ស្រីស្អាត ប៉ុប រចនា ប្រាប់វិធីធ្វើផ្កាខាត់ណាខៀវដើម្បីបានទាំងរសជាតិឆ្ងាញ់ផង និងជួយសុខភាពផង

2018-03-05 02:20:22
ចំនួនមតិ 0 | ចំនួនចែករំលែក 0

ញ៉ាំបន្លែច្រើនល្អខ្លាំងចំពោះសុខភាពដោយផ្ដល់ទាំងវីតាមីនល្អៗ និងសារជាតិចិញ្ចឹមដល់រាងកាយ។ ការញ៉ាំបន្លែជួយឲ្យស្បែកស្អាត និងរាងស្រឡូន ដោយសារបន្លែមានកាឡូរីទាប និងមានវីតាមីនខ្លះបំប៉នស្បែកឲ្យស្អាតភ្លឺផងដែរ។ ប៉ុន្តែទោះល្អយ៉ាងនេះក្ដី ក៏មានមនុស្សមួយចំនួន មិនសូវចូលចិត្តញ៉ាំបន្លែទេ ព្រោះតែរសជាតិមិនសូវឆ្ងាញ់ និងបន្លែខ្លះក្លិនក្រពុល ហើយអ្នកខ្លះទៀតគឺមិនចេះញ៉ាំតែម្ដង។

ដោយឡែក កញ្ញា ប៉ុប រចនា ដែលគ្រប់គ្នាស្គាល់ដោយសារនាងមានមុខមាត់ស្រដៀងតារាថៃស្រីនាង Kimberly បានប្រាប់កញ្ញាថា នាងចូលចិត្តញ៉ាំបន្លែខ្លាំង ហើយចូលចិត្តគ្រប់មុខតែម្ដង។ នាងបានប្រាប់ក្នុងបទសម្ភាសន៍ជាមួយក្រុមការងារកញ្ញាថា នាងចូលចិត្តញ៉ាំបន្លែតាំងពីតូចមកម្ល៉េះ ហើយចូលចិត្តជាងគេនោះគឺ ផ្កាខាត់ណាខៀវ។

រចនាបានចែករំលែកពីវិធី ធ្វើផ្កាខាត់ណាខៀវនេះឲ្យឆ្ងាញ់គឺ ដំបូងនាងស្រុះបន្លែនេះ ១នាទី ហើយស្រង់វាភ្លាមយកត្រាំទឹកកក។ ធ្វើបែបនេះវានិងធ្វើឲ្យខាត់ណាខៀវនោះ ផ្អែមហើយស្រួយ។

តិចនិកមួយទៀតដែលធ្វើឲ្យនាងញ៉ាំបន្លែឆ្ងាញ់ហើយច្រើន គឺនាងតែងប្រើទឹកជ្រលក់រសជាតិ ប្រៃជូរហឹរ ដូចជា ទឹកម្រេច ឬទឹកត្រីកោះកុង ដែលបន្ថែមរសជាតិឆ្ងាញ់ខ្លាំងទៅលើបន្លែគ្រប់មុខ ដែលនាងជ្រលក់នោះ។ ទឹកជ្រលក់ទាំងពីមុខនោះបានបំបាត់នូវរសជាតិក្រពុល ពីបន្លែដែលបន្ថែមរសជាតិឆ្ងាញ់ធ្វើឲ្យញ៉ាំបានច្រើនតែមិនធុញ។