បែកគ្នាហើយ កុំធ្វើរឿងទាំងនេះដាក់ Ex នាំតែគេបានចិត្ត និងមើលងាយ
- 2018-05-14 03:04:21
- ចំនួនមតិ 0 | ចំនួនចែករំលែក 0
បែកគ្នាហើយ កុំធ្វើរឿងទាំងនេះដាក់ Ex នាំតែគេបានចិត្ត និងមើលងាយ
របួសដែលបានកើតឡើងហើយ ទោះបីជាសះក៏ដោយ ក៏នៅតែមានស្លាកស្នាមជាប់ដែរ។ ស្នេហាក៏ដូចគ្នា រវាងមនុស្សពីរនាក់ បើជ្រុលជាបែកគ្នាហើយ គឺពិបាកនឹងបំភ្លេចស្លាកស្នាមឈឺចាប់ ហើយមកត្រូវគ្នាវិញបានណាស់។ ដូច្នេះយកល្អ កុំព្យាយាមកុហកខ្លួនឯង និងធ្វើឱ្យខ្លួនឯងកាន់តែឈឺដោយធ្វើរឿងទាំងនេះជាមួយ Ex ទៀត ព្រោះវានឹងគ្មានប្រយោជន៍ឡើយ។ ផ្ទុយទៅវិញ បើគេដឹង គេនឹងបានចិត្ត ឬហ៊ានមើលងាយអ្នកជាមិនខាន។
តាមដានគេលើបណ្ដាញសង្គម
បណ្ដាញសង្គមគឺជាកន្លែងគ្រោះថ្នាក់បំផុតសម្រាប់អ្នកកំពុងឈឺចាប់។ អ្នកនឹងឃើញអ្វីដែលមិនគួរឃើញ ឬបើអ្នកតាំងចិត្តចង់ឃើញវា អ្នកនឹងកាន់តែធ្វើបាបខ្លួនឯងតែប៉ុណ្ណោះ។ ដូច្នេះដើម្បីជៀសវាងអារម្មណ៍ឈឺចាប់មិនអាចទ្រាំបាន គួរកំណត់ខ្លួនឯងនូវរឿង២យ៉ាងនេះ គឺមិនត្រូវផុសអ្វីទាក់ទងនឹងការបែកគ្នា ទោះបីដោយហេតុផលអ្វីក៏ដោយ។ ទី២ គួរ Unfriend ម្នាក់នោះចោល ដើម្បីជៀសវាងការចុចមើល ឬឃើញអ្វីថ្មីទាក់ទងនឹងគេ ដូចជាការរស់នៅ គេមានអ្នកថ្មីឬអត់ ជាដើម ព្រោះចង់មិនចង់ វាគង់តែធ្វើឱ្យអ្នកចុកចាប់ ពេលឃើញអ្វីអំពីគេនោះ។
និយាយអាក្រក់ពីគេប្រាប់មិត្តអ្នក
ទោះបីម្នាក់នោះធ្លាប់ធ្វើឱ្យអ្នកឈឺចាប់យ៉ាងណាក៏ដោយ គួរចេះលាក់វាទុក មិនត្រូវទៅដើរនិយាយបើកកកាយប្រាប់អ្នកដទៃឡើយ។ វាគ្មានបានប្រយោជន៍អ្វី ក្រៅពីត្រូវអ្នកដទៃទាំងនោះវាយតម្លៃអ្នកថាជាមនុស្សយករឿងអាក្រក់អ្នកដទៃដើរប្រាប់គេ និងទម្លាប់កំហុសឱ្យគេនោះទេ។ ទោះយ៉ាងណា គួរដឹងវាតែខ្លួនឯងនិង Ex ម្នាក់នោះបានហើយ ព្រោះថាខុសឬត្រូវ សាមីខ្លួនទាំងពីរដឹងច្បាស់ជាងគេ ហើយបើដើរនិយាយប្រាប់គេ ក៏មិនអាចជួយអ្វីបានដែរ ព្រោះអ្នកទាំងពីរក៏បែកគ្នាហើយដែរ។
តេ ឬផ្ញើសារទៅ Ex ពេលស្រវឹង
