ដេកផ្ទះពេលចូលឆ្នាំមានអីមិនល្អ! នេះជាហេតុផលដែលអ្នកនៅផ្ទះគួរត្រេកអរ

2018-04-13 08:37:00
ចំនួនមតិ 0 | ចំនួនចែករំលែក 0

ចូលឆ្នាំម្ដងៗប្រជាជនខ្មែរយើងដឹងតែមានគម្រោងដើរលេងហើយ ព្រោះពេលវេលានេះជាពេលដែលសប្បាយរីករាយ។ដោយឡែកបើអ្នកដែលមិនបានដើរទៅណាក៏មិនគួរពិបាកចិត្ត ស្អិតទ្រូងអីដែរព្រោះការដែលនៅផ្ទះមានផលល្អច្រើនណាស់។ ខាងក្រោមនេះជាហេតុផលដែលអ្នកមិនបានដើរលេងពេលចូលឆ្នាំគឺល្អម្យ៉ាងដែរ ៖

១. ពេលចូលឆ្នាំមនុស្សម្នាច្រើនណាស់

ដឹងស្រាប់ហើយថាពេលមានបុណ្យទានគឺមនុស្សច្រើនណាស់ ពេលខ្លះទៅដើរលេងគ្មានសប្បាយអីទេបានត្រឹមតែហិតក្លិនមនុស្សតែប៉ុណ្ណោះ។ ម្យ៉ាងទៀតមនុស្សកុះករក៏មិនសូវជាសុវត្ថិភាពប៉ុន្មានដែរ ព្រោះមានជនខិលខូចចាំឆ្លៀតឱកាសច្រើនណាស់ ដូច្នេះដេកផ្ទះជាជម្រើសដ៏ល្អបំផុត។

២. សល់លុយ

ពេលចូលឆ្នាំអីក៏ថ្លៃដែរ ទាំងកន្លែងគេង ទាំងអីញ៉ាំ ទាំងរបស់របរ ដូច្នេះបើអាចកុំដើរពេលបុណ្យទានអីព្រោះនឹងអាចចំណាយគុណនឹងពីរ គុណនឹងបី។ បើសិនជាចង់សន្សំលុយនោះការនៅផ្ទះមិនទៅណាគឺសក្តិសមបំផុត។

៣. មិនខូចសម្រស់

ដើរលេងចូលឆ្នាំ ខែចែត្រកម្រនឹងថាមិនប៉ះពាល់ដល់សម្រស់ណាស់ព្រោះវាក្ដៅ ហុយជាដើម។ សម្រាប់អ្នកដែលស្រឡាញ់សម្រស់គួរតែកុំទៅដើរលេងអីព្រោះអាចពេលចប់ចូលឆ្នាំហើយស្ដាយខ្លួន។ គេងនៅផ្ទះមើលគេ Check in និង Post រូបទៅល្អជាងព្រោះវាអាចឲ្យអ្នកសប្បាយចិត្តដោយមិនបាច់ប្រឹងថែទាំងឡើងវិញបន្ទាប់ពីដើរលេងហើយ។

រូបតំណាង

៤. មានពេលនៅជាមួយគ្រួសារបានច្រើន

ចូលឆ្នាំម្ដងគួរតែចំណាយពេលជាមួយគ្រួសារឲ្យបានច្រើនព្រោះបើអ្នកមិននៅជាមួយគាត់ទេ គាត់ពិតជាចង់ឲ្យអ្នកទៅផ្ទះជួបជុំគ្នាណាស់។ មនុស្សចាស់គាត់ក៏មិនសូវចង់ដើរពេលមនុស្សច្រើនប៉ុន្មានដែរ ដូច្នេះគួរតែយកពេលដើរលេងជាមួយមិត្តភក្តិទៅកំដរគាត់វិញល្អជាង។

៥. មានសុវត្ថិភាព

មនុស្សភាគច្រើនតែងចេញដំណើរដើរលេងពេលចូលឆ្នាំ ដូច្នេះនៅលើផ្លូវឡាន ម៉ូតូច្រើនណាស់ ខ្លះបើកបរទាំងស្រវឹងក៏មានដែរ។ ដើម្បីកុំឲ្យអ្នកផ្ទះបារម្ភ និងមានសុខសុវត្ថិភាពខ្លួនឯងគួរតែកុំដើរលេងរញ៉េរញ៉ៃពេកអី។ ពេលមានគ្រោះថ្នាក់អ្នកដែលទៅគឺផុតហើយ តែអ្នកដែលនៅគឺកើតទុក្ខ ដូច្នេះបើមិនចាំបាច់អីត្រូវដើរលេងទេនៅផ្ទះក៏ល្អម្យ៉ាងដែរ។

៦.មិនបាក់កម្លាំង

ដើរលេងម្ដងៗមិនមែនអត់ហត់ទេ ចុះទម្រាំចប់ចូលឆ្នាំទៀតនោះដឹងតែមកវិញអស់ពីខ្លួនហើយ។ រីឯអ្នកដែលគេងផ្ទះគឺស្រួល មិនបាច់ហត់ មិនបាច់ឈឺនេះឈឺនោះជាពិសេសចប់ចូលឆ្នាំនៅតែមានកម្លាំងទៅធ្វើការដោយមិនបាច់បារម្ភអីទាំងអស់។