៦សញ្ញាបង្ហាញថាអ្នកគ្រាន់តែជាកង់សឺកួរបស់គេ

2018-04-13 07:49:13
ចំនួនមតិ 0 | ចំនួនចែករំលែក 0

ដោយសារតែមិនអាចបញ្ឈប់ចំណង់ ភាពលោភលន់របស់ខ្លួនបាន មនុស្សប្រុសមួយចំនួន ទោះបីមានគូស្នេហ៍រួចហើយក្ដី ក៏នៅតែបើកបេះដូងទទួលយកក្ដីស្រឡាញ់ពីនារីម្នាក់ទៀត។ គាត់អាចនឹងស្រឡាញ់អ្នកមែន ប៉ុន្តែប្រសិនអ្នកក្លាយជាជនទីបី ដែលកំពុងបំផ្លាញសុភមង្គលមនុស្សស្រីដូចគ្នា វាពិតជារឿងខ្លោចផ្សាខ្លាំងណាស់។ រៀនសង្កេតសញ្ញាទាំង៦នេះ រួចដកខ្លួនជាប្រញាប់ទាន់អ្វីៗនៅអាចស្រោចស្រង់បាន ប្រសិនអ្នកដឹងច្បាស់ ប្រាកដចិត្តថា គាត់មានគូស្នេហ៍រួចហើយ ហើយអ្នកគ្រាន់តែជាមនុស្សលួចលាក់ម្នាក់របស់គេប៉ុណ្ណោះ៖

១. មិនដែលនាំអ្នកដើរលេងកន្លែងដែលមានមនុស្សច្រើន

ទោះជារាប់អានគ្នាបានមួយរយៈហើយក្ដី ប៉ុន្តែគាត់មិនដែលបណ្ដើរអ្នកនៅកន្លែងសាធារណៈ ដែលមានមនុស្សច្រើនកុះករទេ។ ដំបូងអ្នកគិតថា ប្រហែលគាត់មិនចង់ឲ្យភាពរ៉ូមែនទិចត្រូវបានរំខាន ប៉ុន្តែដល់យូរៗទៅ បែរជាយល់ថាគាត់ភ័យខ្លាចជួបមនុស្សស្គាល់ដោយចៃដន្យ ធ្វើឲ្យបែកការទំនាក់ទំនងលួចលាក់រវាងគាត់និងអ្នកទៅវិញ។

២. មានរូបថតជាមួយមនុស្សស្រីប្លែកមុខ

អ្នកណាក៏មានមិត្តភក្ដិដែលជាមនុស្សផ្ទុយភេទគ្នាដែរ។ ត្រឹមតែថតរូបជាមួយគ្នាក្នុងឱកាសពិសេសៗយូរៗម្ដង វាមិនមែនជាបញ្ហាដែលអ្នកត្រូវហួងហែង ប្រចណ្ឌ រករឿងគាត់ឡើយ។ រឿងដែលចម្លែកគឺ គាត់ប្រាប់ថាជាមិត្តធម្មតា ប៉ុន្តែហេតុអ្វីអ្នកមិនដែលស្គាល់ ហើយគាត់ក៏មិនដែលណែនាំឲ្យស្គាល់គ្នាម្ដងសោះអញ្ចឹង។

៣. ណាត់ជួបគ្នាម្ដងៗ សែនពិបាក

រាល់ពេលអ្នកណាត់គាត់ជួបម្ដងៗ គាត់មិនដែលមកតាមការកំណត់ទេ។ ពេលដែលគាត់ចេញបានគឺ ពេលដែលខុសប្រក្រតី ដូចជាពាក់កណ្ដាលយប់ជាដើម។ គាត់ប្រហែលជាត្រូវកំដរនារីណាម្នាក់នៅពេលធម្មតា ដូច្នេះដើម្បីជួបអ្នក គាត់បានត្រឹមលួចឆ្មក់ម្ដងៗប៉ុណ្ណោះ។

៤. មិនដែលណែនាំអ្នកឲ្យក្រុមគ្រួសារ ឬមិត្តភក្ដិស្គាល់

នៅពេលដែលអ្នកសួរ អ្នកតែងមានលេសដោះសាថា រវល់រឿងនេះ រឿងនោះ ឬចាំពេលនេះ ពេលនោះជាដើម។ បើអ្នកជាស្រីតែម្នាក់ដែលគាត់មាន ហេតុអ្វីត្រឹមតែទទួលស្គាល់អ្នកជាផ្លូវការ គាត់ត្រូវចាំយូរដល់ថ្នាក់នេះ?

៥. មិនឲ្យអ្នកប៉ះពាល់ទូរស័ព្ទរបស់គាត់

ពេលគាត់នៅឆ្ងាយទូរស័ព្ទ ហើយអ្នកលើកទូរស័ព្ទជំនួសគាត់ម្ដងៗ គាត់ខឹងច្រឡោតយ៉ាងខ្លាំង។ ទូរស័ព្ទផ្ទាល់ខ្លួនគាត់ សុទ្ធតែចាក់សោលេខសំងាត់ត្រឹមត្រូវ អ្នកមិនអាចឆែកឆេរផ្ដេសផ្ដាសឡើយ។ ប្រសិនអ្នកខលទៅគាត់៤ទៅ៥ដង គាត់មិនទាន់ទទួលម្ដងផង ហើយពេលអ្នកសួរ គាត់តែងតែមានហេតុផលដោះស្រាយជានិច្ច។

៦. មិនចង់ជួប ឬស្គាល់មិត្តភក្ដិរបស់អ្នក

គាត់តែងព្យាយាមឲ្យអស់ពីសមត្ថភាព ដើម្បីគេចវេសមិនចង់ជួប ឬស្គាល់មិត្តរបស់អ្នក។ សម្រាប់គាត់ មានតែអ្នកម្នាក់គឺគ្រប់គ្រាន់។ មនុស្សដែលពាក់ព័ន្ធជាមួយអ្នក គាត់មិនត្រូវការឡើយ ព្រោះមិនចង់បង្កបញ្ហាឲ្យកាន់តែធំទៅៗ នៅថ្ងៃក្រោយ ៕

ចុចអាន៖

ប្រភព៖ Likelovequotes ប្រែសម្រួល៖ អូន បញ្ញា