងនេះបាន
នរណាក៏ចង់បានការងារមានស្ថិរភាពប្រាក់ខែខ្ពស់ ប៉ុន្តែពេលប្រាក់បៀវត្សរ៍បានប៉ុណ្ណោះហើយ តែងចង់បានប៉ុណ្ណោះថែមទៀត ដោយមិនមើលពីលទ្ធផលការងារខ្លួនឯង។ តើអ្នកធ្លាប់សួរខ្លួនឯងថា អ្នកបានរួមចំណែកធ្វើអ្វីខ្លះ ឬចាំតែសុំប្រាក់ខែខ្ពស់ដោយខំប្រឹងប្រែងតិចតួច? ៦ យ៉ាងខាងក្រោមនេះ បុគ្គលិកខ្លះធ្វើមិនបានឡើយ តែចង់មានប្រាក់ខែខ្ពស់៖
១.ចង់សម្រាកចុងសប្ដាហ៍
ជាញឹកញាប់បុគ្គលិកការិយាល័យនៅថ្ងៃសៅរ៍-អាទិត្យ គឺមិនធ្វើការទេ។ តែបើអ្នកលះបង់ថ្ងៃចុងសប្ដាហ៍ពីរ-បីដងទៅធ្វើការឲ្យក្រុមហ៊ុន ហើយខិតខំធ្វើអស់ពីចិត្តនោះ នេះប្រហែលជាឱកាសដើម្បីបង្កើនតំណែងរបស់អ្នកនៅក្នុងក្រុមហ៊ុន។ ផ្ទុយទៅវិញអ្នកតែងតែត្អូញពីការនឿយហត់មិនឈប់ និងចុងសប្ដាហ៍ចង់ដើរលេងសប្បាយ ហើយពេលឃើញអ្នករួមការងារមកធ្វើ រួចទទួលបានលទ្ធផលល្អតាំងច្រណែនគេ។
**២.ទៅធ្វើការមិនទាន់ម៉ោង**
បើមានភាពយឺតយ៉ាវទៅម្ដងម្កាល វាមិនមានបញ្ហាអ្វីឡើយ។ ប៉ុន្តែបើអ្នកជាបុគ្គលិកល្អ អ្នកគួរតែចំណាយពេលខ្លះ ដើម្បីដោះស្រាយបញ្ហាដោយធ្វើឲ្យបានលើសម៉ោងសងវិញ កុំឲ្យតែដល់ម៉ោងមិនទាន់ រៀបចំឥវ៉ាន់ចេញទៅបាត់។
៣.អ្នកដទៃធ្វើមិនដល់ខ្លួន
អ្នកតែងតែគិតថាការងារអ្នកធ្វើ គឺមានតម្លៃខ្ពស់ជាងអ្វីដែលបុគ្គលិកដទៃធ្វើ ហើយចង់បានការលើកទឹកចិត្តពីមេកើយខ្លួន។ នេះវាប្រៀបដូចជានិស្សិតទើបបញ្ចប់ការសិក្សាមានសមត្ថភាពខ្ពស់ ប៉ុន្តែចង់បានប្រាក់បៀវត្សរ៍ខ្ពស់ជាងបុគ្គលិកដែលមានបទពិសោធន៍យូរអង្វែង។ កុំគិតថាអ្នកដទៃធ្វើការមិនដល់ខ្លួនឯងឲ្យសោះ ទោះអ្នកអាចរកប្រាក់ចំណេញបានរាប់លានដល់ក្រុមហ៊ុនក៏ដោយ។
៤.គ្មានឆន្ទៈ
ឆន្ទៈនៃការរីកចម្រើន ត្រូវចាប់ផ្ដើមចេញពីក្នុងចិត្តគំនិតបុគ្គលិកម្នាក់ៗ។ នេះ គឺជាប្រភពជំរុញចិត្តរបស់អ្នកឲ្យក្លាហាន និងខិតខំប្រឹងប្រែងបន្ថែមទៀត ដើម្បីឲ្យខ្លួនទទួលប្រាក់ខែសមនឹងសមត្ថភាព។ ការរីកចម្រើនក្នុងក្រុមហ៊ុន ជាកត្តាដ៏សំខាន់ក្នុងការជួយឲ្យអ្នករីករាយជាមួយអ្វីដែលខ្លួនមាន។ ប៉ុន្តែ ប្រសិនបើអ្នកចង់បានប្រាក់ខែខ្ពស់ តាំងគ្មានឆន្ទៈជួយឲ្យកន្លែងការងារសម្រេចគោលដៅផងនោះ តើអ្នកសមនឹងទទួលបានប្រាក់ខែខ្ពស់ដែរឬទេ។
៥.គ្មានទំនួលខុសត្រូវ
ប្រសិនបើអ្នកធ្វើខុស ហើយទទួលខុសត្រូវចំពោះកំហុស នោះអ្នកជាមនុស្សថ្លៃថ្នូរជាងអ្នកធ្វើខុសហើយក៏បន្ទោសទៅអ្នកដទៃ។ ការទទួលខុសត្រូវរបស់មនុស្សគ្រប់រូប នឹងត្រូវថ្នាក់លើទទួលស្គាល់ថាជាមនុស្សមានក្រមសីលធម៌វិជ្ជាជីវៈក្នុងការងារ។ ដូចនេះខ្លួនធ្វើខុសកុំរុញទៅអ្នកដទៃ ឬអ្នកក្រោមបង្គាប់ ព្រោះធ្វើឲ្យអ្នកគ្មានភាពរីកចម្រើន។
៦.ខ្លាចក្រុមហ៊ុនចំណេញ
បុគ្គលិកខ្លះ ឲ្យតែធ្វើការលើសបន្តិចបន្តួចលើកធ្វើគុណសម្បត្តិ និងយកបានប្រាក់បន្ថែមមិនឈប់ ដោយមិនចង់ឲ្យក្រុមហ៊ុនបានចំណេញខ្លះឡើយ។ អ្នកដែលអ្នកធ្វើការឲ្យគេបែបនេះ មិនសមនឹងទទួលបានប្រាក់ខែល្អឡើយ។ ទាល់តែអ្នកដាច់ចិត្តដាក់កាយធ្វើការងារឲ្យក្រុមហ៊ុនមិនគិតពីផលចំណេញខ្លួនឯងពេក នោះទើបមានឱកាសឡើងប្រាក់បានខ្ពស់៕
ចុចអាន៖កុំឲ្យជីវិតតែលតោលគ្មានទិសដៅពិតប្រាកដ អ្នកគួរងាកមករៀនពីរឿងទាំងនេះ