កក្រើកសិល្បៈថៃខណៈតារាល្បីៗច្រើនរូបពាក់ព័ន្ធពីបទផ្សព្វផ្សាយផលិតផលថែសម្ផស្សខុសច្បាប់

2018-04-25 09:56:34
ចំនួនមតិ 0 | ចំនួនចែករំលែក 0

រដ្ឋបាលផ្នែកចំណីអាហារ និងឱសថរបស់ថៃ កាលពីថ្ងៃទី២៤ ខែមេសា ឆ្នាំ២០១៨ បានកោះហៅតារាថៃ ៧ដួង ដែលបានផ្សព្វផ្សាយលក់ផលិតផលថែរក្សាសម្ផស្សខុសច្បាប់ ៨ប្រភេទ រួមមាន គ្រឿងសំអាងគ្មានគុណភាព និងផលិតផលសម្រកទម្ងន់ របស់ក្រុមហ៊ុនឈ្មោះ Magic Skin ។

តារាទាំង ៧ ដែលស្ថិតក្នុងចំណោម អ្នកសិល្បៈ និងតារាបណ្ដាញសង្គម ៥៦នោះរួមមាន៖ Lydia Visutthithada, Pattie Ungsumalin, Mark Chutavuth, Ice Apissada, VJ Woonsen, DJ Push និង Ma Ornapha។ អ្នកទាំងនេះ ត្រូវគេរាយការណ៍ថាបាន ផ្សព្វផ្សាយផលិតផលខុសច្បាប់ លើប្រព័ន្ធអនឡាញ។

DJ Push

Lydia

Ice

Ma Ornapha

បើតាមប៉ូលិសថៃ បានបញ្ជាក់ថា តារាប្រុសស្រីថៃទាំង ៧រូបនោះ អាចនឹងជាប់ពន្ធនាគាររហូតដល់ទៅ ៣ឆ្នាំ ព្រមទាំងត្រូវពិន័យជាប្រាក់ ៣០០ ០០០បាត (ប្រហែល ៩ ៥០០ដុល្លារ) ឯណោះ ពីបទបោកប្រាស់អតិថិជន ដើម្បីលក់ផលិតផលដាច់។

សូមបញ្ជាក់ថា ការកោះហៅក្រុមតារាលក់ផលិតផលក្លែងក្លាយនេះ ត្រូវធ្វើឡើងក្រោយការចុះបង្ក្រាបរោងចក្រផលិតផលថែរក្សាសម្ផស្សមួយ នៅស្រុក Luang ខេត្ត Pathum Thani កាលពីfថ្ងៃអាទិត្យ ដោយរកឃើញផលិតផលខុសច្បាប់ ដែលមានឈ្មោះ Apple Slim, Slim Milk, Fern, Magic Skin, Shinoshi, Treechada និង Mezzo ។ ផលិតផលទាំងនេះ មិនទាន់ត្រូវបានចេញអាជ្ញាប័ណ្ណជូនពីរដ្ឋបាលចំណីអាហារ និងឱសថរបស់ថៃនៅឡើយទេ៕