សញ្ញា ៨យ៉ាង បញ្ជាក់ថាអ្នកនៅតែមិនទាន់កាត់ចិត្តពីសង្សារចាស់បាននៅឡើយ
- 2018-03-12 02:16:15
- ចំនួនមតិ 0 | ចំនួនចែករំលែក 0
សញ្ញា ៨យ៉ាង បញ្ជាក់ថាអ្នកនៅតែមិនទាន់កាត់ចិត្តពីសង្សារចាស់បាននៅឡើយ
ធ្លាប់ស្រឡាញ់គេខ្លាំង ដូច្នេះក្រោយបែកគ្នាអ្នកក៏ត្រូវឈឺចាប់ខ្លាំងដូចគ្នា។ ពេលខ្លះមនុស្សស្រីពិតជាមាត់រឹងណាស់ ទោះក្នុងចិត្តនឹកគេ នៅតែស្រឡាញ់គេខ្លាំងប៉ុណ្ណា ក៏មាត់មិនងាយនិយាយការពិតដែរ។ ត្បិតតែអ្នកអាចបិទបាំងភ្នែកអ្នកដទៃបានក៏ដោយ ប៉ុន្តែអ្នកមិនអាចលាក់ជាមួយខ្លួនឯងបានឡើយ។ យ៉ាងណាមិញខាងក្រោមនេះហើយជាសញ្ញា៨យ៉ាង ដែលបញ្ជាក់ថាអ្នកនៅតែមិនទាន់កាត់ចិត្តពីសង្សារចាស់បាននៅឡើយទេ ទោះជាអ្នកប្រឹងប្រែងខ្លាំងយូរមកហើយក្ដី៖
១. ស្ដាប់បទចម្រៀង នៅតែនឹកដល់គេ
គូស្នេហ៍ណាក៏ដូចគ្នា តែងតែមានបទចម្រៀងពិសេសៗមួយចំនួន ដែលត្រូវជាមួយសាច់រឿងខ្លួន និងតែងតែស្ដាប់ជាមួយគ្នា ឬច្រៀងឲ្យគ្នាស្ដាប់ទៅវិញទៅមក។ ប្រសិនបើរាល់ពេលអ្នកឮបទចម្រៀងនោះ អ្នកនៅតែស្រណោះ ហើយទឹកភ្នែកក៏ធ្លាក់ចុះដោយមិនដឹងខ្លួន ច្បាស់ណាស់ថាអ្នកនៅមិនទាន់ឈប់ស្រឡាញ់គេទាំងស្រុងនៅឡើយទេ។
**២. ឧស្សាហ៍រំឭកពីគេ ស្ទើរគ្រប់ប្រធានបទនៃកិច្ចសន្ទនា**
មិនថានិយាយគ្នារឿងកីឡា ហ្វេសិន ការកម្សាន្ត ទម្លាប់ ចំណង់ចំណូលចិត្ត ឬរឿងរ៉ាវផ្សេងៗ អ្នកតែងតែលើកយកឈ្មោះរបស់គេមកនិយាយជានិច្ច។ ត្បិតថាអ្នកប្រើពាក្យ “សង្សារចាស់” មែន ប៉ុន្តែមិត្តភក្ដិគ្រប់គ្នាដែលនៅជុំវិញអ្នក ប្រាកដជាដឹងច្បាស់ណាស់ថាអ្នកនៅតែស្រឡាញ់គេ ដោយសារតែទង្វើបែបនេះឯង។
៣. ចង់ខល ឬផ្ញើសាររកគេ
យូរៗម្ដង ជំងឺចាស់រើឡើង អ្នកពិបាកគ្រប់គ្រងខ្លួនឯង ព្រោះក្នុងចិត្តពុះកញ្ជ្រោលចង់ទាក់ទងទៅគេយ៉ាងខ្លាំង។ អ្នកអាចរកលេសសព្វគ្រប់បែបយ៉ាង ជាពិសេសគឺទៅផឹកស្រាឲ្យស្រវឹង រួចក៏ធ្វើជាវង្វេងវង្វាន់ច្រឡំខលទៅគេ ដើម្បីរំសាយចិត្តនឹកខ្លះៗក៏មាន។
