ហេតុអ្វីបានកំពូលតារាសម្ដែងទិន ហ្វីមិនអាចឈានជើងចូលហូលីវូដបាន?
- 2018-02-08 04:58:42
- ចំនួនមតិ 0 | ចំនួនចែករំលែក 0
ហេតុអ្វីបានកំពូលតារាសម្ដែងទិន ហ្វីមិនអាចឈានជើងចូលហូលីវូដបាន?
ជាកំពូលតារារបស់ហុងកុង និងជាតារាជួរមុខអាស៊ី តែសិល្បករ Stephen Chow មិនធ្លាប់បានឈានជើងចូលទីផ្សារហូលីវូដទាល់តែសោះ តើហេតុផលមកពីអ្វី?
នៅក្នុងវិស័យភាពយន្តចិន ការដែលតារាស្រុកនេះបានសហការជាមួយអ្នកដឹកនាំរឿងហូលីវូដគឺជាវិធីដែលបង្ហាញពីលំដាប់របស់ពួកគេតើដល់កំរិតអន្តរជាតិឬនៅ បើទោះបីជាតួខ្លះបានចូលរឿងអាមេរិកតែ២ ៣នាទីក៏ដោយ។
ក្នុងចំណោមតារាជួរមុខចិនទាំងឡាយ Stephen Chow គឺជាតារាតិចតួចដែលមិនធ្លាប់បានចាប់ដៃជាមួយហូលីវូដទាល់តែសោះ។ អ្នកខ្លះលាន់មាត់ថា ស្ដេចកំប្លែងត្រកូល Chow មិនត្រូវបានអាមេរិកចាប់អារម្មណ៍ តែបណ្ដាញព័ត៌មាន Sina បានប្រឆាំងនឹងមតិនេះទាំងស្រុង។
តាមការពិត នៅក្នុងអាជីពរបស់ខ្លួន ស្ដេចកំប្លែងហុងកុងត្រូវបានហូលីវូដទាក់ទង៣ដងតែបានបដិសេធទាំងអស់។ ប្រភពខាងលើបានបន្តថា ក្រោយរឿង "ស្ដេចចុងភៅទិនហ្វី" តួអាយុ៥៥ឆ្នាំទទួលបានការចាប់អារម្មណ៍ទាំងក្នុង និងក្រៅប្រទេសបូករួមទាំងហូលីវូដផងដែរ។ ឆ្នាំ១៩៩៦ ផលិតករអាមេរិកបានស្វែងរកលោក ហើយមានបំណងផលិតរឿងដូចគ្នាតែតាមបែបអឺរ៉ុប។
“ទិន ហ្វីមិនបដិសេធដោយផ្ទាល់ តែលោកដាក់សំណើរ២។ ទី១គឺម្ហូបនៅក្នុងរឿងគឺត្រូវតែជាម្ហូបចិន និងទី២គឺក្បាច់គុនក្នុងរឿងគឺត្រូវតែជាក្បាច់គុនចិន។ រឿងនេះបានធ្វើឲ្យហូលីវូដគ្រវីក្បាល លែងចង់សហការ" Sina ឲ្យដឹង។
ឆ្នាំ២០០៦ ឱកាសបានមកម្ដងទៀតជាមួយនិស្សិតផ្ដាច់សង្ខារ នៅពេលលោកត្រូវបានគេអញ្ជើញថតរឿង "The Fobbiden Kingdom”។ ក្រោយពេលអានសាច់រឿងចប់ តារាកើតឆ្នាំ១៩៦២ បានស្នើរឲ្យផលិតករបោះទុនផលិតរឿង១០០លានដុល្លារ។ ការសហការគ្នានេះបានបរាជ័យនៅពេលអាមេរិកប្រកាសថានឹងបោះទុន៣០លានដុល្លារ។
លើកចុងក្រោយដែលហូលីវូដទាក់ទងទៅ ទិន ហ្វីគឺក្នុងឆ្នាំ២០០៩ នៅពេលគេចង់ឲ្យលោកដើរតួវីរបុរសជប៉ុនមួយរូប តែលោកបានឲ្យផ្លាស់ប្ដូរទៅជាវីរបុរសចិនវិញ ហើយនេះគឺរឿងមួយដែលខាងអាមរិកមិនអាចទទួលយកបាន។
បណ្ដាញព័ត៌មាន Toutiao បានឲ្យដឹងថា ការធ្វើដូចនេះគឺជាភាពឆ្លាតវៃរបស់ទិន ហ្វីព្រោះស្ទីលថតរឿងរបស់លោកខុសប្លែកពីគេ មិនចង់ត្រូវគេត្រួតពីលើ ដូចនេះលោកមិនចង់សហការជាមួយមនុស្សដែលលោកដឹងច្បាស់ថានឹងត្រូវគេត្រួតនោះឡើយ៕
ចុចអាន៖តារាស្រីកូរ៉េទាំង១០ដែលទាំងសម្រស់ និងកេរ្តិ៍ឈ្មោះឡើងស្រឺតៗទាំងអស់ក្រោយកាត់សក់ខ្លី