៨ យ៉ាងបញ្ជាក់ថាអ្នកជាមនុស្សមានសុខភាពល្អ ទោះជាអ្នកមិនគិតដូច្នោះក៏ដោយ
- 2018-03-20 01:52:55
- ចំនួនមតិ 0 | ចំនួនចែករំលែក 0
៨ យ៉ាងបញ្ជាក់ថាអ្នកជាមនុស្សមានសុខភាពល្អ ទោះជាអ្នកមិនគិតដូច្នោះក៏ដោយ
ដោយសារតែសម័យបច្ចុប្បន្ន សារធាតុគីមីជាច្រើន ត្រូវបានប្រើប្រាស់ក្នុងចំណីអាហារ មនុស្សគ្រប់គ្នាពិតជាមានការព្រួយបារម្ភយ៉ាងខ្លាំងចំពោះសុខភាពផ្ទាល់ខ្លួន។ ស្តង់ដារនៃការរស់នៅ របបអាហារ ការហាត់ប្រាណ កំពុងតែជាទីចាប់អារម្មណ៍ និងយកចិត្តទុកដាក់យ៉ាងខ្លាំង ពីសំណាក់អ្នកដែលស្រឡាញ់សុខភាព។ សញ្ញា ៨ យ៉ាងខាងក្រោមបញ្ជាក់ថាសុខភាពអ្នកល្អខ្លាំងណាស់ ហើយអ្នកគួរឈប់គិតច្រើនទៀតទៅ៖
១.អ្នកញ៉ាំតែពេលឃ្លាន ហើយមិនដែលញ៉ាំច្រើនជ្រុលឡើយ
អ្នកមិនយកការញ៉ាំ ដើម្បីបំបាត់ភាពធុញថប់ ឯកា ឬពិបាកចិត្តនោះទេ។ ម៉្យាងវិញទៀត អ្នកក៏មិនដែលញៀនជាមួយការញ៉ាំអាហារខ្លាំង រហូតមិនអាចគ្រប់គ្រងចំណង់ខ្លួនឯងបាននោះឡើយ។
២.ប្រកាន់ខ្ជាប់របបអាហារសុខភាពជាប្រចាំ
អ្នកញ៉ាំអាហារដែលមានឱជារសច្រើនមុខ ចម្រុះគ្រប់ប្រភេទជាប្រចាំ។ ទោះជារវល់ប៉ុណ្ណាក៏អ្នកមិនដែលញ៉ាំអាហារផ្ដេសផ្ដាសឡើយ។ អាហារដែលមិនល្អចំពោះសុខភាព អ្នកមិនដែលយកខ្លួនបៀតនោះទេ។
៣.ដឹងថារាងកាយខ្លួនត្រូវការអាហារកម្រិតណា
គ្មានរូបមន្តឯណាអាចគណនាឃើញជាក់លាក់ថាអ្នកគួរញ៉ាំប៉ុណ្ណា ដើម្បីបំពេញតម្រូវការរាងកាយឲ្យគ្រប់គ្រាន់នោះទេ។ ហេតុនេះប្រសិនអ្នកស្គាល់ខ្លួនឯងច្បាស់ដឹងថា កម្រិតអាហារប៉ុណ្ណាអាចរក្សាថាមពលឲ្យមានស្ថិរភាព វាពិតជារឿងប្រសើរខ្លាំងណាស់។
៤.ដកដង្ហើមធម្មតា ពេលឡើងជណ្ដើរជើង
មិនមែនទាល់តែអ្នកហាត់ប្រាណ លេងកីឡាជាប្រចាំ ទើបអាចមានសុខភាពល្អនោះទេ។ ជាឧទាហរណ៍ ប្រសិនរាល់ពេលអ្នកឡើងជណ្ដើរ អ្នកមិនមានអាការៈ ហត់ ដង្ហក់ ពិបាកដកដង្ហើម មានន័យថាសុខភាពអ្នកពិតជារឹងមាំល្អណាស់ ដូច្នេះអ្នកមិនចាំបាច់ព្រួយបារម្ភច្រើនឡើយ។
៥.បម្រែបម្រួលអារម្មណ៍អ្នកមានគ្រប់សព្វ តាំងពីក្រៀមក្រំ រហូតដល់រំភើបខ្លាំង
ប្រសិនអ្នកឧស្សាហ៍មានអារម្មណ៍ខឹង ក្រៀមក្រំ មួម៉ៅ រីករាយ រំភើប រំជើបរំជួល ផ្លាស់ប្ដូរញឹកញាប់ចុះឡើងៗ មានន័យថាសុខភាពផ្លូវចិត្តពិតជាល្អ ប្រក្រតីខ្លាំងណាស់។
៦.អ្នកអាចក្រោកពីគេងបានពីព្រលឹម ដោយមិនត្រូវការជំនួយពីម៉ោងរោទ៍
ជារៀងរាល់យប់ អ្នកតែងគេងលក់ស្រួល គ្រប់គ្រាន់ ដូច្នេះអ្នកមិនមានការលំបាកក្នុងការក្រោកពីព្រលឹមឡើយ។ ជាទម្លាប់ឲ្យតែដល់ម៉ោងត្រូវក្រោក គឺអ្នកដឹងតែភ្ញាក់ទាន់ពេលជានិច្ច។
៧.អ្នកមិនដែលគេងលក់ភ្លាមៗទេ
យូរៗម្ដង អ្នកអាចគេងលក់ភ្លាម ពេលដាក់ក្បាលដល់ខ្នើយ ព្រោះតែនៅពេលថ្ងៃអ្នកអស់កម្លាំងខ្លាំងពេក ប៉ុន្តែវាមិនមែនជាទម្លាប់ជាប្រចាំរបស់អ្នកទេ។ ជាទូទៅអ្នកតែងតែចំណាយពេលពីចន្លោះ ១០ ទៅ ២០ នាទីដើម្បីគេងលក់ យ៉ាងស្ងប់ចិត្តបំផុត ហើយនេះគឺជារឿងល្អបំផុតសម្រាប់សុខភាព។
៨.អ្នកមានថាមពលគ្រប់គ្រាន់ ដើម្បីធ្វើរឿងដែលអ្នកចូលចិត្ត
ដេក ញ៉ាំ ធ្វើការ គឺជាវដ្ដជីវិតវិលចុះវិលឡើងសម្រាប់មនុស្សគ្រប់គ្នា ដូច្នេះប្រសិនក្រៅពីកិច្ចការចាំបាច់ទាំងនេះហើយ អ្នកអាចនៅមានថាមពលគ្រប់គ្រាន់ រីករាយជាមួយជីវិតខ្លួនឯងបន្ថែមដូចជា ប្រលែងលេងជាមួយកូនៗ ជួបជុំមិត្តភ័ក្ដិ លេងជាមួយសត្វចិញ្ចឹម មានន័យថាសុខភាពផ្លូវកាយ និងផ្លូវចិត្តរបស់អ្នកពិតជាល្អខ្លាំងមែនទែន៕
ចុចអាន៖រោគសញ្ញាគ្រោះថ្នាក់ ៧ យ៉ាង ដែលស្ត្រីជាច្រើនមិនសូវអើពើ