វិធីបង្រៀនខ្លួនឯងឲ្យឈប់គិតច្រើនពីសម្ដីឥតប្រយោជន៍របស់អ្នកដទៃ
- 2018-04-23 09:16:13
- ចំនួនមតិ 0 | ចំនួនចែករំលែក 0
វិធីបង្រៀនខ្លួនឯងឲ្យឈប់គិតច្រើនពីសម្ដីឥតប្រយោជន៍របស់អ្នកដទៃ
ពេលខ្លះការគិតច្រើនអំពីការយល់ឃើញរបស់អ្នកដទៃចំពោះខ្លួន គឺជារនាំងមួយដែលធ្វើឲ្យជីវិតយើងមិនអាចរីកចម្រើនបាន។ ប្រសិនបើអ្នកជាមនុស្សដែលខ្វាយខ្វល់ពីអ្វីដែលអ្នកដទៃគិតពាក់ព័ន្ធនឹងអ្នកគ្រប់ពេលវេលា តែងខ្វល់បញ្ហាពាក្យចចាមអារ៉ាម ឬក៏ព្យាយាមផ្គាប់ចិត្តមនុស្សច្រើនពេក អត្ថបទនេះនឹងជួយឲ្យអ្នកដើរក្នុងផ្លូវត្រូវ ក្នុងការផ្លាស់ប្ដូរការគិតដែលគ្មានប្រយោជន៍ទាំងនោះ៖
១. ឈប់គិតច្រើនទៀត
ភាគច្រើន នៅពេលអ្នកគិតថាអ្នកត្រូវគេវាយតម្លៃ តាមពិតវាមិនដូច្នោះទេ។ វាពិបាកពេកហើយដែលមនុស្សម្នាក់ៗត្រូវទៅវាយតម្លៃមនុស្សគ្រប់គ្នាដែលខ្លួនជួប ហើយទៅវិភាគលើកំហុសឆ្គងនានារបស់គេ។ ដូច្នេះកុំបាច់ខ្លាចថាអ្នកដទៃគិតយ៉ាងនេះគិតយ៉ាងនោះមកលើខ្លួន ព្រោះភាគច្រើនគេមិនសូវបានចាប់អារម្មណ៍លើអ្នកទេ។
២. ផ្ដោតលើគោលដៅរបស់ខ្លួន
អ្នកដែលរវល់តែផ្ដេកផ្ដួលនឹងអ្វីដែលអ្នកដទៃគិត តែងយកសម្ដី ឬពាក្យចចាមអារ៉ាមទាំងឡាយមកគិតនេះគិតនោះ ហើយមិនអាចមើលឃើញរូបភាពទូលាយបាន។ ប៉ុន្តែអ្នកដែលមិនផ្ដេកផ្ដួលលើការគិតអ្នកដទៃ នឹងអាចមើលឃើញអ្វីច្រើនជាង និងសម្រេចគោលដៅបានរហ័សជាង។ អ្នកមានឱកាសតែម្ដងទេក្នុងការប្រើជីវិត ដូច្នេះតើអ្នកសុខចិត្តឲ្យការគិតអ្នកដទៃមកធ្វើឲ្យជីវិតអ្នកលែងមានភាពរីករាយយ៉ាងហ្នឹងឬ?
៣. ជឿជាក់លើខ្លួនឯង
វិធីល្អមួយដើម្បីកុំឲ្យការគិតរបស់អ្នកដទៃមានឥទ្ធិពលគ្របដណ្ដប់លើជំហររបស់អ្នកនោះ គឺអ្នកត្រូវមានជំនឿចិត្តកាន់តែច្រើនក្នុងការសម្រេចចិត្ត និងទង្វើនានារបស់ខ្លួន។ ដរាបណាអ្នកមិនធ្វើអ្វីប៉ះពាល់ដល់សង្គម និងអ្នកដទៃ នោះអ្នកគ្មានហេតុផលអ្វីត្រូវខ្វល់នឹងពាក្យរិះគន់ដែលគ្មានហេតុផលទាំងនោះឡើយ។
៤. ព្រមទទួលស្គាល់ថាខ្លួនឯងជានរណា
ប្រាកដណាស់ ការទទួលស្គាល់ធាតុពិតរបស់ខ្លួនគឺមិនមែនជារឿងងាយទេ។ ប៉ុន្តែអ្នកត្រូវទទួលស្គាល់ការពិតថា មនុស្សគ្រប់គ្នាសុទ្ធតែមានចំណុចខ្លាំង និងចំណុចខ្សោយរៀងៗខ្លួន ដូច្នេះបើអ្នកដឹងថាខ្លួនខ្លាំងលើចំណុចអ្វី អ្នកត្រូវសប្បាយចិត្តនឹងខ្លួនឯង ហើយត្រូវចេះអភ័យទោសឲ្យខ្លួនឯងចំពោះចំណុចខ្សោយដែលអ្នកមិនអាចកែប្រែបាន ៕
ចុចអាន៖
បរាជ័យមិនគួរឲ្យខ្លាចដូចការបាក់ទឹកចិត្តទេ រៀនពីកំហុសខ្លួនឯងតាម ៣ចំណុចនេះវិញ
៨ ចំណុចនៃភាពខុសគ្នា រវាងគំនិតអ្នកមាន និងអ្នកមិនជោគជ័យ