សាហាវបាត់! ចេញមុខមួយភ្លែត កូនភ្លោះ Chompoo Araya កើបលុយជិតកន្លះលានដុល្លារ

2018-03-22 10:11:37
ចំនួនមតិ 0 | ចំនួនចែករំលែក 0

ធ្វើឲ្យបណ្ដាអ្នកគាំទ្ររំភើបពេញឆាកតែម្ដង នៅពេលតារាសម្ដែងថៃ Chompoo Araya និងស្វាមី Nott ពកូនភ្លោះប្រុសទាំងពីរ មកបង្ហាញខ្លួនក្នុងកម្មវិធីសាធារណៈលើកដំបូង ក្នុងនាមជាអ្នកតំណាងផលិតផល កាលពីល្ងាចថ្ងៃទី២១ ខែមីនាកន្លងទៅនេះ។

ទើបតែចូលរួមកម្មវិធីលើកទីមួយក៏ពិតមែន ប៉ុន្តែកូនភ្លោះអាយុជាង ៦ខែរបស់ Chompoo ឈ្មោះ Storm និង Thunder ហាក់មើលមិនមានភាពភ័យខ្លាច និងរករឿងយំឲ្យឪពុកម្ដាយពិបាកឡើយ។

ចូលរួមក្នុងកម្មវិធីនេះដែរ តារាល្បីផ្នែក Fashion ក៏ត្រូវបានគេជជីកសួរភ្លាមៗអំពីព័ត៌មានដែលថា នាងនិងកូនបានទទួលប្រាក់ដល់ ១៥លានបាត ឬ ៤៨ម៉ឺនដុល្លារក្នុងកម្មវិធីនេះ។ មិនបានបដិសេធ ហើយក៏មិននិយាយថាត្រឹមត្រូវពេញមាត់ ប៉ុន្តែតារាកូនពីរបានបកស្រាយថា គ្រប់យ៉ាងគឺស្ថិតនៅកម្រិតសមរម្យ ប៉ុន្តែនាងសុំរក្សារឿងតម្លៃនេះជារឿងឯកជនវិញល្អជាង ហើយប្រាក់ទាំងអស់ដែលបានមកពីការទទួលការងារលើកនេះ នាងនិងស្វាមីបានតាំងចិត្តថានឹងសន្សំទុកឲ្យកូន ដើម្បីឲ្យពួកគេប្រើប្រាស់ទៅថ្ងៃអនាគត។

ចំណែកការងារផ្សព្វផ្សាយ និងតំណាងផលិតផលបន្តបន្ទាប់ទៀត ក៏ចាប់ផ្ដើមមានអ្នកទាក់ទងមួយចំនួនដែរ ប៉ុន្តែនាងសុំពេលខ្លះដើម្បីធ្វើការសម្រេចចិត្តបន្តិចសិន ៕