បើអ្នកពិតជានៅស្រលាញ់គេ ស្ថានភាពស្រវឹងគឺជាពេលដ៏គ្រោះថ្នាក់បំផុតដែលអ្នកអាចនឹងធ្វើរឿងទាំងនេះទៅគេ ដើម្បីឱ្យគេនៅតែមានអារម្មណ៍ថា អ្នកទុកគេសំខាន់ដដែល។ ប៉ុន្តែមិនគួរបណ្ដោយខ្លួនឯងឱ្យក្លាយជាមនុស្សគួរឱ្យអាណិតបំផុតក្នុងលោកនៅចំពោះមុខអ្នកដែលយើងបានបែកជាមួយហើយនោះទេ ព្រោះម្នាក់នោះនឹងគិតថា គ្មានគេ ជីវិតអ្នកនឹងមិនអាចរស់នៅបានឡើយ។
ចុចអាន៖ ស្រីៗមិនគួរធ្វើរឿង ៥ យ៉ាងដាច់ខាត ពេល Ex ផ្ញើសារមក
យំនៅចំពោះមុខ Ex
កាន់តែធ្ងន់ធ្ងរជាងចំណុចទី៣ទៅទៀត។ បើជ្រុលជាបែកគ្នា គ្មានហេតុផលអីដែលយើងត្រូវទៅបង្ហាញចំណុចខ្សោយនៅចំពោះមុខគេឡើយ។ ក្រៅពីធ្វើឱ្យបានចិត្ត គេនឹងវាយតម្លៃថាយើងរស់ខ្វះគេមិនបាន ហើយអ្នកក៏មិនអាចធ្វើខ្លួនឱ្យរឹងមាំដើម្បីទទួលយកអ្នកថ្មីដែលល្អជាងគេបានដែរ។ ទឹកភ្នែកគឺជារបស់មានតម្លៃណាស់ ហេតុអីត្រូវមកបង្ហាញឱ្យគេឃើញងាយៗ? ត្រូវធ្វើចិត្តឱ្យរឹង ខាំធ្មេញសង្កត់ចិត្ត កុំឱ្យទឹកភ្នែកមួយតំណក់រមៀលនៅមុខគេ ចាំមកដល់ផ្ទះ ចង់យំប៉ុន្មានថ្ងៃក៏មិនអីដែរ។
ព្យាយាមផ្សះផ្សា ឬសុំគេធ្វើជាមិត្ត
កម្រមានណាស់ អ្នកដែលបែកគ្នាហើយអាចជានាធ្វើជាមិត្តនឹងគ្នាបាន លុះត្រាតែអ្នកអាចទ្រាំមើល ពេលគេមានអ្នកថ្មីបាន។ ពុំនោះទេ អ្នកមិនទាន់អាចទទួលយករឿងទាំងនេះបានឡើយ កុំនិយាយថាខ្លួនឯងរឹងមាំ ឬបែកគ្នាយូរយ៉ាងណាហើយក្ដី។ វិធីដ៏ល្អ គឺផ្ដាច់ខ្លួនឱ្យឆ្ងាយពីគេ បើម្នាក់នោះមកសុំធ្វើមិត្ត ត្រូវចេះប្រកែក បើអ្នកនៅមានអារម្មណ៍មិនទាន់ស្រួល ព្រោះអ្នកដែលធ្លាប់ធ្វើឱ្យអ្នកឈឺម្ដងហើយ គ្មានតម្លៃអីដែលមកអាចក្លាយជាមិត្តបានឡើយ។
ឃុំខ្លួនឯង ឬរត់គេចខ្លួនពីអ្នកផង
អ្នកមិនមែនជាពិរុទ្ធជនផង រឿងអីត្រូវរត់គេចខ្លួនដូចជាមនុស្សមានទោស? ត្រូវធ្វើខ្លួនដូចធម្មតា ទោះមានអ្នកដឹងរឿងឬសួរនាំ ត្រូវធ្វើធម្មតា កុំឱ្យគេចាប់បានថាអ្នកកំពុងកើតទុក្ខខ្លាំង រហូតចង់ទៅណាឱ្យឆ្ងាយ ឬធ្វើរឿងដែលមិនគួរធ្វើ។ អ្វីដែលត្រូវធ្វើក្រោយបែកគ្នាហើយ គឺឱ្យគេឃើញថា "ខ្ញុំនឹងនៅតែញញឹមចេញ ខ្ញុំនឹងនៅតែជាខ្ញុំ ទោះគ្មានអ្នកក៏ដោយ"។
សងសឹក
ចំណុចនេះនឹងធ្វើឱ្យអ្នកក្លាយជាមនុស្សអាក្រក់ ត្រូវគេស្អប់ដោយមិនដឹងខ្លួន។ ក្រៅពីនេះ ការសងសឹកមិនអាចជួយឱ្យអ្នកបានស្រាកស្រាន្តចិត្តពិតប្រាកដឡើយ តែវារឹតតែធ្វើឱ្យអ្នកកាន់តែឈឺចាប់ និងជូរចត់លើសដើម៕