តិចនិករៀបចំខ្លួនទៅញ៉ាំការចំណាយអស់តិច តែបានស្រស់ស្អាតនិងរីករាយ

2018-02-06 06:58:20
ចំនួនមតិ 0 | ចំនួនចែករំលែក 0

រដូវញ៉ាំការម្ដងៗមិនថាតែអ្នកដែលរៀបការនោះទេ សូម្បីភ្ញៀវចូលរួមក៏ត្រូវប្រុងប្រៀបរៀបចំខ្លួនឲ្យបានសក្ដិសមផងដែរ។ ពេលញ៉ាំការម្ដងៗ សង្កេតឃើញថាអ្នកចូលរួមជាពិសេសស្រីៗតែម្ដងដែលចំណាយទាំងលុយនិងពេលដើម្បីតុបតែងខ្លួនឲ្យស្រស់ស្អាតសមសួនចូលរួមកម្មវិធី។ ជាទូរទៅខ្ទង់ចំណាយអស់ច្រើនលើសំលៀកបំពាក់ ការផាត់មុខនិងចងដៃផងដែរ។ ដោយសារយល់ពីស្ថានភាពសេដ្ឋកិច្ច និងដើម្បីជួយស្រីៗក្នុងការសន្សំសំចៃលើការចំណាយ។ ទាំងនេះជាតិចនិកដែលស្រីៗអាចសាកល្បងធ្វើ ដោយចំណាយតិច បានស្អាត និងនៅតែរីករាយក្នុងកម្មវិធីផងដែរ។

១. ស្លៀករ៉ូបឆ្លាស់គ្នា

ជាទូរទៅស្រីៗយើងចំណាយច្រើនលើសំលៀកបំពាក់និងរ៉ូបញ៉ាំការ។ យោងតាមការដកស្រង់សម្ដីរបស់ស្រីៗអ្នកភ្នំពេញមួយចំនួនបានឲ្យដឹងថា តម្លៃសំលៀកបំពាក់ហែជំនូនរាប់ទាំងឈ្នួលកាត់ជាមធ្យមគឺថោកបំផុតត្រឹម ៨០ដុល្លារក្នុងមួយឈុត ដែលម៉ូដសាមញ្ញមិនមានប៉ាក់ឌិន។ ចំណែករ៉ូបគឺតម្លៃចាប់ពី ៤០ដុល្លារឡើងទៅសម្រាប់រ៉ូបទិញស្រាប់ ហើយរូបកាត់គឺខ្ទង់ ១០០ដុល្លារឬច្រើនជាងនេះ។ ដូច្នេះការចេះស្លៀកពាក់ឆ្លាស់គ្នាក្នុងកម្មវិធីអាចជួយធ្វើឲ្យខ្ទង់ចំណាយថយចុះ។ របៀបស្លៀកពាក់ឆ្លាស់គ្នា គឺស្លៀករំលងគ្នា ចាប់ពី២ រោងឡើងទៅ ហើយត្រូវសង្កេតមើលថា អ្នកណាខ្លះចូលរួម ដើម្បីត្រៀមរ៉ូបដែលមិនឲ្យគេចាប់បានថាស្លៀកច្រើនដង។ យកល្អផុសរូបដូចគ្នា គូរចេះថតដោយកុំផ្ដោតលើរ៉ូបពេក។

២. ជួលរ៉ូប

ជួលរ៉ូបគឺជាវិធីមួយទៀតដែលចំណាយតិចទៅលើរ៉ូប។ ធម្មតាស្រីៗស្លៀករ៉ូបម្ដងឬក៏២ដងហើយឈប់ចង់ស្លៀកហើយ។ ទោះមិនចង់ស្លៀកច្រើនដងក៏ត្រូវតែបង្ខំចិត្តព្រោះតម្លៃរ៉ូបមួយៗគឺមិនថោកនោះឡើយ។ តែគ្រប់គ្នាអាចជួលរ៉ូបនៅតាមហាងកាត់ដេរក្នុងស្រុកមួយចំនួនដើម្បីស្លៀកពាក់ដោយគ្រាន់តែចំណាយពី ១៥ ទៅ ២០ ដុល្លារប៉ុណ្ណោះពេលជួលរ៉ូបម្ដង។ ធ្វើបែបនេះអ្នកអាចសន្សំសំចៃពីការចំណាយខ្លះៗទៅលើរ៉ូប។

៣. ខ្ចីរ៉ូបមិត្តភក្តិឬបងប្អូន

វាមិនមែនជារឿងអាម៉ាស់អីទេ ដោយគ្រាន់តែខ្ចីសំលៀកបំពាក់មិត្តភក្តិឬបងប្អូនស្រី ទុកស្លៀកពាក់ដោះទាល់មួយពេលនោះ។ តែអ្នកត្រូវនិយាយជាមួយគាត់ឲ្យបានមុខហើយលរ៉ូបដើម្បីទៅសារ៉េ ទំហំយ៉ាងហោចណាស់ឲ្យបាន ១អាទិត្យមុនកម្មវិធី។ ធ្វើដូចនេះអ្នកមិនសូវខ្វល់ខ្វាយ ពេលកៀកដល់ថ្ងៃកម្មវិធី។ ពេលស្លៀករួច បោកគក់ឲ្យស្អាតសងពូកគេវិញ ដើម្បីលើកក្រោយគេឲ្យខ្ចីទៀត។

៤. រៀនផាត់មុខតាមអ៊ីនធឺណិត

សម័យនេះអ្វីក៏អាចធ្វើបានដែរដោយគ្រាន់តែបើក យូធូបមើលនោះ។ ការផាត់មុខធ្វើសក់អីជាដើម អ្នកអាចរៀននិងធ្វើតាមអ៊ីនធឺណិតបានដោយគ្រាន់តែមើលតាមការបង្ហាត់បង្ហាញតាមយូធូប។ ធ្វើបែបនេះអ្នកនឹងកាត់បន្ថយចំណាយលើការផាត់មុខបានច្រើនគូរសមដែរ។ អ្នកអាចមើលសភាពការណ៍របស់កម្មវិធីការដែលអ្នកនឹងត្រូវចូលរួមនោះ ថាមានអ្នកស្គាល់ចូលរួមប៉ុន្មានអ្នក បើមានច្រើនអ្នកគួរទៅធ្វើខ្លួននៅសាឡន តែបើមានតិចផាត់ផាត់ខ្លួនឯងតិចៗទៅគ្រប់គ្រាន់ហើយ និងមិនអស់លុយច្រើនផងដែរ។

៥. ទៅដល់ត្រឹមម៉ោង៦

បើអាចគួរទៅដល់រោងការត្រឹមម៉ោង ៦ល្ងាចឬមុននេះ ព្រោះអ្នកអាចមានពេលថតរូបជាមួយកូនកំលោះក្រមុំ និងបានថតរូបជុំគ្នាផងដែរ។ ម៉្យាងទៀតទៅលឿនដូច្នេះអ្នកថតរូបបានស្អាត និងបានជជែកគ្នាលែងជាមួយមិត្តភក្តិដោយមិនសូវឃ្លានប្រញាប់ញ៉ាំអាហារ ដូចពេលទៅយឺតនោះឡើយ។

អត្ថបទ៖ Pencharm