ចង់បានរាងស្អាត គ្មានក្បាលពោះ ញ៉ាំភេសជ្ជៈប៉ុន្មានមុខនេះ
- 2018-04-28 08:55:34
- ចំនួនមតិ 0 | ចំនួនចែករំលែក 0
ចង់បានរាងស្អាត គ្មានក្បាលពោះ ញ៉ាំភេសជ្ជៈប៉ុន្មានមុខនេះ
ភេសជ្ជៈមួយចំនួនក៏មានសារសំខាន់ និងជាចំណែកដែលចូលរួមសម្រកទម្ងន់របស់យើងបានដែរ ប៉ុន្តែបើយើងមិនប្រយ័ត្ន ចេះតែជ្រើសរើសផឹកភេសជ្ជៈតាមខ្លួនចូលចិត្តនោះ មិនត្រឹមតែមិនស្គមទេ ប៉ុន្តែវាធ្វើឲ្យយើងកាន់តែធាត់ថែមទៀត។ ដូច្នេះហើយថ្ងៃនេះ កញ្ញា សូមណែនាំនូវភេសជ្ជៈធម្មជាតិមួយចំនួនដែលអាចជួយឲ្យនារីៗមានរាងស្គមស្អាតបាន បើសិនអ្នកទទួលទានដោយវិធីត្រឹមត្រូវដូចខាងក្រោមនេះ៖
១. ទឹកទំពាំងបាយជូរស្រស់
នៅក្នុងផ្លែទំពាំងបាយជូរ មានសរសៃហ្វាយប៊ឺ មួយប្រភេទដែលមានសារធាតុប្រឆាំងរ៉ាឌីកាល់សេរី និងជួយជំរុញការដុតរំលាយជាតិខ្លាញ់ចាស់ និងថ្មីក្នុងរាងកាយ ហើយក៏ជាទឹកផ្លែឈើស្រស់ដែលអាចញ៉ាំបានដោយមិនចាំបាច់ថែមស្ករទៀតផង ព្រោះវាមានជាតិផ្អែមដោយធម្មជាតិហើយ។ ដូច្នេះហើយទើបវាអាចជួយបន្ថយភាពធាត់ មិនធ្វើឲ្យឡើងគីឡូ និងជួយឲ្យមានកម្លាំងមិនហេវច្រើន។
២. ទឹកម្នាស់ស្រស់
នៅក្នុងផ្លែម្នាស់ មានជាតិអាស៊ីដដែលជួយរំលាយជាពិសេសនូវអាហារពពួកប្រូតេអ៊ីន ដូច្នេះហើយទើបអាចជួយសម្រួលដល់អាការចុកសៀត និងតឹងពោះ។ មិនតែប៉ុណ្ណោះវាក៏អាចជួយរំលាយអាហារដែលមានជាតិអាស៊ីដ និងជាតិក្បុង ព្រមទាំងជួយសម្រួលដល់សាច់ដុំក្នុងរាងកាយ បញ្ចេញជាតិពុល និងមានជាតិវីតាមីនល្អៗជាច្រើន។
៣. ទឹកសណ្ដែក
នៅក្នុងទឹកសណ្ដែកមានសារធាតុប្រូតេអ៊ីនច្រើន ដែលជួយឲ្យយើងឆ្អែតបានយូរ ផឹកហើយមិនមានអារម្មណ៍ថាឃ្លាន ព្រមទាំងមានសារធាតុចិញ្ចឹមដែលធ្វើឲ្យអ័រម៉ូនរបស់មនុស្សស្រីធ្វើការបានល្អថែមទៀត។ ចង់ទទួលបានប្រសិទ្ធភាពគឺត្រូវជ្រើសរើសទឹកសណ្ដែកដែលគ្មានជាតិស្ករ ឬជាតិស្ករតិចបំផុត។
៤. ទឹកឃ្មុំលាយនឹងទឹកក្រូចឆ្មារក្ដៅឧណ្ហៗ
ទឹកឃ្មុំមានគុណប្រយោជន៍ជួយបម្រុងឈាម ប្រឆាំងតទល់នឹងការរលាក ចំណែកទឹកក្រូចឆ្មារគឺពោរពេញទៅដោយវីតាមីន C និងសារធាតុប្រឆាំងរ៉ាឌីកាល់សេរី។ អាចធ្វើបានដោយគ្រាន់តែប្រើទឹកក្ដៅឧណ្ហៗមួយកែវ លាយជាមួយក្រូចឆ្មារមួយផ្លែ និងបន្ថែមទឹកឃ្មុំ ១ស្លាបព្រាបាយចូល ហើយកូរឲ្យចូលគ្នា។ ទទួលទានទាន់នៅក្ដៅឧណ្ហៗដើម្បីឲ្យឈាមដើរបានស្រួល និងជួយដល់ការរំលាយអាហារ។
៥. ទឹកប៉េងប៉ោះ
នៅក្នុងប៉េងប៉ោះមានសារធាតុ Lycopene វីតាមីន C វីតាមីន A និងវីតាមីន E ខ្ពស់ ដែលជួយដល់ផ្នែកចក្ខុ ការកសាងជាលិកា និងជួយបន្ថែមដល់ប្រព័ន្ធប្រឆាំងរ៉ាឌីកាល់សេរី ធ្វើឲ្យឆាប់ឆ្អែត ថែមទាំងជួយឲ្យស្បែកស្អាត សុខភាពល្អថែមទៀត។
៥. ទឹកខ្ញី
ខ្ញីគឺជារុក្ខជាតិដែលមានជាតិហិលក្ដៅ ដែលជួយបន្ថយអាការហើមពោះ ធ្វើឲ្យប្រព័ន្ធរំលាយអាហារធ្វើការបានធម្មតា ព្រមទាំងមានចំណែកជួយដល់ការជំរុញដល់ចរន្តឈាមឲ្យធ្វើការបានកាន់តែស្រួលទៀតផង។ ជាពិសេសខ្ញីអាចបន្ថែមប្រសិទ្ធភាពចំពោះការដុតរំលាយខ្លាញ់ផងដែរ ប៉ុន្តែសុំកុំដាក់បន្ថែមស្ករ ឬទឹកឃ្មុំ ទើបមានប្រសិទ្ធភាព។
ចាប់អារម្មណ៍ភេសជ្ជៈមួយណាអាចធ្វើ ឬរកទិញមកញ៉ាំបាន ហើយកុំភ្លេចញ៉ាំអាហារក្រុមផ្សេងៗឲ្យបានគ្រប់គ្រាន់ផង ព្រមទាំងហាត់ប្រាណ និងគេងឲ្យបានគ្រប់គ្រាន់ ទើបអាចសម្រកទម្ងន់បានយ៉ាងមានសុខភាពល្អ ៕