ចរិតអាក្រក់ៗរបស់បណ្ដាតួអង្គរឿង “បុព្វេសន្និវាស” ដែលមិនគួរយកជាគំរូសោះឡើយ

2018-03-21 08:48:25
ចំនួនមតិ 0 | ចំនួនចែករំលែក 0

រយៈពេលនេះ ក្នុងប្រទេសថៃគឺគ្មានអ្នកណាមិនមើលរឿងភាគ “បុព្វេសន្និវាស” នោះទេ ហើយសូម្បីតែក្នុងប្រទេសកម្ពុជាយើងក៏មានអ្នកចាប់អារម្មណ៍ទស្សនារឿងនេះមិនតិចដែរ។ មិនត្រឹមតែមានសាច់រឿងកំប្លុកកំប្លែងគួរឲ្យចង់តាមដាន រឿងភាគមួយនេះក៏បានផ្ដល់ចំណេះដឹងផ្នែកវប្បធម៌ ប្រវត្តិសាស្ត្រមួយផ្នែកធំសម្រាប់ជនជាតិថៃ ព្រមជាមួយគំនិតអប់រំមួយចំនួន។ ក្នុងនោះដែរ អ្នកនិពន្ធបានរំលេចនូវសកម្មភាពរបស់តួអង្គមួយចំនួនដែលអ្នកទស្សនាមិនគួរយកជាគំរូសោះឡើយ។

១. តួអង្គ ម៉ឺនសុនថនថេវ៉ា

ទន្ទឹមនឹងមានចំណុចល្អ តួឯកប្រុសក៏មានចំណុចអាក្រក់មួយចំនួនដែរដែលខុសសីលធម៌ ដូចជាចូលចិត្តផឹកស្រាស្រវឹង និងនិយាយស្ដីដោយប្រើភាសាអាក្រក់ៗចំពោះតួឯកស្រី រហូតធ្វើឲ្យនាងស្រក់ទឹកភ្នែក។ ការផឹកសុរា ឬគ្រឿងស្រវឹងនេះ គឺខុសសីល ៥ចំណុចទី៥ សុរាមេរយៈ។

២. តួអង្គ នាងការ៉ាកេត

គឺតួអង្គអាក្រក់ជាងគេ ស្ទើរតែរកចំណុចល្អមិនបានក្រៅពីរូបសម្បត្តិ។ ក្នុងនោះមានទាំងនិយាយស្ដីគ្មានសុជីវធម៌ ខ្ជិលច្រអូស មិនធ្វើការធ្វើងារ មិនត្រូវចិត្តអ្នកណាធ្វើបាបអ្នកនោះ មិនចាប់អារម្មណ៍បុណ្យបាប ទីបំផុតក៏ត្រូវធ្លាក់នរក ទោះបី តួនាង កេតសុរាង ខំធ្វើអំពើល្អជួយយ៉ាងណាក៏មិនអាចឡើងឋានសួគ៌បានដែរ។

៣. តួអង្គ អាចយ

ជាអ្នកបម្រើជំនិតតួឯកប្រុស ដែលមានចិត្តស្មោះត្រង់នឹងចៅហ្វាយនាយ ប៉ុន្តែទៅដល់ទីណាយកមាន់ទៅជល់នៅទីនោះ។ នេះគឺជាការធ្វើបាបសត្វ ហើយក៏ជាអំពើខុសច្បាប់ដែរ បើក្នុងសម័យបច្ចុប្បន្ន។

៤. ហ្លួងសុនសាខន

គឺជាតួអង្គជនបរទេសដែលមានភាពឆ្លាតវៃ អាចចូលបម្រើការងាររាជការ ហើយក៏ជាបុគ្គលសំខាន់មួយរូបដែរក្នុងប្រវត្តិសាស្ត្រថៃ។ ប៉ុន្តែចំណុចមិនល្អដែលស្ដែងឲ្យឃើញក្នុងតួអង្គនេះ គឺចូលចិត្តនិយាយស្ដីគំរាមកំហែង មិនចាប់អារម្មណ៍ថាអ្នកណាមានរឿងក្ដៅក្រហាយដោយសារខ្លួន ដូច្នេះហើយទើបធ្វើឲ្យនាងម៉ាលីពិបាកឆ្លើយតបក្ដីស្រឡាញ់។ មិនយូរមិនឆាប់ គឺនឹងត្រូវទទួលរងបាបកម្មដល់ជីវិត។

៥. តួអង្គ យាយព្រីក

ជាតួអង្គអ្នកបម្រើដែលចូលចិត្តមានគំនិតគុំកួន និយាយចាក់ចេកចាក់ស្ករ ពន្លើសការពិត និយាយច្រើននាំរឿងច្រើន ដូច្នោះហើយទើបក្នុងរឿងឃើញឃើញត្រូវឈាមមាត់ច្រើនតាមនោះដែរ។

៦. តួអង្គ នាងច័ន្ទវ៉ាត

ជាតួរងស្រីដែលលួចស្រឡាញ់តួឯកប្រុស ចូលចិត្តឲ្យមុខ ឲ្យភ្នែក បញ្ចេញកិរិយាមារយាទឲ្យដៃបុរស ទាំងដឹងថាគេមានគូដណ្ដឹងរួចទៅហើយ។ នេះក៏ជាទង្វើខុសសីលធម៌មួយដែរ និងអាចឈានដល់ការខុសសីល ៥ ត្រង់ចំណុច កាមេសុមិច្ឆាចារា ៕