៥យ៉ាងរបស់កូនស្រីធ្វើឱ្យឪពុកម្ដាយមានមោទកភាព សើចបិទមាត់មិនជិត
- 2018-04-19 04:33:49
- ចំនួនមតិ 0 | ចំនួនចែករំលែក 0
៥យ៉ាងរបស់កូនស្រីធ្វើឱ្យឪពុកម្ដាយមានមោទកភាព សើចបិទមាត់មិនជិត
បុគ្គលិកលក្ខណៈរបស់កូនស្រីដូចខាងក្រោមនេះ គឺជាអ្វីដែលឪពុកម្ដាយគ្រប់រូបចង់បានបំផុត និងតែងតែលើកសរសើរកូនខ្លួនប្រាប់អ្នកជិតខាងបានដឹង។
១-ចេះដឹងពីការតុបតែងខ្លួន មិនលើស ក៏មិនខ្វះ
មិនថាសម័យដើរដល់ណា តែការតុបតែងខ្លួនរបស់នារីគឺជារឿងសំខាន់សម្រាប់ឱ្យភ្នែកអ្នកដទៃមើលមក និងក៏សរបញ្ជាក់ពីមុខមាត់គ្រួសារផង។ កូនស្រីដែលចេះតុបតែងខ្លួន ដឹងកាលៈទេសៈណាត្រូវស្លៀកពាក់ តែងខ្លួនបែបណានឹងជួយលើកកិត្តិយសគ្រួសារ ព្រោះគ្មានអ្នកណាទៅសរសើរនារីដែលស្លៀកលេចលើលេចក្រោម មិនដឹងពេលវេលាឡើយ។
២-ចេះរៀបចំជីវិតខ្លួនឯង
អ្នកណាថា មនុស្សស្រីជាភេទទន់ខ្សោយ? មនុស្សស្រីសម័យនេះរឹងមាំមិនចាញ់មនុស្សប្រុសឡើយ។ កូនស្រីដែលអាចរៀបចំជីវិតខ្លួនឱ្យមានគោលដៅច្បាស់លាស់ ដូចជាដឹងថាគួរសេពគប់មនុស្សប្រភេទណា ចេះរកចំណេះជំនាញរៀនច្បាស់លាស់ ចេះអប់រំចិត្តមិនឱ្យទន់ជ្រាយ ឬទោរទន់តាមការអូសទាញពីអ្វីដែលមិនល្អ គឺជាមាសពេជ្ររបស់ឪពុកម្ដាយដែលមិនអាចខ្វះបាន ទៅណាក៏លើកសរសើរពីកូនខ្លួនឯងប្រាប់គេដែរ។
៣-ចេះរើសគូជីវិតដោយពិចារណាបានច្បាស់លាស់
កូនស្រីដែលរៀបការហើយចាត់ទុកថាមានសុភមង្គល មិនមែនជាកូនស្រីដែលអាចរកបានប្ដីអ្នកមាននោះទេ។ សម្រាប់ឪពុកម្ដាយ ការដែលចង់ឱ្យកូនស្រីរៀបការហើយមានទ្រព្យសម្បត្តិស្ដុកស្ដម្ភ មានផ្ទះធំទ្រនំខ្ពស់ អ្នកណាក៏ចង់បានដែរ ប៉ុន្តែការមើលឃើញកូនស្រីអាចរកប្ដីដែលល្អម្នាក់ ចេះដឹងទុក្ខធុរៈ ស្រលាញ់គ្រួសារ មានការងារធ្វើត្រឹមត្រូវ និងអាចធ្វើជាបង្គោលគ្រួសារ នោះហើយគឺជាសុភមង្គលពិត។
ចុចអាន៖ សំបុត្រឪពុកម្ដាយក្រីក្រ ផ្ដាំផ្ញើកូនស្រីថ្ងៃរៀបការ បង្កប់អត្ថន័យមិនអាចកាត់ថ្លៃបាន
កូនស្រីដែលអាចរើសមនុស្សដែលមានលក្ខណៈសម្បត្តិគ្រប់គ្រាន់បែបនេះនឹងធ្វើឱ្យឪពុកម្ដាយស្ងប់ចិត្ត លែងបារម្ភខ្លាំងដូចពេលមិនទាន់រៀបការ។ ប៉ុន្តែបើឃើញកូនស្រីរៀបការរួច បែរជាមានតែរឿងរកាំរកូស គ្មានក្ដីសុខ គឺឪពុកម្ដាយឈឺជាងកូនរាប់រយដងឯណោះ។
៤-ចេះស្រលាញ់ បម្រើប្ដី និងការងារផ្ទះ
ទោះពូកែយ៉ាងណា ការងារផ្ទះនៅតែជានារីជាអ្នករៀបចំទុកដាក់ ព្រោះស្ត្រីត្រូវឱ្យឈ្មោះថាជាមេផ្ទះ។ មិនមែនសម្រាប់តែធ្វើការងារចង្ក្រានជើងឆ្នាំងទេ តែជាអ្នកដឹងរបៀបរបរ ទុក្ខធុរៈអ្នកក្នុងគ្រួសារ អប់រំកូនចៅ និងទុកដាក់ទ្រព្យសម្បត្តិក្នុងផ្ទះឱ្យបានគង់វង្ស ជាអ្នកមានសិទ្ធិចាត់ចែងរាល់កិច្ចការក្នុងផ្ទះទាំងអស់ ដោយមានស្វាមីជាអ្នកជួយចែករំលែកការងារខ្លះ។
ផ្ទុយទៅវិញ បើគ្រួសារណាមានកូនស្រីដែលចូលចិត្តបង្ក្រាប ត្រួតត្រាប្ដី បញ្ជាប្ដីឆ្វេងស្ដាំ មិនចេះការងារដាំស្ល ទុកដាក់ ម្ដាយឪពុកឯណាអាចយកកូនទៅអួតប្រាប់គេឯងនោះ សូម្បីលោកទាំងពីរផ្ទាល់ក៏ទើសចិត្តមិនស្ទើរដែរ។
ចុចអាន៖ សេដ្ឋកិច្ចគ្រួសារកាន់តែកើនឡើង ភរិយាគប្បីមាន ៥ ចំណុចនេះ
៥-រឹងមាំ និងចេះគ្រប់គ្រងអារម្មណ៍បានគ្រប់កាលៈទេសៈ
ជាមនុស្សស្រីដែលរឹងមាំ មិនសំដៅលើកម្លាំងបាយដូចបុរសឡើយ តែជាការតាំងចិត្តខ្ពស់ មិនពឹងតែមនុស្សប្រុស ព្យាយាមធ្វើការងារឱ្យចប់ចុងចប់ដើម មិនដើរភ្លើតភ្លើនភ្លេចថាខ្លួនជាស្រី និងចេះគ្រប់គ្រងអារម្មណ៍ មិនឆេវឆាវ មិនធ្វើអ្វីដោយតក់ក្រហល់ ចេះដោះស្រាយបញ្ហាដោយសន្តិវិធី នោះហើយជាកូនស្រីដែលម្ដាយឪពុកចង់បាន និងមានមោទកភាពសម្រាប់គ្រួសារ៕