ស្រីៗចាស់មិនទាន់ តែសក់ជ្រុះទាំងដៃៗអាចមកពីមូលហេតុទាំងនេះ
- 2018-04-18 03:27:05
- ចំនួនមតិ 0 | ចំនួនចែករំលែក 0
ស្រីៗចាស់មិនទាន់ តែសក់ជ្រុះទាំងដៃៗអាចមកពីមូលហេតុទាំងនេះ
តាមធម្មតាស្ថានភាពជ្រុះសក់តែងកើតឡើងចំពោះស្ត្រីវ័យកណ្ដាល ចាប់ពីអាយុ៤០ឆ្នាំឡើងទៅ ព្រោះជាពេលវេលាដែលរាងកាយចាប់ផ្ដើមបាត់បង់ការលូតលាស់។ ប៉ុន្តែសម័យនេះ ការជ្រុះសក់ច្រើនកើតឡើងលើមនុស្សទាំងក្មេងទាំងចាស់ ជាពិសេសចំនួនក្មេងៗដែលជ្រុះសក់មានការកើនឡើងជាងមនុស្សចាស់ផង។ តាមការសិក្សាពីស្ត្រីជាច្រើនដែលធ្លាប់មានបញ្ហាសក់នេះ ឃើញថាមានមូលហេតុចម្បងមួយចំនួនដែលបណ្ដាលឱ្យសក់ចេះតែជ្រុះរាល់ថ្ងៃ។
១-ប្រើសាប៊ូមិនត្រឹមត្រូវ
ការប្រើសាប៊ូច្រើនពេក ឬតិចពេករាល់ពេលកក់សក់គឺមិនល្អសម្រាប់សុខភាពស្បែកក្បាលនិងសក់ឡើយ។ បើប្រើសាប៊ូតិចពេក វានឹងធ្វើឱ្យស្បែកក្បាលស្ទះ ញើសមិនអាចចេញមកបាន បណ្ដាលឱ្យឫសសក់ទៅជាទន់និងជ្រុះធ្លាក់មក។ ចំណែកការប្រើសាប៊ូច្រើនជ្រុលនឹងបណ្ដាលឱ្យស្បែកក្បាលនិងសក់មិនអាចបែងចែកសំណើមបានត្រឹមត្រូវ។ ដោយឡែក ការកក់ដោយប្រើកម្លាំងខ្លាំងក៏អាចធ្វើឱ្យសក់ទៅជាផុយនិងបែកចុងបាន។
២-ស្ត្រេស
អារម្មណ៍តានតឹងនឹងធ្វើឱ្យរាងកាយទាំងមូលមានសម្ពាធ។ បន្ថែមពីនេះ វាក៏អាចប៉ះពាល់ដល់សុខភាពស្បែកក្បាលនិងសក់ ដែលធ្វើឱ្យឫសផុយស្រួយ នាំឱ្យវាងាកជ្រុះចុះមកលឿនជាងធម្មតា។
៣-មានផ្ទៃពោះ
ជាធម្មតា ស្ត្រីក្រោយសម្រាលកូនអាចជួបប្រទះការជ្រុះសក់ច្រើនគួរឱ្យកត់សម្គាល់ ដោយសារតែអារម្មណ៍ស្ត្រេសក្នុងអំឡុងពេលឈឺពោះសម្រាល និងការប្រែប្រួលអរម៉ូនក្នុងរាងកាយ។ ប៉ុន្តែអាការៈនេះអាចនឹងបាត់ទៅវិញ ក្រោយសម្រាលកូនបានប៉ុន្មានខែ បូករួមនឹងការថែទាំសុខភាពបានល្អ។
ចុចអាន៖ មានតែស្រាបៀមួយដបព្យាបាលសក់បានឡើងស្អាតទន់រលាស់ដូចសរសៃសូត្រ
៤-របបអាហារគ្មានជីវជាតិ
ជាពិសេសសម្រាប់អ្នកកំពុងព្យាយាមសម្រកទម្ងន់អាចជួបបញ្ហាជ្រុះសក់ ដោយសាររបបអាហារប្រចាំថ្ងៃគ្មានជីវជាតិគ្រប់គ្រាន់។ កង្វះប្រូតេអ៊ីនគឺជាផ្នែកមួយនៃការថយចុះនៃសុខភាពស្បែកក្បាលនិងសក់ដែលបណ្ដាលឱ្យជ្រុះ។
៥-លេងស្ទីលខ្លាំងពេក
ការកក់សក់ញឹកពេក ឧស្សាហ៍លេងពណ៌សក់ ប្រើប្រដាប់ធ្វើសក់ញឹក ក៏បណ្ដាលឱ្យសក់ទៅជាជ្រុះទាំងវ័យក្មេងផងដែរ។
៦-តំណពូជ
កត្តាមួយទៀតនៃការជ្រុះសក់គឺបណ្ដាលមកពីតំណពូជ។ គ្រួសារខ្លះជួបបញ្ហាជ្រុះសក់នេះតាំងពីជីដូនជីតាតមកដល់ចៅតែម្ដង ទោះបីមិនបានធ្វើរឿងខាងលើក៏ដោយ។ ដូច្នេះគួរទៅពិភាក្សាជាមួយគ្រូពេទ្យជំនាញដើម្បីស្វែងរកវិធីព្យាបាលចំពោះបញ្ហានេះ។
អ្វីដែលគួរធ្វើដើម្បីបញ្ឈប់សក់ជ្រុះ
សម្រាប់អ្នកដែលមិនមានបញ្ហាជ្រុះសក់ដោយតំណពូជអាចងាកមកចាប់អារម្មណ៍លើការថែរក្សាសក់ឱ្យបានត្រឹមត្រូវដោយខ្លួនឯង តាមរយៈវិធីខាងក្រោម៖
កាត់បន្ថយការប្រើប្រដាប់ធ្វើសក់ ឬប្រើកម្ដៅ (ម៉ាស៊ីនកៀប ផ្លុំ មូរសក់...)
បង្កើនការញ៉ាំអាហារដែលសម្បូរវីតាមីន C
លាបប្រទាលកន្ទុយក្រពើលើសក់ដើម្បីបន្ថែមសំណើមនិងមានសុខភាពល្អ
ហាត់ប្រាណជាប្រចាំ
ញ៉ាំទឹកឱ្យបានច្រើន
ញ៉ាំអាហារដែលមានជីវជាតិគ្រប់គ្រាន់៕