សម្ភារៈផ្សេងៗច្នៃពីកំប្លោក ជិះយន្តហោះលក់ដល់អឺរ៉ុប

2018-02-19 04:42:45
ចំនួនមតិ 0 | ចំនួនចែករំលែក 0

កំប្លោកដែលគេស្ទើរតែបោះបង់ ឬ មិនចាប់អារម្មណ៍សោះ ប៉ុន្តែ អ្នកស្រី សូរ សម្បត្តិ បានច្នៃទៅជាវត្ថុអនុស្សាវរីយ៍ ជាពិសេសកាបូបប្រើប្រាស់ផ្សេងៗ ដែលធ្វើឲ្យផលិតផលធ្វើពីធម្មជាតិមួយនេះមានតម្លៃ រហូតមានទីផ្សារដល់បរទេសដូចជា អេស្ប៉ាញ ឥណ្ឌូណេស៊ី ជាពិសេស ជប៉ុន និង កូរ៉េ មានការបញ្ជាទិញច្រើនជាងគេ។

«ដំបូងប្ដីខ្ញុំអត់គាំទ្រទេ និងអត់ទៅ កាត់កំប្លោកឲ្យដែរ ពេលខ្ញុំធ្វើដំបូងប្រភេទអង្រឹង ធ្វើអត់ស្អាត គាត់យកអង្រឹងខ្ញុំទៅបោះចោលនៅកន្លៀតជញ្ជាំង ខ្ញុំឃើញរើសយកមកវិញ ក៏យកទៅលាងទឹកទុកមួយកន្លែងស្រាប់តែភ្ញៀវឃើញគេទិញយកអស់រលីង ឥលូវប្ដីខ្ញុំជឿជាក់លើខ្ញុំ»។ នេះបើតាមការរៀបរាប់ពីអ្នកស្រីសម្បត្តិ នូវប្រវត្តិ នៃការចាប់ផ្ដើមធ្វើច្នៃកំប្លោកធ្វើកាបូបដំបូង។

នៅអំឡុងឆ្នាំ ២០១០ អ្នកស្រី បានរៀនសូត្រ ពីគ្រូជនជាតិជប៉ុន ច្នៃកំប្លោកធ្វើជាកាបូប និងវត្ថុអនុស្សាវរីយ៍ផ្សេង ដោយអ្នកស្រីជាមនុស្សមានការប្រឹងប្រែង និងយកចិត្តទុកផង បានក្លាយទៅជាអ្នកច្នៃកាបូបធ្វើពីកំប្លោកបានស្អាតជាងគេ រហូតក្លាយជាសិប្បកម្មកំប្លោកល្បីល្បាញជាងគេនៅភ្នំក្រោម។ ផលិតផលដែលអ្នកស្រីផលិតបានមានដូចជា មួក កាបូបស្ពាយចំហៀង កាបូបយួរដៃ កន្ត្រក ហឹបដាក់សម្ភារៈជាដើម៕