កាន់តែក្ដៅ! Golf និង Kwan បន្ទោសហែកហួរម្ដាយគ្នាទៅវិញទៅមកក្រោយមានរឿងបែកបាក់
- 2018-01-23 04:11:57
- ចំនួនមតិ 0 | ចំនួនចែករំលែក 0
កាន់តែក្ដៅ! Golf និង Kwan បន្ទោសហែកហួរម្ដាយគ្នាទៅវិញទៅមកក្រោយមានរឿងបែកបាក់
ព័ត៌មានបែកគ្នារបស់គូស្នេហ៍តារាសម្ដែងថៃ Golf Pichaya និង Kwan Usamanee បានបង្កការភ្ញាក់ផ្អើល និងទទួលការចាប់អារម្មណ៍ពីអ្នកតាមដានសិល្បៈប្រទេសថៃមិនតិចឡើយ នៅដើមឆ្នាំ២០១៨នេះ ត្បិតគូនេះត្រូវបានចាត់ទុកថាជាគូស្នេហ៍ដែលស្រឡាញ់គ្នាខ្លាំង មានការតស៊ូជាមួយគ្នាច្រើន បើទោះបីមានការមិនពេញចិត្តពីគ្រួសារទាំងសងខាងក៏ដោយ។
ទីបំផុតនៅថ្ងៃច័ន្ទ ទី២២ ខែមករា តារាសម្ដែង Golf Pichaya ជាភាគីខាងប្រុស ក៏បានចេញមុខឆ្លើយសំណួររបស់អ្នកកាសែតក្នុងឱកាសក្រុងពាលីរឿងភាគថ្មីរបស់ខ្លួន ដោយកំលោះវ័យ ២៩ឆ្នាំរូបនេះបានទម្លាយថាព័ត៌មានចចាមអារ៉ាមដែលថាស្នេហារបស់ខ្លួនត្រូវបែកបាក់ដោយសារមានអ្នកទីបីនោះមិនមែនជារឿងពិតឡើយ ប៉ុន្តែហេតុផលពិតគឺមានបច្ច័យច្រើនរួមផ្សំ បូករួមទាំងរឿងថ្លៃបណ្ណាការ ៧០ទៅ៨០លានបាត (ប្រមាណ ២,៥លានដុល្លារ) ដែលម្ដាយរបស់ Kwan បានលើកឡើងជាច្រើនលើកច្រើនសា។ តារារូបនេះបន្តទាំងរលីងរលោងទឹកភ្នែកថា កន្លងមករូបគេក៏ព្យាយាមទទួលការងារគ្រប់ច្រកល្ហកទាំងអស់ និងព្យាយាមបង្កើតមុខជំនួញ ដើម្បីរកប្រាក់ តែក៏នៅមិនទទួលបានការពេញចិត្ត ហើយចំពោះការត្រលប់មកសាងចំណងស្នេហ៍ជាលើកទីពីរនេះ រូបគេព្យាយាមខ្លាំងមែនទែន ព្រោះពួកគេធ្លាប់ជួបរឿងបែបនេះម្ដងហើយកាលពី១០ឆ្នាំមុន។
ក្រៅពីបញ្ហាគ្រួសារ Golf ក៏បានបង្ហាញថាមូលហេតុរួមផ្សំដែលនាំឲ្យពួកគេសម្រេចចិត្តបែកគ្នាកាលពីចុងឆ្នាំកន្លងទៅនេះ គឺដោយសារបញ្ហាមុខជំនួញ ដោយហេតុថាមួយរយៈនេះពួកគេទាំងពីរមានទំនាក់ទំនងជាមួយគ្នាច្រើនក្នុងការរកស៊ី ហើយស្របពេលជំនួញមានបញ្ហា ក៏មានការទាស់ទែងខ្វែងសម្ដីគ្នាញឹកញាប់។
ក្រោយការបកស្រាយរបស់ខាងប្រុស តារាសម្ដែង Kwan Usamanee ជាភាគីខាងស្រីក៏មិនអាចនៅស្ងៀមបាន ដោយនៅព្រឹកថ្ងៃអង្គារ ទី២៣ ខែមករា នេះ តួឯកស្រីប៉ុស្តិ៍លេខ ៧បានចេញមុខធ្វើសន្និសីទកាសែតភ្លាមៗ និងបានបកស្រាយរឿងរ៉ាវរបស់ខ្លួនដោយផ្ទាល់ថាបញ្ហារឿងរៀបការគឺជាបំណងរបស់ចាស់ទុំខាងខ្លួន ដែលចង់ឃើញកូនចៅរៀបការពេញច្បាប់ ព្រោះស្រឡាញ់គ្នាច្រើនឆ្នាំហើយ ដូច្នេះគួរតែរៀបការឲ្យស្រេចៗល្អជាង។ ប៉ុន្តែពេលយករឿងនេះទៅពិភាក្សាជាមួយចាស់ទុំខាង Golf ម្ដាយរបស់ខាងប្រុសក៏និយាយស្ដីហាក់មិនឲ្យតម្លៃនាងជាខាងស្រី ដោយនិយាយថាមិនមានលុយថ្លៃបណ្ណាការឲ្យទេ ហើយថាបើចង់រៀបការគឺត្រូវចាំឲ្យគាត់ស្លាប់សិនចាំយកទ្រព្យសម្បត្តិទៅធ្វើថ្លៃបណ្ណាការ ឬបើចង់ការខ្លាំងណាស់ត្រូវមានផ្ទៃពោះសិនសឹមការ។ ចំណែក Golf ដែលស្ថិតក្នុងហេតុការណ៍នោះដែរ ក៏មិនបានជួយនិយាយការពារនាងឡើយ។ Kwan រៀបរាប់។
ចំណែកបញ្ហាថ្លៃបណ្ណាការរាប់លានដុល្លារដែល Golf អះអាងថាម្ដាយរបស់នាងតែងលើកមកនិយាយដដែលៗ រហូតធ្វើឲ្យពួកគេត្រូវបែកគ្នានោះ Kwan បានបង្ហើបថាម្ដាយរបស់ខ្លួននិយាយក្នុងលក្ខណៈលេងសើចប៉ុណ្ណោះ ពោលការបែកគ្នានេះ គឺគ្មានអ្វីពាក់ព័ន្ធថ្លៃបណ្ណាការទេ ហើយរឿងជនទីបីក៏គ្មានទាំងសងខាង។
ចុងបញ្ចប់ តារាស្រីវ័យ ២៩ឆ្នាំបានពោលថាខ្លួនមានអារម្មណ៍ថាខ្លួនឯងគិតខុស ដែលត្រលប់មកស្រឡាញ់គ្នាជាមួយបុរសម្នាក់នេះម្ដងទៀត ក្រោយពីធ្លាប់បែកបាក់គ្នាម្ដងហើយកាលពីជាង ១០ឆ្នាំមុន ៕