៤. តាមដានព័ត៌មានគេក្នុងបណ្ដាញសង្គម
ឈ្មោះរបស់គេ គឺនៅជាប់កន្លែងSearchរបស់អ្នកដំបូងគេតែម្ដង។ ឲ្យតែបើកFacebookភ្លាម អ្នកក៏នឹកឃើញរូបគេមុនគេ ព្រោះអ្នកនៅតែចង់ដឹងឮរឿងរ៉ាវថ្មីៗគ្រប់យ៉ាងដែលគេកំពុងតែជួបប្រទះក្នុងជីវភាពប្រចាំថ្ងៃ ដូចពីមុនដដែល។
៥. ចងចាំរឿងរ៉ាវចាស់ៗ
នៅសុខៗស្រាប់តែនឹកឃើញអនុស្សាវរីយ៍ចាស់ៗដូចជា ថ្ងៃដែលជួបគ្នាដំបូង ថ្ងៃដែលអ្នកទាំងពីរសារភាពស្នេហ៍ចំពោះគ្នា ឬថ្ងៃដែលអ្នកទាំងពីរធ្លាប់ឈ្លោះគ្នាខ្លាំងជាដើម។ មួយវិញទៀត អ្នកនៅតែមានអារម្មណ៍ឯកោ កណ្ដោចកណ្ដែង ទោះជាកំពុងស្ថិតនៅជាមួយហ្វូងមនុស្សជាច្រើនក៏ដោយ។
៦. ច្រណែនគូស្នេហ៍ថ្មីរបស់គេ
អ្នកក្លាយជាតួឈ្នានីសគូស្នេហ៍ថ្មីរបស់គេ។ ឲ្យតែមានឧកាស អ្នកតែងតែនិយាយអាក្រក់ៗអំពីមនុស្សស្រីម្នាក់នោះប្រាប់គេឯង។ អ្នកប្រៀបធៀបខ្លួនឯង ជាមួយម្នាក់ថ្មីនោះគ្រប់រឿង។ ក្នុងចិត្តរបស់អ្នកពិតជាស្អប់នាង ដែលចូលមកជំនួសកន្លែងរបស់អ្នកខ្លាំងជាទីបំផុត។
៧. គ្មានបំណងចង់ជួបស្នេហ៍ថ្មី
អ្នកប្រាប់ឪពុកម្ដាយ សាច់ញាតិ មិត្តភក្ដិ មិនឲ្យណែនាំអ្នកថ្មី សម្រាប់អ្នកទៀតឡើយ។ ឲ្យតែនឹកឃើញរឿងរៀបការ មុខរបស់សង្សារចាស់ផុសនៅពេញខួក្បាលអ្នកតែម្ដង។ អ្នកមិនចង់ស្រមៃសោះថា តើអ្នកអាចបន្តជីវិតគូជាមួយបុរសណាម្នាក់ក្រៅពីគេបានដែរឬអត់។
៨. ប្រៀបធៀបអ្នកថ្មី ជាមួយគេ
អ្នកមិនបានស្រឡាញ់អ្នកថ្មី ដោយចេញពីចិត្តឡើយ។ អ្នកយកគេ គ្រាន់តែដើម្បីស្អំបេះដូងរបស់អ្នកប៉ុណ្ណោះ ដូច្នេះមិនថាគេធ្វើអ្វីល្អប៉ុណ្ណា ក៏មិនដែលត្រូវ ឬអាចឲ្យអ្នករំភើបចិត្តបានដែរ។ អ្នកដឹងថាខ្លួនកំពុងធ្វើខុស ប៉ុន្តែអ្នកពិតជាគ្មានផ្លូវដើម្បីបញ្ឈប់ចិត្តដែលតែងតែប្រៀបធៀបនោះបានសោះឡើយ៕
ចុចអាន៖ចង់ឲ្យមិត្តប្រុសចេះប្រចណ្ឌភ្លាមៗ នារីៗគួរប្រើវិធីសាស្ត្រ ៤យ៉ាងខាងក្រោម