សុខៗមានរោគសញ្ញាអត់ដឹងខ្លួនទាំងនេះ ត្រៀមលុយត្រៀមចិត្តឈឺពេញមួយជីវិតឲ្យហើយទៅ

2018-03-23 06:38:19
ចំនួនមតិ 0 | ចំនួនចែករំលែក 0

ឆ្នាំ២០១៧ មនុស្សពេញវ័យនៅទូទាំងពិភពលោកប្រហែល ៨,៨% មានជំងឺទឹកនោមផ្អែម។ បើតាមការព្យាករ អាចកើនដល់ ៩,៩% ត្រឹមឆ្នាំ២០៤៥។ ជំងឺទឹកនោមផ្អែមប្រភេទ២ សម្បូរជាងគេបំផុតក្នុងចំណោមជំងឺទឹកនោមផ្អែមប្រភេទផ្សេងទៀតចំពោះមនុស្សពេញវ័យ។

ជំងឺនេះកើតឡើង ពេលរាងកាយធន់នឹងអាំងស៊ុយលីន (អាំងស៊ុយលីនដំណើរការមិនត្រឹមត្រូវ ឬកោសិការាងកាយ មិនឆ្លើយតបទៅអាំងស៊ុយលីនប្រកបដោយប្រសិទ្ធភាព) ឬនៅពេលលំពែងមិនអាចផលិតអាំងស៊ុយលីនគ្រប់គ្រាន់ ដើម្បីរក្សាកម្រិតជាតិស្ករក្នុងឈាម។

បើមានរោគសញ្ញាទាំងនេះ ភាគរយខ្ពស់កើតទឹកនោមផ្អែមហើយ

ក្នុងជំងឺទឹកនោមផ្អែមប្រភេទ២ រោគសញ្ញាវិវត្តយឺតៗ ហើយស្ងៀមស្ងាត់។ យ៉ាងណាក៏ដោយ នេះជារោគសញ្ញាទូទៅអ្នកមិនគួរមើលរំលងដាច់ខាត៖

នោមច្រើន (Polyuria)
ផឹកច្រើន (Polydipsia)
ញ៉ាំច្រើន (Polyphagia)
តែងអស់កម្លាំង
របួសមិនងាយជាសះស្បើយ
ចំណង់ផ្លូវភេទធ្លាក់ចុះ
ស្ពឹកជើង និងក្បាល
ងាយបង្ករោគដោយពពួកផ្សិត

ប៉ុន្តែ មានរោគសញ្ញាមួយចំនួនខាងលើ មិនមែនមានន័យថា អ្នកមានជំងឺទឹកនោមផ្អែម ១០០% នោះទេ។ អ្នកត្រូវជួបពេទ្យ ដើម្បីឲ្យប្រាកដ។

បើគ្រប់គ្រងជំងឺទឹកនោមផ្អែមមិនបានល្អ ចុងក្រោយគឺអាណោចអាធ័ម

ទឹកនោមផ្អែមជាជំងឺតំណពូជតាមហ្សែន។ បើសមាជិកគ្រួសារណាម្នាក់កើតជំងឺទឹកនោមផ្អែម អ្នកក៏ប្រឈមនឹងកើតជំងឺនេះដែរ។ បើមិនបានព្យាបាល ឬគ្រប់គ្រងជំងឺទឹកនោមផ្អែមឲ្យបានល្អទេ វានឹងវិវត្តធ្ងន់ធ្ងរទៅជាជំងឺគាំងបេះដូង ដាច់សរសៃឈាមខួរក្បាល ខ្សោយតម្រងនោម ខ្វាក់ភ្នែក និងអាចកាត់អវយវៈ ជាដើម។

វិធីព្យាបាលជំនាន់ថ្មីដ៏មានប្រសិទ្ធភាព

ថ្នាំគ្រាប់ Metformin ជាជម្រើសទី១ ក្នុងការព្យាបាលជំងឺទឹកនោមផ្អែមប្រភេទ២ សម្រាប់គ្រប់ក្រុមអាយុទាំងអស់។ តាមរយៈការស្រាវជ្រាវ ការវិភាគលើការប្រៀបធៀបប្រសិទ្ធភាព បង្ហាញថា ថ្នាំថ្មីដែលមិនមែនជាអាំងស៊ុយលីន មួយនេះ ត្រូវបន្ថែមលើការព្យាបាលដំបូង ដោយអាចជួយបន្ថយកម្រិតអ័រម៉ូន A1C បានប្រហែលពី ០,៩ ទៅ ១,១%។

ដោយឡែក ការព្យាបាលរួមបញ្ចូលគ្នារវាងថ្នាំ dipeptidyl peptidase-4 (DPP-4) inhibitor និង metformin កាន់តែមានប្រសិទ្ធភាពថែមទៀតក្នុងការបន្ថយកម្រិតជាតិស្ករក្នុងឈាម និងផលរំខានដោយសារកម្រិតជាតិស្ករក្នុងឈាមចុះទាប។

ជាវិជ្ជមាន គេអាចការពារ ឬកាត់បន្ថយហានិភ័យជំងឺទឹកនោមផ្អែមប្រភេទ២ បានតាមរយៈការរក្សាទំងន់ឲ្យបានត្រឹមត្រូវ ធ្វើលំហាត់ប្រាណឲ្យបានទៀងទាត់ ជ្រើសរើសចំណីអាហារមានសុខភាពល្អ គ្រប់គ្រងសម្ពាធឈាម គ្រប់គ្រងកម្រិតកូឡេស្តេរ៉ុលក្នុងឈាមឲ្យបានត្រឹមត្រូវ និងឈប់ជក់បារី។

ដូច្នេះ មានតែការរកឃើញជំងឺទឹកនោមផ្អែមនៅដំណាក់កាលដំបូងប៉ុណ្ណោះ ទើបជាវិធីដ៏ល្អបំផុតទប់ស្កាត់បញ្ហាធ្ងន់ធ្ងរ និងផលវិបាកនៃជំងឺនេះនៅពេលក្រោយ។