ហេតុផល ៨ យ៉ាងបណ្ដាលឲ្យអ្នកគ្មានមិត្តល្អក្បែរខ្លួនសូម្បីតែម្នាក់
- 2018-01-26 02:04:00
- ចំនួនមតិ 0 | ចំនួនចែករំលែក 0
ហេតុផល ៨ យ៉ាងបណ្ដាលឲ្យអ្នកគ្មានមិត្តល្អក្បែរខ្លួនសូម្បីតែម្នាក់
គ្រាន់តែចង់បានមិត្តភ័ក្ដិល្អម្នាក់ហេតុអ្វីក៏ពិបាកខ្លាំងយ៉ាងនេះ?ការដែលត្រូវក្រុមមិត្តភ័ក្ដិព្រងើយកន្តើយ មិនយកចិត្តទុកដាក់ជាមួយពិតជារឿងឈឺចាប់ និងគ្រាំគ្រាបំផុត។ ដូច្នេះដើម្បីឲ្យអស់មន្ទិលសង្ស័យ ខាងក្រោមនេះជាហេតុផល ៨ យ៉ាង ដែលធ្វើឲ្យអ្នកមិនអាចមានមិត្តល្អដូចគេ ហើយអ្នកគួរតែព្យាយាមលុបបំបាត់ បើមិនចង់ឯកាតទៅទៀត៖
១.អ្នកជាមនុស្សទុទ្ទិដ្ឋិនិយម
អ្នកជាមនុស្សចូលចិត្តគិតផ្លូវអវិជ្ជមានខ្លាំងពេក។ អ្នកណាក៏មិនចូលចិត្តនិយាយលេងជាមួយមនុស្សដែលពោរពេញដោយ គំនិតអាក្រក់ៗ ឬកំហឹងគ្រប់ពេលនោះដែរ។ ដូច្នេះវាត្រឹមត្រូវហើយដែលគ្មានអ្នកណាចង់សេពគប់ជាមួយអ្នកនោះ។
២.អ្នកជាមនុស្សអាត្មានិយម
គ្មានអ្នកណាប្រាប់អ្នកត្រង់ៗនោះទេ។ អ្នកត្រូវទទួលយកការពិតដែលខ្លួនឯងតែងតែគិតពីផលប្រយោជន៍ ឬតម្រូវការផ្ទាល់ខ្លួនខ្លាំង។ អ្នកស្រឡាញ់តែខ្លួនឯងបែបនេះ អ្នកផ្សេងប្រាកដជាពិបាកក្នុងការកសាងទំនាក់ទំនងឲ្យរឹងមាំជាមួយណាស់។
៣.អ្នកជាមនុស្សពូកែទួញសោក
ពេលណាក៏យំយែក រអ៊ូរទាំ រៀបរាប់ទុក្ខសោកឥតល្ហែ។ មនុស្សណាក៏មានបញ្ហាដែរ គ្រាន់តែផ្សេងគ្នាប៉ុណ្ណោះ ដូច្នេះអ្នកគួរតែចេះបន្លប់បញ្ហាទាំងនោះ ដោយស្នាមញញឹម សំណើច ភាពសប្បាយរីករាយ នោះមនុស្សជុំវិញប្រាកដជាចង់នៅក្បែរអ្នកមិនខាន។
៤.អ្នកជាមនុស្សគួរឲ្យធុញ
រាល់កិច្ចសន្ទនា អ្នកតែងតែលើកប្រធានបទយ៉ាប់ៗមកនិយាយ។ អ្នកថែមទាំងអាចនិយាយបានហូរហែ ក្បោះក្បាយ ដោយមិនខ្វល់ថាអ្នកផ្សេងគេកំពុងចាប់អារម្មណ៍ឬអត់។ គ្មាននរណាអាចទ្រាំស្ដាប់អ្នករាប់ម៉ោង ចំពោះរឿងដែលពួកគេមិនចូលចិត្តឡើយ។
៥.អ្នកដើរជាមួយក្រុមមនុស្សមិនល្អ
ពេលខ្លះ បញ្ហាគឺមកពីអ្នកកំពុងរាប់អានមនុស្សមិនល្អ ឬក៏ធ្លាប់មានប្រវត្តិមិនល្អពីមុន។ មិនថាវាជាការពិត ឬពាក្យចចាមអារ៉ាម ជឿថាអ្នករាល់គ្នាប្រាកដជាមានចិត្តស្ទាក់ស្ទើរ ក្នុងការស្និទ្ធស្នាលជាមួយអ្នក។
៦.អ្នកភ្លេចមិត្តភ័ក្ដិ ពេលអ្នកមិនត្រូវការពួកគេ
ពេលអ្នកមានទុក្ខ អ្នកតែងតែសុំជំនួយពីមិត្តភ័ក្ដិ។ ដល់ពេលអ្នកបានសុខ ជួបរឿងរីករាយវិញ អ្នកមិនដែលនឹកឃើញនរណាទេ។ ពេលបានរាប់អានមិត្តថ្មីដែលល្អ អ្នកក៏ព្រងើយកន្តើយដាក់មិត្តចាស់ៗ ដូច្នេះអ្នកទាំងនោះក៏មិនចង់ធ្វើជាកង់សាគួរឲ្យអ្នកដូចគ្នា។
៧.អ្នកគ្មានការតស៊ូ ព្យាយាមគ្រប់គ្រាន់
ការសេពគប់មិត្តក៏ដូចជាការប្រកបការងារប្រចាំថ្ងៃដែរ។ បើអ្នកគ្រាន់តែធ្វើបែបហីៗ នោះលទ្ធផលក៏ទៅតាមនោះដូចគ្នា។ គ្មានអ្វីមួយបានមកដោយងាយស្រួលឡើយ។
៨.អ្នកជាមនុស្សពូកែច្រណែន
អ្នកជាមនុស្សដែលមានបញ្ហាចំពោះការជឿជាក់គ្នា។ អ្នកភ័យ ព្រួយបារម្ភ ប្រច័ណ្ឌ ពេលមិត្តអ្នកជួបមនុស្សថ្មី។ ទង្វើបែបនេះ ពិតជាធ្វើឲ្យអ្នកគ្រប់គ្នារត់ចោលអ្នកមិនខាន ព្រោះវាពិតជារឿងដ៏គួរឲ្យធុញទ្រាន់ខ្លាំងណាស់៕
ចុចអាន៖មនុស្សធ្វើល្អ ច្រើនបានផលល្អ មនុស្សធ្វើល្ងង់ ច្រើនរស់បានសុខ