ចង់ឲ្យអ្នកជុំវិញខ្លួនលង់ស្រលាញ់តាំងពីថ្ងៃដំបូង នារីៗត្រូវចេះវិធីនេះ

2018-03-07 01:30:00
ចំនួនមតិ 0 | ចំនួនចែករំលែក 0

នារីៗដែលទទួលបានការស្រលាញ់រាប់អានច្រើនពីអ្នកជិតខាង ពិតជាមានសំណាងណាស់ ព្រោះពេលមានអាសន្ន ឬទុក្ខលំបាកណាមួយ តែងមានអ្នកជួយជានិច្ច។ ដូចនេះស្រីៗបើចង់ឲ្យអ្នកក្បែរខ្លួនលង់ស្រលាញ់ កុំភ្លេចរឿង ៧ យ៉ាងនេះ៖

១.ស្គាល់ពួកគេ

វាជាការសំខាន់ក្នុងការជីកយកព័ត៌មានទាំងអស់អំពីពួកគេ មុនអ្នកចូលខ្លួនទៅស្និទ្ធស្នាលនឹងអ្នកទាំងនោះ។ នៅពេលដែលអ្នកស្គាល់ពួកគេច្បាស់ល្មម អ្នកនឹងដឹងអំពីចំណង់ចំណូលចិត្ត និងអ្វីដែលពួកគេមិនចូលចិត្ត។ ល។ ព័ត៌មាននេះនឹងធ្វើឲ្យអ្នកទាក់ទាញចិត្ត ដោយពេលទិញរបស់របរផ្ញើពួកគេ គឺត្រូវចិត្តទាំងអស់។

រូបតំណាង

**២.ទឹកមុខស្រស់ស្រាយ**

អ្នកត្រូវតែជាបុគ្គលមានភាពស្រស់ស្រាយ និងរាក់ទាក់ ដើម្បីបញ្ចេញថាមពលវិជ្ជមានក្នុងខ្លួនឲ្យគេឃើញ។ មនុស្សជាច្រើនពិតជាចូលចិត្តអ្នកដែលរួសរាយ ព្រោះបង្ហាញថាអ្នកជាមនុស្សងាយចុះសម្រុង និងមិនវាយឫក។ ទឹកមុខស្រស់ស្រាយមានសារៈសំខាន់ណាស់ ដើម្បីឲ្យភាពគួរឲ្យស្រលាញ់ងាយទាក់ទាញចំណាប់អារម្មណ៍អ្នកជិតខ្លួន។ ប្រសិនបើអ្នកចង់ឲ្យនរណាម្នាក់ចូលចិត្ត ដំបូងអ្នកត្រូវតែញញឹមទៅកាន់គេសិន។

៣.ការសន្ទនាដោយសម្ដីផ្អែមល្ហែម

នៅពេលអ្នកនិយាយជាមួយអ្នកដទៃ ដោយសម្ដីផ្អែម នរណាៗក៏ឈ្លក់វង្វេងដែរ ទោះជាមិនសម្រស់មិនសូវបានក៏ដោយ។ ព្រោះការសន្ទនាដោយសម្ដីទន់ភ្លន់ ធ្វើឲ្យពួកគេមានអារម្មណ៍សប្បាយរីករាយ ហើយការសន្ទនាទៀតសោតគួរតែយកចិត្តទុកដាក់ពីអ្វីដែលខ្លួន និងពួកគេបាននិយាយផងដែរ។

៤.រាក់ទាក់

ទោះបីជាអ្នកទាំងពីរទើបស្គាល់ ឬឃើញមុខគ្នា ក៏គួរតែរួសរាយរាក់ទាក់ ដើម្បីឲ្យភាគីម្ខាងទៀតមានអារម្មណ៍កក់ក្ដៅដូចអ្នកធ្លាប់ស្គាល់គ្នា។ ប្រសិនបើអ្នកមានភាពកក់ក្ដៅចំពោះពួកគេ ពួកគេនឹងមានអារម្មណ៍ល្អនិយាយជាមួយអ្នក និងពេញចិត្តចំពោះចរិតលក្ខណៈរបស់អ្នក។

៥.និយាយពាក្យពិត

កុំចាប់ផ្ដើមឡើងដោយការភូតភរ ឬអួតក្អេងក្អាងឲ្យសោះ អ្នកត្រូវរក្សាសេចក្ដីថ្លៃថ្នូរ ហើយមិនគួរនិយាយស្ដីបែបអ្នកដទៃមិនដល់ខ្លួនឡើយ។ បើអ្នកទើបនិយាយជាមួយពួកគេជាលើកដំបូង សូមដើរទៅយឺតៗ ហើយនិយាយដោយសំឡេងស្ងប់ស្ងាត់ និងគួរសម។

៦.ធ្វើឲ្យពួកគេសើច

ការមានភាពកំប្លុកកំប្លែង តែងតែជាចំណុចសំខាន់។ បើអ្នកនិយាយស្ដីឲ្យគេសើចបាន តាំងពីថ្ងៃជួបដំបូងបាន មានន័យថាអ្នកនឹងត្រូវគេចំណាំ ហើយឃើញលើកក្រោយដើរចូលទៅរកតែម្ដង។ តែកុំធ្វើខ្លួនសាំញ៉ាំ និយាយអាសអាភាសអី ព្រោះវាមិនមែនជារឿងកំប្លែងទេ ហើយគេក៏ស្អប់ ឬចំណាំមុខពេលឃើញលើកក្រោយដើរជៀស។

៧.សរសើរពួកគេ

សួរនាំពីអ្វីដែលពួកគេបានរៀន និងការងារកន្លង ហើយពោលពាក្យសរសើរពីរឿងដែលពួកគេបានឆ្លងកាត់ផង។ បែបនេះ អ្នកដទៃប្រាកដជាឈ្លក់វង្វេងនឹងអត្តចរិតអ្នកមិនខាន៕