អាថ៌កំបាំង ៣ យ៉ាងស្រីៗត្រូវដឹងដាច់ខាត បើចង់នៅតែក្មេង មិនងាយចាស់

2018-04-23 04:56:51
ចំនួនមតិ 0 | ចំនួនចែករំលែក 0

អាយុកាន់ច្រើន ច្បាស់ណាស់ស្ថានភាពសុខភាព និងសម្រស់ក៏ទៅតាមហ្នឹងដែរ។ តែដោយសារទម្លាប់រស់នៅ ខ្លះក៏សម្រស់ក៏ចាស់មុនអាយុ ឯសុខភាពទ្រុឌទ្រោមលឿន ឯខ្លះទៀត អាយុ ៣០ ឆ្នាំជាង មើលទៅដូចទើបតែ ២០ ឆ្នាំអ៊ីចឹង។

មុខមិនងាយចាស់ សុខភាពនៅរឹងមាំ មិនមែនជារឿងចៃដន្យនោះឡើយ ពោលគឺម្នាក់នោះ ចេះគ្រប់គ្រងទម្លាប់ការរស់នៅរបស់ខ្លួនបានល្អ មិនថាការហូបចុក ការថែរក្សាស្បែក ដំណេក កីឡា នោះឡើយ។ អត្ថបទនេះ នឹងបង្ហាញអាថ៌កំបាំង ៣ យ៉ាងស្រីៗត្រូវយកចិត្តទុកដាក់បំផុត បើចង់ឲ្យសម្រស់នៅក្មេងមិនងាយចាស់ និងមានសុខភាព៖

១. តិចច្រឡំអត់ញ៉ាំអាហារពេលព្រឹកអីទៅ!

បើគិតថាចង់តមអត់ញ៉ាំអាហារពេលព្រឹក កុំឲ្យឡើងទម្ងន់ គឺខុសធ្ងន់ហើយ។ អត់ញ៉ាំអាហារពេលព្រឹក ពិតជាប៉ះពាល់សុខភាពមិនអាចប្រកែកបាន ដូចជា លើសសម្ពាធឈាម ឡើងទម្ងន់ ជំងឺមហារីក ជាដើម។

អាហារពេលព្រឹកទៀតសោត ក៏មិនមែនចេះតែញ៉ាំសម្រុកឲ្យណាណីឆ្អែតមួយទំហឹងនោះដែរ ពោលគឺអ្នកត្រូវញ៉ាំអាហារពេលព្រឹកដែលមានតុល្យភាពរៀងរាល់ ក្នុងនោះមាន ផ្លែឈើស្រស់ ឬទឹកផ្លែឈើ អាហារមានសារជាតិកាបូអ៊ីដ្រាត ដូចជា នំប៉័ង ភេសជ្ជៈសម្បូរជាតិកាល់ស្យូម ដូចជា ទឹកដោះគោ និងអាហារសម្បូរប្រូតេអ៊ីន (សាច់ ឬស៊ុត)។

២. ការពារឆ្អឹងឲ្យរឹងមាំ មិនអាចលេងសើចបាន

គ្រោងឆ្អឹងមិនត្រឹមមានតួនាទីទ្រទ្រង់រាងកាយប៉ុណ្ណោះទេ ថែមទាំងមានតួនាទីយ៉ាងសំខាន់ក្នុងរាងកាយក្នុងការបង្កើតកោសិកាឈាម និងផ្ទុកសារធាតុរ៉ែ។ កំហាប់ដង់ស៊ីតេឆ្អឹងទាប ធ្វើឲ្យអ្នកអាចកើតជំងឺឆ្អឹងស្ពត និងពុកឆ្អឹង ជាលក្ខខណ្ឌដែលធ្វើឲ្យឆ្អឹងកាន់តែពុកផុយ។

ជារឿងធម្មតាដែលកំហាប់ដង់ស៊ីតេឆ្អឹងកាន់តែថយចុះទៅតាមវ័យ ប៉ុន្តែអ្នកត្រូវតែប្រាកដថាឆ្អឹងមានសុខភាពល្អ និងមានសារធាតុចិញ្ចឹមគ្រប់គ្រាន់ក្នុងពេលវ័យកាន់តែចាស់។

ប្រើប្រាស់សារធាតុខ្លាញ់ដែលមានគុណភាពខ្ពស់
ហាត់ប្រាណ ជួយបង្កើនភាពរឹងមាំ និងតុល្យភាពឆ្អឹង
កាត់បន្ថយការប្រើប្រាស់ជាតិស្ករ ជាតិអាល់កុល និងកាហ្វេអ៊ីន។

៣. រឿងនេះពិបាកធ្វើបំផុតក្នុងជីវិត គឺស្ត្រែស

មានអារម្មណ៍ថា ឈឺក្បាល រញីរញ័រ ឈឺក ឈឺសាច់ដុំ វិលមុខ គេងអត់លក់ ភ្លេចភ្លាំងច្រើន កម្លាំងធ្វើការថយចុះ ឯលទ្ធផលក៏មិនសូវចេញជាដុំកំភួនមែនអត់? អាការទាំងនេះបញ្ជាក់ថាអ្នកមានអារម្មណ៍តានតឹងច្រើន ឬស្ត្រែស។

ការស្ថិតក្រោមសម្ពាធទាំងនេះ អាចធ្វើឲ្យមានជំងឺធ្លាក់ទឹកចិត្ត ភ័យខ្លាច គាំងបេះដូង ដាច់សរសៃឈាមខួរក្បាល លើសសម្ពាធឈាម ប្រព័ន្ធស៊ាំរាងកាយមានការរំខាន និងធ្វើឲ្យជាតិស្ករក្នុងឈាមធ្លាក់ចុះ។